Prezıdenttik klınıkanyń shaqyrýymen, tuńǵysh ret Qazaqstanǵa dúnıe júzine áıgili ıadrolyq medısına dárigeri, medısına ǵylymynyń doktory, professor Djýn Hatazava keldi. Prezıdenttiń is basqarmasyna qarasty medısınalyq ortalyqtyń dárigerlerine professor «Iаdrolyq medısına onkologııa, nevrologııa jáne kardıologııada» degen taqyrypta sheberlik sabaqtaryn ótkizdi.
Atom energııasynyń qýatymen ǵasyr indeti atalǵan rak aýrýlaryn óte erte kezinde anyqtap dıagnozyn qoıý jáne radıoızotoptar kómegimen jalmap túser tajal dertti emdeý ádisterin paıdalaný ǵylymdaǵy asa bir perspektıvaly baǵyt bolyp sanalady. Bul rette, rak aýrýyn jańa bastalyp kele jatqanynda anyqtaýdyń máni erekshe. О́ıtkeni jaıylyp ketken órtti óshirgennen, endi bastalyp kele jatqan ottyń oshaǵyn kúsh almaı turyp sóndirýdiń tıimdiligi qandaı bolsa, rakty da neǵurlym erte anyqtaý soǵurlym pasıentke de, dárigerge de jeńil, ári jumsalar kúsh pen qarajatty azyraq talap etedi.
Densaýlyq saqtaý mınıstrliginiń deregine súıensek, qazirgi ýaqytta elimizde 150 myńnan astam adam «onkologııa» dıagnozymen esepte tursa, jyl saıyn 30 myńdaı qazaqstandyqtyń boıynda onkologııalyq aýrý barlyǵy rastalyp otyrady eken.
Prezıdenttik klınıka onkologııalyq aýrýlardy emdeýdiń múmkindigin keńeıtýdi kózdep, aýrýhananyń ózinde radıoızotoptyq farmakologııalyq preparattardy daıyndaýǵa qam jasaýda. Al professor Djýn Hatazava bolsa osy ıadrolyq medısına salasynda asa zor tájirıbeli dáriger sanalady. Azııa jáne Tynyq muhıty basseıni memleketteri boıynsha ozyq maman Djýn Hatazavanyń jetistikteri ásirese neıroradıologııada erekshe.
Sheberlik sabaq ótkizý barysynda professordyń slaıdtar kómegimen radıoızotopty preparattardy qan tamyry arqyly jiberip, metastazanyń betin qaıtaryp qana qoımaı, obyr jasýshalar kóziniń tolyq joıylǵanyn kórý jáne onyń bas aıaǵy birneshe aıdyń júzinde múmkin bolýyna kóz jetkizý shynynda da tańdanarlyqtaı. Ádette metastaza bastalyp ketse úmittiń úzilgeni, derttiń boıǵa dendegeni deıtin uǵymǵa ózgeristiń enýi qanshalyqty qymbat deseńizshi!
«Dúnıe júzindegi ıadrolyq medısınanyń ozyq klınıkalary, onyń ishinde Japonııa qoldanatyn bul tárizdi preparattardy Qazaqstanda jasaýǵa ábden bolady. Oǵan ıadrolyq fızıka, hımııa salasy boıynsha mamandar, zertteýdi klınıkada júzege asyrýǵa peıildi bilikti dárigerler jáne nıet bar, sondyqtan Qazaqstandaǵy ıadrolyq medısınanyń damýynyń, radıoızotopty preaparattar daıarlaýdyń keleshegi zor», deıdi professor Djýn Hatazava.
Japondyq ǵalym-dárigerdiń endigi bir nazar aýdarar jumysy mıdyń degeneratıvtik aqaýlary, ıaǵnı Alsgeımer, Parkınson jáne epılepsııa syrqattaryna qatysty jumystary. Munda da Hatazava myrza aýrýdyń endi bastalyp kele jatqan satysynda naýqas dertin atom qýatymen anyqtap dıagnoz qoıýdyń ádisterin keńinen paıdalanýdy usynady. Mamannyń aıtýynsha, magnıtti rezonansty zertteýmen de biraz dúnıeni bilýge bolady, degenmen radıologııalyq suıyqtyqty tamyr arqyly jiberip, aýrý oshaǵynyń dál qaı jerde, qandaı tabıǵaty bar ekenin bilip, dáldikpen kómekke keler ıadrolyq medısına múmkindigi ólsheýsiz.
Búginde Prezıdenttik klınıka dárigerlerine radıoızotoptyq dıagnostıkanyń zamanaýı ádisteri týraly dáris oqyǵan doktor Djýn Hatazava «Osaka University» ýnıversıtettik klınıkasy ıadrolyq medısına jáne radıonýklıdtik kınetıka bóliminiń basshysy qyzmetin atqarady. Immýnologııalyq zertteý ortalyǵynyń bas zertteýshisi, conymen qatar «Azııa-Tynyq muhıt ıadrolyq medısına jáne bıologııa» qoǵamynyń basshysy, Japonııa ıadrolyq medısına qoǵamynyń prezıdenti.
Jýrnalısterge professordyń sózin aýdaryp berip, eki arada kópir bolǵan dáriger Ekaterına Lıýgaı da osy kúnder ishinde radıologııalyq ádistermen pasıentterge dıagnoz qoıýda Djýn Hatazavamen birge tájirıbe almasyp, birshama keńester alǵan. «Bul kisiniń klınıkamyzda bolǵan ár mınýtyn paıdalanyp sheberlik synybynan tys praktıkalyq kómegine de súıenip jatyrmyz. Professor jańa tájirıbe almasýdyń mańyzdylyǵyn aıtyp jatyr, jalpy ol kisiden bizdiń alarymyz áli de kóp», deıdi E.Lıýgaı.
Anar TО́LEÝHANQYZY,
«Egemen Qazaqstan»