Mysyrda halyqaralyq El-Gýne kınofestıvali aıaqtaldy. Qyzyl teńizdiń jaǵasyndaǵy kınobáıge aıasynda toǵyz kún boıy kıno kórsetilim men túrli master-klastar ótti, dep habarlaıdy Euronews.
Mysyr usynǵan «Aqyr zaman» «Eń úzdik sıýjetti arab fılmi» bolyp tanylyp, sonymen birge «Adamzatqa arnalǵan fılm» júldesin de jeńip aldy. Rejıssıor Abý Bakr Shaýkı men prodıýser Dına Ememnyń týyndysy taǵdyr tálkegine ushyraǵan eki adam týraly.
«Biz eki birdeı júldeni jeńip aldyq. Bul biz úshin úlken mártebe. Fılm arqyly adamdardy syrt beınesine qarap emes, minezine qarap baǵalaýǵa shaqyrǵymyz keldi», dedi Abý Bakr Shaýkı.
Eń úzdik kórkem fılm marapatyn sıngapýrlyq rejısser Sıý Hýa Ieonyń «Qııaldaǵy jer» kınofılmi jeńip aldy.
Eń úzdik derekti fılm marapaty sırııalyq Talala Derkıge tabystaldy. «Ákeler men balalar týraly» fılmi áke erki, áıelderdiń tasada qalýy, din men bala tárbıesi týraly.
Festıvalge kóptegen Gollıvýd juldyzdary qatysty. Solardyń biri – Sılvestr Stallone. Ataqty akter «Rembo 5» fılminiń túsirilimine daıyndalyp júrgenin aıtty.
«Sharanyń basty maqsaty – óz týyndylarmen álemdi ózgertýge qushtar rejısserlerge shabyt syılaý», deıdi El-Gýnıe kınofestıvaliniń uıymdastyrýshylary.