Shalǵaıdaǵy aýyldarǵa sapaly ınternet jetetin kún jaqyn. Astanada keshe 1 200 aýylǵa keń jolaqty ınternet jetkizý jumysyn oryndaý boıynsha kelisimge qol qoıyldy. Joba memleket-jekemenshik áriptestigi aıasynda júzege asyrylady.
Qazaqstannyń aýyldyq eldi mekenderin optıkalyq-talshyqty tehnologııa arqyly keń jolaqty ınternetpen qamtamasyz etý jobasyn iske asyrý boıynsha Aqparat jáne kommýnıkasııalar mınıstrligi jáne «Qazaqtelekom» AQ pen «SilkNetCom» JShS, sondaı-aq «Transtelekom» AQ kelisimshartqa qol qoıdy.
Qazaqstannyń úshinshi jańǵyrýy mindetin alǵa qoıǵan Memleket basshysy Nursultan Nazarbaev ekonomıkanyń jedel tehnologııalyq damýyn júzege asyrý aldyńǵy kezektegi másele ekenin atap aıtqan bolatyn. Osynyń negizinde «Sıfrly Qazaqstan» baǵdarlamasy qurylǵany belgili.
Osy oraıda, birinshi kezekte halyqty joǵary jyldamdyqty ınternetpen qamtamasyz etý jáne aýyl men qala arasyndaǵy sıfrlyq teńsizdikti azaıtý máselesi qolǵa alynýda. Boljam boıynsha bul joba elektrondy saýda-sattyqty jandandyrý, elektrondyq úkimet qyzmetterin, bilim berý men densaýlyq saqtaý salalaryndaǵy ınteraktıvti quraldardy engizý esebinen el damýyna eleýli áleýmettik-ekonomıkalyq serpin berýi tıis.
Atalǵan jobany júzege asyrý úshin Aqparat jáne kommýnıkasııalar mınıstrligi memleket-jekemenshik áriptestigi aıasynda arnaıy baıqaý uıymdastyrǵan bolatyn. Baıqaý nátıjesi boıynsha aýyldyq eldi mekenderge keń jolaqty jelini jetkizý jumysyn «Qazaqtelekom» AQ, «Transtelekom» AQ jáne «SilkNetCom» JShS kompanııalary atqaratyn boldy. Atalǵan kompanııalar eldi mekenderge 20 myń shaqyrymdy quraıtyn talshyqty jelini tartyp bermek.
«Memleket basshysy elimizdi sıfrlandyrý týraly naqty tapsyrma bergeni, sonyń negizinde «Sıfrlyq Qazaqstan» baǵdarlamasy júzege asyrylyp jatqany málim. Osy baǵdarlama aıasynda el aýmaǵyndaǵy aýyldardy sapaly ınternetpen qamtamasyz etý sharýasy qolǵa alyndy.
Bizdiń mınıstrlik eki jylǵa jýyq ýaqyt qajetti is-sharalardy atqardy. Búgin qol qoıylǵan kelisim sol jumystyń oń nátıjesi. Kelisimge saı úsh jyldyń ishinde 20 myń shaqyrymdyq talshyqty-optıkalyq jeli qurylysy aıaqtalady. Iаǵnı 2,4 mıllıon turǵyny bar 1 200-den astam eldi meken men 3 jarym myń bilim berý, densaýlyq saqtaý uıymdary jáne aýyl ákimdikteri sapaly baılanyspen qamtamasyz etiledi. Osylaısha aýyldaǵy aǵaıyn jańa sıfrlyq qyzmetterge qol jetkizedi. Olardyń arasynda elektrondy memlekettik qyzmetter, telemedısına, qashyqtyqtan oqytý, elektrony saýda men taǵy da basqa artyqshylyqtar bar», deıdi Aqparat jáne kommýnıkasııalar mınıstri Dáýren Abaev.
Joǵaryda atap ótkenimizdeı, aýyldy keń jolaqty ınternet qyzmetine qosý el ekonomıkasyn modernızasııalaý isin jedeldetý maqsatyndaǵy irgeli sharalardyń úlken bir bóligi. Osynyń arqasynda onlaın saýda, mobıldi bankıng, 3D-prıntıng, densaýlyq saqtaý, bilim berý sııaqty basqa da mańyzdy salalar damýdyń jańa kezeńine qadam basady. Mınıstrlik muryndyq bolǵan joba 3 kezeńge bólingen. Birinshi kezeńde, osy jyldyń sońyna deıin 105 myń adam joǵary jyldamdyqty ınternet qyzmetine qol jetkizedi dep mejelengen. Ekinshi kezeńde, 2019 jyly 1,2 mln adamdy dál osyndaı ınternetpen qamtamasyz etý josparlanyp otyr. Al jobanyń qalǵan bóligi 2020 jylǵa deıin júzege asyrylmaqshy.
«Qazaqtelekom» AQ basqarma tóraǵasy Qýanyshbek Esekeevtiń aıtýynsha, aýyl-aımaqqa qosylatyn keń jolaqty ınternet qaladaǵy baılanyspen baǵa jaǵynan da sapa jaǵynan da deńgeıles bolady. Bıylǵy jyly eń aldymen 7 eldi mekenge jeli tartylady. Jıyn sońynda Aqparat jáne kommýnıkasııalar vıse-mınıstri D.Tuıaqov pen «Qazaqtelekom» AQ, «Transtelekom» AQ, «SilkNetCom» JShS basshylary kelisimshartqa qol qoıdy.
Marjan TILEÝBEK,
«Egemen Qazaqstan»