Búgin Jambyl oblystyq óńirlik kommýnıkasııalar qyzmetinde oblystyq ishki saıasat basqarmasynyń basshysy Berik Qurmanǵalıdiń qatysýymen baspasóz konferensııasy ótti. Buqaralyq aqparat quraldary ókilderiniń aldynda Berik Ýálıuly basqarmanyń sońǵy toǵyz aıda atqarǵan jumystary týraly baıandady.
Basqarma basshysy Elbasynyń «Bolashaqqa baǵdar: rýhanı jańǵyrý» baǵdarlamalyq maqalasyn iske asyrýdy tikeleı úılestirip kele jatqanyn, atalǵan baǵdarlama aıasynda basqarmanyń uıtqy bolýymen halyqty rýhanı turǵyda baıytý maqsatynda respýblıkalyq deńgeıdegi tanymal azamattar men zııaly tulǵalar óńirge shaqyrylyp, olarmen kezdesýler men ózge de aýqymdy sharalar ótkizý qolǵa alynǵanyn atap ótti. «Oblystyń qoǵamdyq-saıası ahýalyna áleýmettik zertteýler formatynda turaqty túrde monıtorıng júrgiziledi. Áleýmettik zertteý qorytyndysy boıynsha úshinshi toqsanda suralǵan respondentterdiń 93,55 paıyzy eldegi qoǵamdyq-saıası jaǵdaıdyń jaı-kúıin ıgilikti jáne jaqsy dep belgilegen. Bıylǵy jyldyń negizgi qoǵamdyq-saıası taqyryby – Elordamyz Astana qalasynyń 20 jyldyǵy boldy. Jyl ishinde birqatar qoǵamdyq-mádenı kópshilik is-sharalar uıymdastyrylyp, óńirde 29 maýsym kúni «Astana – aımaqtar arqaýy» oblystyq forýmy ótkizildi», dedi basqarma basshysy.
Jambyl óńirinde «Rýhanı jańǵyrý» baǵdarlamasyn iske asyrý boıynsha aǵymdaǵy jyly 3 mıllıard 50 mıllıon teńgege 119 kishi joba men 73 shara iske asyrylýda. Onyń ishinde 350 mıllıon teńge jergilikti bıýdjet, al 2,7 mıllıard teńge mesenattar esebinen qarjylandyrylýda. Sonymen qatar, baspasóz konferensııasynda «Rýhanı jańǵyrý» baǵdarlamasy aıasynda «Qasıetti Qazaqstan» ǵylymı-zertteý ortalyǵynyń basshysy Berik Ábdiǵalıuly, arheolog Aıman Dosymbaeva jáne basqa da azamattardyń qatysýymen «Taraz – tarıh aınasy» ǵylymı-praktıkalyq konferensııasy ótkeni, Qazaqstan Jazýshylar odaǵynyń tóraǵasy Ulyqbek Esdáýlettiń jambyldyq zııaly qaýym ókilderimen kezdeskeni, Halyq qaharmany Qasym Qaısenovtiń ǵasyrlyq mereıtoıy uıymdastyrylǵany aıtyldy. Al Áýlıeata óńirine dańqty batyr Baýyrjan Momyshulynyń kelini, jazýshy Zeınep Ahmetovanyń qatysýymen «Amanat arqalaǵan jan» kezdesýiniń ótýi, aıtysker aqyn Ázimbek Janqulıevti eske alýǵa arnalǵan ádebı keshtiń uıymdastyrylýy óńirdiń rýhanı ómirindegi bir serpilis deýge bolady. Taǵy bir aıta keterligi, jambyldyqtar úshin bıylǵy jyldyń jaǵymdy jańalyqtarynyń biri – «Mereıli otbasy 2018» respýblıkalyq baıqaýynda Nııazqulovtar áýletiniń birinshi oryn ıelengeni boldy. Jeńimpaz áýlet bilim salasynda urpaqtar sabaqtastyǵyn jalǵap, ónege órnekterin kórsetip keledi. Olardy oblys ákimi Asqar Myrzahmetov arnaıy qabyldap, iltıpat kórsetken edi.
