Jeke kásipker Sergeı Kýdınovtyń tabanynan tozyp, sergeldeńge túskenine úsh jyldan asyp barady.
Áli kúnge deıin taban aqy, mańdaı terdiń qunyn daýlap, tórelerdiń esigin tozdyrýmen júr. Olardyń shyǵarypsalma qurǵaq ýádelerine toıǵany sonshalyq, aýyzdaryn ashyp, qoldaryn qımyldata bastasa eki qulaǵyn basyp qashatyndy shyǵardy. Árli-berli júristen dym ónbegennen keıin oblystyq kásipkerler palatasyna qaırylýǵa májbúr boldy.
Onyń shaǵymy kásipkerlerdiń quqyǵyn qorǵaý jónindegi keńeste qaralyp, «Kýdınov» jeke kásipkerliginiń múddesin sot arqyly qorǵaý týraly sheshim shyqty.
Sergeıdiń aıtýynsha, Petropavl qalasyn damytýǵa kómek kórsetý qorymen zańdy túrde jasalǵan kelisimshartqa sáıkes, ol múmkindigi shekteýli balalarǵa arnalǵan, jetim jáne ata-analardyń qaraýynsyz qalǵan ınternattardyń, qaladaǵy kópqabatty úılerdiń aýlalaryna sporttyq trenajerler men hokkeı korttaryn ornatyp bergen. Bul maqsat úshin 7,2 mıllıon teńge shyǵyndalady. Osy somadan 1,9 mıllıon teńge ǵana esepshotqa aýdarylyp, qalǵan qarajatty 2016 jyldyń 20 mamyryna deıin óteýge kelisiledi. Alaıda nysandardy ótkizý-qabyldaý aktisi rásimdelgeni sol eken, «is bitti, qý kettiniń» túlkibulań oıyny bastalyp sala beredi.
Qarsy tarap byltyr kásipkerlerdiń quqyǵyn qorǵaý jónindegi keńestiń otyrysyna taıly-tuıaǵymen kelip, alty aıdyń ishinde bereshekten qutylatyndyǵy jóninde ant-sý ishipti. Alaıda kóz aldarqatý úshin jarty mıllıon teńge ǵana tólenip, bergen ýáde jelmen ushyp kete barǵan. Bul joly tóbe kórsetpek túgil, resmı hatqa jaýap berýdi de qajet dep tappaǵan tárizdi.
Japa shegýshi kásipker endi ózin súlikshe soryp, eshnárse bolmaǵandaı taırańdap júrgen sheneýnikterdi táýbasyna keltirýdi jergilikti sottan ótinip, úlken úmit artyp otyr.
О́mir ESQALI,
«Egemen Qazaqstan»
Soltústik Qazaqstan oblysy