Astanada «Qazaqstannyń úzdik áleýmettik jobalary» dástúrli baıqaýynyń qorytyndysy jarııalandy. Jeńimpazdar men júldegerlerdi marapattaý rásimine «Nur Otan» partııasy Tóraǵasynyń birinshi orynbasary Máýlen Áshimbaev pen Eńbek jáne halyqty áleýmettik qorǵaý mınıstri Mádına Ábilqasymova, Parlament depýtattary, basqa da memlekettik organdar, bıznes qaýymdastyq, úkimettik emes uıymdar ókilderi qatysty.
Bıylǵy baıqaý alǵash ret «Nur Otan» partııasynyń jáne Eńbek jáne halyqty áleýmettik qorǵaý mınıstrliginiń birlesip uıymdastyrýymen ótkizildi. Bıyl altynshy ret ótkizilgen baıqaýǵa elimizdiń ár óńirinen 318 avtor qatysyp, óz jobalaryn usynǵan. Bul – byltyrǵy jylmen salystyrǵanda eki ese kóp.
Oblystar men Astana, Almaty jáne Shymkent qalalarynda ótken aımaqtyq jáne aýmaqtyq kezeńderden keıin baıqaý komıssııasynyń sheshimimen 55 joba iriktelip, respýblıkalyq kezeńge joldama alǵan bolatyn. Olar 20 qyrkúıekke deıin ınternette júrgizilgen onlaın daýys berýge qatysty. Uıymdastyrýshylar onlaın daýys berýge 56 myń qazaqstandyq qatysyp, úzdikterdi anyqtaýǵa úlken úles qosqanyn aıtyp otyr.
Marapattaý rásiminde «Nur Otan» partııasy Tóraǵasynyń birinshi orynbasary Máýlen Áshimbaev halyqtyń áleýmettik máselelerin sheshý – Elbasy anyqtap bergen elimizdegi eń basty basymdyqtardyń biri ekenin aıtty.
«Osy baǵytta sońǵy jyldarda memlekettik organdar tarapynan aýqymdy jumystar atqarylyp jatyr. Elbasy halyqtyń ál-aýqatyn arttyrýǵa arnalǵan óziniń bes áleýmettik bastamasyn jarııalap, aldymyzǵa jańa mindetter qoıdy. Osy rette qoǵamdaǵy áleýmettik máselelerdi sheshý úshin memlekettik organdarmen birge, úkimettik emes uıymdar, qoǵamdyq birlestikter, kásipkerler jáne saıası partııalar da belsendi áreket etse, kózdegen mejege qol jetkizý jeńildeıtini sózsiz», dedi M.Áshimbaev.
Jeńimpazdar men qatysýshylardy quttyqtaǵan Máýlen Áshimbaev baıqaýǵa qatysqan barlyq joba avtorlary jeńiske laıyq ekenin aıtyp, mundaı baıqaýdyń áleýmettik, rýhanı jáne tárbıelik mańyzy zor ekenin atap ótti.
«Bul, birinshiden, áleýmettik salada belsendiligimen tanylǵan qoǵamdyq uıymdar men muqtaj jandarǵa kómek qolyn sozǵan jeke azamattarǵa qoldaý kórsetýge, olardyń eńbekterin elep-eskerýge múmkindik beretin bolsa, ekinshiden, sondaı birlestikterdi kópshilikke úlgi-ónege retinde dáripteýge jol ashady. Qazirgi tańda elimizde ondaı uıymdar men azamattar myńdap sanalady. Biz olardyń jumystaryn joǵary baǵalaı otyryp, atalǵan uıymdarǵa tıisti jaǵdaı jasaýdy barlyq memlekettik organdardyń, bıznes qaýymdastyqtyń jáne saıası partııalardyń jaýapkershiligi dep qabyldaımyz. О́ıtkeni olar osyndaı ıgi isterimen qoǵamymyzda qaıyrymdylyq mádenıeti men áleýmettik jaýapkershiliktiń qalyptasýyna úlken úlesterin qosyp keledi. Sol sebepti «Nur Otan» partııasy osy dástúrli baıqaýǵa atsalysyp, onyń jańa deńgeıge kóterilýine óz septigin tıgizip otyr», dedi ol.
Qatysýshylardyń ótinishteri sáýir aıynan maýsym aıynyń sońyna deıin bes baǵyt boıynsha qabyldanǵan. Onyń 42-si áleýmettik máselelerdi sheshýdegi aqparattyq ilgerileýge (13,1%), 53 ótinish áleýmettik salada eriktiler qozǵalysyn damytýǵa (16,7%) arnalǵan. 116 ótinish teń múmkindikterdi qamtamasyz etý (36,5%), 47 ótinish múgedektigi bar adamdardy qosa alǵanda, azamattardy jumyspen qamtýǵa yqpal etý (14,8%) boıynsha bolǵan. Al 60 ótinish qıyn ómirlik jaǵdaıdan shyǵýǵa kómek kórsetý (18,9%) baǵytymen qabyldanǵan eken. Sońǵy baǵyt boıynsha qabyldanǵan ótinishter qatarynda túrli keleńsizdikterge tap bolǵan jandarǵa, sonyń ishinde adam saýdasy men turmystyq zorlyq-zombylyq qurbandaryna, jazasyn ótep shyqqan jandardyń qoǵamǵa beıimdelýine, úısiz jandarǵa qoldaý kórsetýge arnalǵan jobalar da bar kórinedi.
Sonymen, 1-orynǵa «Zeınetkerlerge tegin túski as» jobasymen qatysqan Rásıma Temirbaeva laıyq dep tabyldy. 2-oryndy «Arbadaǵy kedergisiz ómir» jobasymen qatysqan Nurbolat Qarabasov pen «El nazy» art-terapııamen damytý ortalyǵy jobasymen qatysqan belgili ánshi Kenjebek Janábilov ıelendi. Al 3-oryn «Meıkaton «TOM: Kazakhstan» jobalarymen qatysqan Marjan Mádıeva men Sánııa Arapovaǵa berildi. Onlaın daýys berý nátıjesi boıynsha, sondaı-aq Ashat Qusdáýletov, Janneta Jazyqbaeva jáne Svetlana Kachýra júldegerler atansa, arnaıy syılyqtar Bıbisara Beısenbaeva, Emın Askerov, Oljas Syzdyqov, Aqbópe Qalenova jáne Leıla Baıramovaǵa tabystaldy.
Marapattaý rásimi ótýden buryn respýblıkalyq baıqaýǵa qatysqan 55 joba kópshilik nazaryna usynylyp, memlekettik organdar, úkimettik emes uıymdar, mesenattar men ınvestorlardyń qatysýymen kórme uıymdastyryldy. Jobalardy kópshilikke ótken jylǵy jeńimpazdar tanystyrdy. Muny bıylǵy baıqaýdyń basty ereksheligi retinde aıtýǵa bolady. Iаǵnı, byltyr osy baıqaýda top jaryp, kópshiliktiń yqylasyna bólengen tarazdyq Isaak Mýstopýlo, «Asar» ońaltý fıtnes-ortalyǵynyń negizin qalaýshy Eldos Baıalyshbaev, «Amazonka» onkologııalyq dertke shaldyqqandardy qoldaý qorynyń dırektory Anjelıka Sarıan jáne taǵy basqalary bıylǵy jeńimpazdardy marapattaýǵa arnaıy qatysty.
Maıgúl SULTAN,
«Egemen Qazaqstan»