Jaqynda Ulttyq mýzeıdiń mamandary Qytaı Halyq Respýblıkasynyń Qazaqstandaǵy elshiligi men Qytaı Mádenıet mınıstrliginiń uıymdastyrýymen Beıjiń, Chanchýn, Harbın qalalarynda mýzeı isin júrgizý boıynsha joǵary topqa arnalǵan semınarǵa qatysyp qaıtty. Mýzeı mamandarynyń ózara tájirıbe almasýy maqsatynda uıymdastyrylǵan mundaı semınar osydan eki jyl buryn ótkizilgen bolatyn.
Bıylǵy jıynǵa Ulttyq mýzeıden 15 maman arnaıy shaqyrylyp, apta boıy kórshi eldiń tarıhı-mádenı muralarymen tanysty. Odan bólek, semınar barysynda Qytaı mýzeıleri týraly jalpy maǵlumat berilip, ondaǵy murajaılardyń halyqaralyq deńgeıdegi qyzmeti týraly dárister tyńdaldy.
QHR Mádenıet mınıstrligi Ortalyq kadrlar akademııasy Partııa komıtetiniń hatshysy Dýan Chjoýý qazaqstandyq delegasııany qabyldaý kezinde Qytaı tarapy «Bir beldeý, bir jol» strategııalyq baǵdarlamasy boıynsha Qazaqstandy senimdi seriktes sanaıtyndyǵyn, qos el arasyndaǵy mádenı yntymaqtastyqty damytý basty maqsat ekenin atap ótti. Ár eldiń tarıhyn jádiger arqyly saqtap, urpaqqa jetkizýde qashanda róli aıryqsha sanalatyn mýzeı salasyna keńinen toqtaldy. «Mýzeı – keshegi ótken tarıhymyzdy baıandap, keleshek urpaqqa jetkizýshi qadirli oryn. Sońǵy jyldary Qytaıdaǵy mýzeı qyzmeti qarqyndy damyp, joǵary nátıjege qol jetkizdi. Búginde olar eksponatty saqtaýmen qatar, zertteý, kórmeler uıymdastyrý jáne jurtshylyq nazaryna usynýmen aınalysady. Osy baǵytta qazaqstandyq mýzeı mamandarymen tájirıbe almasyp, budan ári de mádenı qarym-qatynasymyzdy jalǵastyra bergimiz keledi», dedi.
Qazirgi kezde QHR-da jalpy sany 4873 mýzeı bar. Onyń ishinde memlekettik mýzeı – 4873, jekemenshik mýzeı sany – 1297. Jekemenshikteri jalpy mýzeılerdiń 30 paıyzyn quraıdy. Bir ereksheligi, olardyń 80 paıyzy halyqqa tegin qyzmet kórsetedi. Sondyqtan da bolar, qazaqstandyq mýzeı qyzmetkerleri bas suqqan Qytaı Ulttyq, Gýgýn, Manchjóý-go «Qýyrshaq memleketi», Szılın, Heılýnszıan mýzeıleriniń qaı-qaısysyna da kelýshiler kóp. Orta eseppen jylyna mýzeıdi tamashalaýshylar sany 500-600 mln-dy quraıdy eken. Al bir jylda ótkiziletin kórme sany orta eseppen – 22 000, al 2016 jyly eń joǵarǵy kórsetkish boıynsha kórme sany 30 myńǵa jetken. Qytaı mýzeılerinde saqtalyp turǵan eksponattar sany shamamen – 306 mln. Al keıingi kezderi jyldan-jylǵa damyp kele jatqan mýzeı salasy boıynsha JOO-da jańa mamandyqtar ashylǵan. 2016 jylǵy kórsetkish boıynsha 47 ýnıversıtette bakalavrıat, 34 ýnıversıtette magıstratýra negizinde mamandar daıarlanýda.
Atalǵan issapar barysynda Ulttyq mýzeı mamandary sheteldik mýzeıler isin tanyp, kóp maǵlumat alyp qaıtty. Qazaqstanǵa arnaıy keletin saıahatshylardyń eldiń tarıhyna, mádenıetine, salt-dástúrine degen qyzyǵýshylyǵyn arttyrý úshin bul saladaǵy qyzmetkerlerge álemdik deńgeıdegi tájirıbe artyqtyq etpeıdi.
Láılá NOǴAIBEKQYZY,
Ulttyq mýzeıdiń qyzmetkeri