«Qazaqstanda ushaq bıletiniń quny qymbat. Týrızmniń damýyna kedergi keltirip turǵan sebeptiń biri – osy». Atyraýlyq kásipkerlermen kezdesken Shotlandııanyń Aberdın qalasy ákimshiliginiń keńesshisi Djon Reınolds osyndaı pikir aıtty.
Atyraý men Aberdın arasyndaǵy baılanysty nyǵaıtý maqsatynda arnaıy kelgen delegasııa birqatar kelissózder júrgizdi.
– Tek ózińe ǵana jumys isteseń, kókjıegiń keńimeıdi. Álemdik naryqqa shyǵýdyń joldaryn qarastyrý kerek, – deıdi Djon Reınolds.
– Biz IT, aýyl sharýashylyǵy, ónerkásip salalarynda tehnologııalarymyzdy usyna alamyz. Men Qazaqstanda sońǵy ret 2004 jyly bolǵanmyn, odan beri kóp nárse ózgeripti. Kompanııalaryńyz bizge jaqsy qyzmetter men taýarlar usyna alatynyn kórdim. Atyraýda týrızmdi damytý áleýeti joǵary, biraq áýe bıletteriniń baǵasy tym qymbat. Londonnan osy jerge kelgenshe jaratqan qarjyma men Eýropany túgel aralap shyǵýyma bolar edi. Bıýdjettik áýe jolyn tartý arqyly bul máseleni sheshýdiń joly bar dep esepteımin.
Shotlandyq kompanııalar negizinen munaı salasyna shoǵyrlanǵan. «Fenıks ISA» JShS bas dırektory Dúısenbek Smaǵulov qonaqúı bıznesi, qurylys materıaldaryn óńdeý boıynsha da sheteldik kásipkerlermen birlese jumys isteýge nıetti ekenderin aıtady.
Qazir aımaqta brıtandyq kapıtaldyń qatysýymen 88 kompanııa jumys istep jatyr. Bıylǵy birinshi toqsanda Atyraý oblysy men Ulybrıtanııa arasyndaǵy syrtqy saýda aınalymy 46 mlrd dollardan asty. О́tken jylmen salystyrǵanda 67%-ke tómendegen. Dóńgelek ústel basyna jınalǵan eki el kásipkerleri osy kórsetkishti kóbeıtýge ýaǵdalasty.
Baqytgúl BABASh,
«Egemen Qazaqstan»
ATYRAÝ