Jambyl óńiri talanttan kende emes. Búgingi tańda ár salada joǵary jetistikke jetip, abyroı bıigine kóterilgen áýlıeatalyq azamattar az emes. Sherhan Murtaza, Ákim Tarazı, Asanáli Áshimov, Myrzataı Joldasbekov, О́mirbek Baıgeldi, Muhtarbaı О́telbaev jáne ózge de azamattar Áýlıeata topyraǵynan shyǵyp, qazaq atyn ár sala boıynsha álemge tanytyp júrgen tarlandar. Bul oraıda Berik Qurmanǵalı oblystyq ishki saıasat basqarmasy «Jerlester» forýmyn ótkizýdi qolǵa alyp otyrǵanyn jetkizdi. Mundaǵy maqsat ta Elbasynyń «Rýhanı jańǵyrý» baǵdarlamasyn is júzinde nasıhattaý bolyp otyr.
Sonymen qatar, basqosýda basqarmanyń negizgi jumystarynyń biri túsindirý jáne aqparattyq saıasatty júrgizý ekeni de aıtyldy. Búgingi tańda oblysta 59 buqaralyq aqparat quraly qyzmet etedi. Onyń ishinde 14 aqparat quralynda memlekettiń qatysý úlesi bar. О́ńirde memlekettik aqparattyq saıasatty júzege asyrýǵa 658,3 mıllıon teńge qarajat bólingen. Qazaqstan Respýblıkasynyń «Buqaralyq aqparat quraldary týraly» Zańyna sáıkes, barlyq memlekettik mekemelerde baspasózge jaýapty mamandar belgilengen. О́z sózinde basqarma basshysy olardyń kásibı biliktiligin arttyrý jumystary basqarma tarapynan júzege asyrylyp keletindigin aıtyp ótti. Jýyrda ǵana bul maqsatta Merki aýdanynda «Aqparat aǵyny jáne biz» jáne «BAQ arasyndaǵy baılanystyń tıimdi joldary» atty semınar-trenıng ótken bolatyn. Budan bólek, oblysta Jambyl óńirinde alǵash ret oblys ákiminiń kýbogyna arnalǵan jýrnalıster arasynda kishi fýtboldan respýblıkalyq týrnır uıymdastyrylyp, oǵan Astana, Almaty, Shymkent qalalary jáne Almaty, Qyzylorda, Jambyl oblystarynan barlyǵy 12 komanda qatysyp, jeńimpazdar marapattalǵan.
«Oblys ákimi Asqar Isabekulynyń tapsyrmasymen oblystyq basqarma basshylary men Tarazqalasy jáne aýdan ákimderi kestege sáıkes «О́ńirlik kommýnıkasııalar qyzmeti» alańynda aptanyń dúısenbi, sársenbi jáne juma kúnderi brıfıngke qatysyp, odan keıin oblystyq «JAMBYL» telearnasynyń «1 stýdııa» baǵdarlamasyna tikeleı efırge shyǵýyn tapsyrǵan bolatyn. Oblystyq ishki saıasat basqarmasy bekitilgen kestege sáıkes, brıfıng pen tikeleı efırge mekemelerdiń birinshi basshysynyń qatysýyn úılestirip keledi», dedi óz sózinde.
Konferensııa sońynda Berik Qurmanǵalı basqarmanyń birqatar josparlarymen bólisti. Aǵymdaǵy jyldyń qazan-qarasha aıynda Jambyl óńirinde «Jerlester» forýmymen qatar, Qazaqstan Respýblıkasynyń Prezıdenti janyndaǵy Strategııalyq zertteýler ınstıtýty sarapshylarynyń qatysýymen semınar-trenıng, Alash áskeriniń qurylǵanyna júz jyl tolýyna arnalǵan «dóńgelek ústel» otyrysy ótedi. Sonymen qatar, basqarmanyń bastamasymen jeltoqsan aıynda Tuńǵysh Prezıdent kúnine arnalǵan ǵylymı-tájirıbelik konferensııa men Táýelsizdik kúnine arnalǵan saltanatty jınalys uıymdastyrylady. Al sóz sońynda Berik Ýálıuly jýyrda Astana qalasynda ótken keńeste elimizdiń Qoǵamdyq damý mınıstri Darhan Káletaev Jambyl oblystyq ishki saıasat basqarmasynyń usynysyn qoldap, sonyń negizinde «Rýhanı jańǵyrý» baǵdarlamasy boıynsha alǵashqy respýblıkalyq kóshpeli semınar Áýlıeata óńirinde ótetindigin málimdedi.
Hamıt ESAMAN,
«Egemen Qazaqstan»
Jambyl oblysy