Elordada ótken medıa aptalyqtyń sońǵy kúni sıfrly medıa salasyna arnaldy. Osylaısha «Astana Media Week-2018» aptalyǵy otandyq baspasóz ókilderiniń aqparat taratýshy úlken úsh salany, ıaǵnı televızııa, baspasóz jáne dıdjıtal máselelerin tereń qaýzap, al medıanaryq ókilderin pikir-ıdeıa almasý alańymen qamtamasyz etti.
Sharany Aqparat jáne kommýnıkasııalar vıse-mınıstri Nurgúl Maýberlınova ashty. «Forým baǵdarlamasynan osy salanyń bedeldi sarapshylarynyń esimderin kórý kóńilge senim men qýanysh uıalatady. Al olar kótergen taqyryp aýqymy otandyq medıasektordyń damý keleshegi týraly kóp aqparat alýǵa múmkindik beredi. Meniń oıymsha, zamanaýı mass-medıa dástúrli BAQ pen jańa BAQ-tyń basyn biriktire otyryp, naqty aqparatty tutynýshyǵa jedel jetkizýi tıis. Sonymen birge aýdıtorııamen keri baılanysty damytyp, baılanystyń erekshe alańyna aınalýy kerek. Forým qatysýshylary osy taqyrypty tereńirek talqylaıdy degen oıdamyn. Qazirgi tańda bizdiń medıanaryqtyń belsendi qatysýshylary jańa sıfrly trendterdi óte jaqsy meńgergen, tipti olardy qalyptastyrýǵa, otandyq naryqqa beıimdeýge atsalysýda. Biz osy oraıda olardy tek qýattap, qoldaý kórsetemiz», dedi óz sózinde vıse-mınıstr.
Ras, adamzat balasy sıfrly tóńkeris ǵasyrynda ómir súrip jatyr. Ár adam kúndelikti ómirin digital-tehnologııasyz (ınternet, túrli gadjetter men qyzmet kórsetýler) elestete almaıdy. Olardyń kún sanap damýy bizdi, qorshaǵan álemdi de tezirek ózgeriske túsýge májbúr etýde. Osyndaı qysqa merzimde jedel damý kezeńinde qoǵam da, áleýmet te eski jolmen júrmeıtini aqıqat. О́zi ózgeriske túspese, básekelesteriniń shańynda qalyp, tipti damýy toqyraýǵa ushyraýy múmkin. Sol sebepti medıa naryq ta, bıznes-kompanııalar da dıdjıtaldaný prosesine neǵurlym tezirek ótýi kerek. Iаǵnı, dıdjıtaldandyrý degenimiz – bıznesti tereń transformasııalaý, bıznes-prosesterdi ońtaılandyrý úshin, kompanııanyń eńbek ónimdiligin arttyrý jáne tutynýshylarmen qarym-qatynasty jaqsartý maqsatynda sıfrlyq tehnologııany qoldaný. Mine, forým spıkerleri, dıdjıtal-mamandar, jýrnalıster osy sıfrly tehnologııany mass-medıa salasynda barynsha arttyrý, BAQ salasyn dıdjıtaldandyrý, álemdik trendterden qalys qalmaý, iskerlik ortanyń múmkindikteri men qaterleri taqyryby turǵysynda oı órbitti.
Máselen, «Select Communication Group» SEO mamany Vıktor Elıseev «Mass-medıada jeke áreket etý. Sıfrly BAQ kezeńindegi konvergentti jýrnalıstıka» tóńireginde áńgime órbitse, «Sergek» jobasynyń avtory Áset Ahmetov, «Astana Innovations» AQ basqarma tóraǵasy Oljas Sartaev jáne basqalar «Digital Kazakhstan: sıfrly ekonomıkadaǵy óz ornyńdy qalaı tabýǵa bolady?» taqyrybynda óz ıdeıalarymen, qazirgi nátıjesimen bólisti.
Venera TÚGELBAI,
«Egemen Qazaqstan»