Júıe jańasha jandanýy tıis

Keshe Almatyda «Ádilet» demo­kra­tııalyq partııasy «Qazaqstan Respýb­lı­kasyndaǵy jergilikti ózin ózi basqarýdy damytý»  degen  taqyrypta baspasóz-más­lıhatyn ótkizdi. Oǵan «Ádilet» par­tııasynyń tóraǵasy Maqsut Nárikbaev jáne partııa tóraǵasynyń birinshi oryn­basary Tólegen Sydyq, sondaı-aq «Ádi­let» partııasynan depýtattyqqa kandıdattar qatysty.  Baspasóz máslıhaty ba­rysynda partııa «Qazaqstan Respýb­lı­kasyndaǵy jergilikti ózin ózi bas­qarýdy damytý» týraly málimdemesin jarııa etti. «Ádilet» partııasy jergilikti ózin ózi basqarýdy azamattyq qoǵammen, eldiń áleýmettik-ekonomıkalyq dáreje­si­men tyǵyz baılanysty kóp kezeńnen turatyn úrdis retinde qarastyratynyn atap ótti. Olardyń oı-pikirine súıensek, jergilikti ózin ózi basqarý organdary eldiń árbir eldi mekenderinde, al qa­lalarda shaǵyn aýdandarda qurylýy tıis. Ol jerlerde mundaı qurylymdar turǵyndardyń máselelerin sheship qana qoımaı, qarjy kózderin de anyqtap, zań negizinde jergilikti jerdiń qarjy ınstıtýtyn qalyptastyrýǵa múmkindik bermek. «Biz parlamenttik partııanyń biri bolsaq, onda azamattyq qoǵamdy qa­lyptastyrýdyń tetikterin Qazaqstan Respýblıkasynyń memlekettik jáne  ózin ózi basqarý týraly zańyna, sondaı-aq osyǵan qatysty basqa da zań aktilerine ózgerister engizip, olardyń qabyl­danýyn  qolǵa alar edik», deıdi ádilet­tikter. Bul rette olar memlekettiń myna máselelerdi nazarǵa alý qajettigin atap ótti. Máselen, zań shyǵarý blogy – jer­gilikti ózin ózi basqarý organ­dary­nyń ókilettilikterin jáne fýnk­sııa­laryn belgileıtin, anyqtaıtyn, sondaı-aq bekitetin normatıvti-quqyqtyq akti­lerdiń jıyntyǵy bolyp esepteledi. Bul blok atalǵan zańnyń tıimdi jáne utymdy qyzmet jasaýyn qamtamasyz etýi tıis. Partııa málimdemesindegi kóterilgen ekinshi bir másele – qarjy-ekonomı­ka­lyq blogy. «Ádilet» partııasy osy oraıda jergilikti ózin ózi basqarý organdary qarjylyq jaǵynan bılikten táýelsiz bolǵan jaǵdaıda ǵana tıimdi bolady dep esepteıdi. Baspasóz máslıhaty kezinde jergilikti ózin ózi basqarý organdarynyń jeke-dara bıýdjetiniń úzdiksiz tabys alatyn bóligi negizinde ózin ózi basqarý organdaryn qarjylandyrýǵa baǵyttal­ǵan ulttyq qor bolýy tıis ekendigi aı­tyldy. «Birinshi kezekte, ulttyq qordy daǵdarys jaǵdaıynda paıdalaný úshin turaqtandyrý bólimin ishki jalpy ónimniń 15 paıyzy deńgeıine deıin shekteý qajet, qalǵan bóligin eldiń áleý­mettik-ekonomıkalyq damýyna jumsaý kerek», delingen málimdemede. Bul kúni «Ádilet» partııasy jergilikti ózin ózi basqarýdaǵy uıymdas­ty­rýshylyq-quqyqtyq máselesine de nazar aýdardy. Bul rette, partııa Qa­zaqstan­daǵy jergilikti ózin ózi bas­qarýdy damytýdy memleket tarapynan qoldaý jóninde ulttyq baǵdarlama daıar­laýdy jón dep sanaıtyndyqtaryn jetkizdi. Jalpy, «Ádilet» demokra­tııa­lyq partııasy uıymdastyrǵan máslıhat kezinde jergilikti ózin ózi basqarý týraly reforma áleýmettik, quqyqtyq basym baǵyttaǵy Qazaqstandy qurý maqsatyn kózdeıtini nazarǵa salyndy. Láıla EDILQYZY.