Almatyda Ortalyq Azııada esirtki taratpaýdyń aldyn alý baǵdarlamasyna (CADAP) sáıkes ótken II Halyqaralyq aýmaqtyq konferensııa jumysyn aıaqtady.
Aýmaqtyǵy bes respýblıkanyń Ishki ister mınıstrliginiń esirtkini baqylaýdy tikeleı qolǵa alyp otyrǵan departamentteriniń, densaýlyq saqtaý mınıstrliginiń narkologııalyq-emdeý ortalyqtary men memlekettik emes uıymdardyń ókilderi, sondaı-aq birqatar alys shetelden kelgen mártebeli maman-meımandardyń qatysýymen ótken jınalystyń eki kúnge sozylatyny týraly keshegi maqalada jazǵanbyz.
Májilistiń ekinshi kúni negizgi áńgime densaýlyq saqtaý men esirtki qaýipsizdigi, onyń aınalaǵa tıgizetin zalaly taqyrybyna arnaldy. Keńeıtilgen otyrysta elimizde paıda bolǵan jańa sıntetıkalyq esirtki túrlerin paıdalanýdyń jańasha jol tabýy men qazirgi tańdaǵy onyń sandyq ósimi, ony jańasha emdeý úlgileri týraly Qazaqstan dárigerleri oılaryn ortaǵa saldy. Tájikstan men Túrikmenstannan, О́zbekstan men Qyrǵyzstannan kelgen ókilder óz elderindegi esirtki saıasatynyń aqýaly týraly salıqaly túrde oı bólisti. Osy kúnge deıin nashaqorlyq pen jezekshólikten birden bir ada el Túrikmenstannyń ómir salty da qyzyǵarlyq, árıne. Alaıda, kórshiden maza ketse, qol qýsyryp ol qalaı tynysh otyrmaq?
Pikir bildirýshlerdiń oıyn aıaqtaýyna ýaqyt jetpeı, sóıleýshige sóz jetpeı qyzý ótken eki kúndik konferensııadan bir ańǵarylǵany – keńirdekti qansha jerden sozsaq ta «bolar is bolyp, boıaýy sińip qoıǵan.» Qazirgi Qazaqstannyń aýmaǵynda esirtkige táýeldi 23,5 myń adam turyp jatyr. Muqııat esepke alynǵandary. Olardyń ishinde 200-deı kámelettik jasqa tolmaǵandar, 2000-daı áıelder bar. CADAP-tyń Halyqaralyq jıynynda qazaqstandyq mártebeli ókil Ivan Dobryshın sondaı ýáj aıtty. Tipti, bul sońǵy bes jyl ishinde 35 prosentke kemigen kórsetkish eken.
Dáriger-mamandar, psıhologtar, memlekettik emes uıym músheleri, sheteldik meımandar bul jıynda ǵasyrlyq-ǵalamdyq dertke tosqaýyl qoıý kerektigin ashynyp, alqynyp aıtqanmen, onyń aldyn alýdyń, boldyrmaýdyń jolyn tabýda múldem sharasyz ekendigi baıqalyp ta turdy. О́ıtkeni, esirtki trafıginiń joly kesilgen joq! Biraq, ádettegideı, oǵan qarsy aıaýsyz kúres jalǵasa bermek.
Esitrkige qatysty Halyqaralyq májilistiń tamámdalýyna ýaqyt taıaǵanda veb-saıttar Almatyda «Amfıtamın» psıhottroptyq zatyn tasymaldaýshynyń quryqtalǵany týraly shuǵyl habar taratty. Ekonomıkalyq tergeý qyzmetiniń sarbazdary Eýroodaq (EO) elderiniń birinen pochta tasymaly arqyly kelgen 2,522 gramm esirtkilik zatty qabyldaǵan azamattyń qolyna kisen salypty. Tergeý sharalary júrgizilip jatyr.
Talǵat SÚIINBAI,
«Egemen Qazaqstan»
ALMATY