Qazaqstan Respýblıkasynyń Syrtqy ister mınıstri Qaırat Ábdirahmanov Qazaqstanǵa resmı saparmen kelgen Úndistan Respýblıkasynyń Qorǵanys mınıstri Nırmala Sıtharamanmen kezdesti, dep habarlaıdy Syrtqy ister mınıstrliginiń baspasóz qyzmeti.
Taraptar Qazaqstan men Úndistan arasyndaǵy strategııalyq seriktestiktiń dáıekti damýyn atap ótti. Prezıdent Nursultan Nazarbaev pen Premer-mınıstr Narendra Modı turaqty negizde kezdesýler ótkizýde jáne olar ekijaqty qarym-qatynastarǵa oń yqpalyn tıgizýde.
Qazaqstan SIM basshysy BUU Qaýipsizdik Keńesi aıasynda bitimgershilikke beriletin erekshe mańyzdylyqty atap ótti jáne Birikken Ulttar Uıymynyń Lıvandaǵy Ýaqytsha kúshterindegi (BUULÝK) Úndistan batalonynyń quramynda Qazaqstan bitimgershilik kontıngentiniń óristeýine múmkindik týǵyzǵany úshin úndi tarapyna alǵysyn bildirdi.
N.Sıtharaman óz kezeginde BUU Qaýipsizdik Keńesiniń múshesi retindegi, Aýǵanstandaǵy jaǵdaıdy qalpyna keltirýdegi jáne Astana prosesiniń sheńberinde Sırııadaǵy jaǵdaıdy retteýdegi Qazaqstannyń mańyzdy rólin atap ótti. Úndi mınıstri Qazaqstanǵa bitimgershilik boıynsha áriptes eldi tańdaýda Úndistanǵa bildirgen senimdiligi úshin alǵysyn bildirdi. «Bizdiń elderimiz tarıhta alǵash ret bitimgershilik kontıngentti óristetý maqsatynda basyn qosty jáne bul basqa memleketter úshin úlgi bolýǵa tıis. Taraptar bir-birinen kóp nárseni úırenip, bitimgershilik mıssııasyn kúsheıtetin bolady», - dedi mınıstr.
Sapar barysynda Úndistan Qorǵanys mınıstri óziniń qazaqstandyq áriptesterimen - Qorǵanys mınıstrimen, Qorǵanys jáne aeroǵarysh ónerkásibi mınıstrimen kezdesip, Qazaqstan men Úndistan arasyndaǵy Birikken Ulttar Uıymynyń Lıvandaǵy Ýaqytsha kúshterindegi (BUULÝK) úndistandyq batalon quramynda qazaqstandyq bitimgershilik kontıngentti birlesip óristetýdiń saltanatty rásimine qatysatyn bolady.