Joldaýdy iske asyrýdyń jalpyulttyq jospary daıyndalady

Premer-Mınıstr Baqytjan Sa­ǵyn­taev otyrysty asha otyryp, Memleket bas­shysynyń búgin jarııalanǵan Jol­daýy halyq arasynda úlken qoldaýǵa ıe bolyp jatqanyn aıtty. Úkimettiń ne­gizgi mindeti – taıaý keleshekte atalǵan min­det­terdi iske asyrý; óńirlerge bólinetin qara­jat­tardyń jetkilikti kólemin qamta­masyz etý; qajetti sheshimderdi jyldam qa­byldaý. Halyq búgin atalǵan tapsyr­ma­lar­dyń oryndalýyn kútpeýi kerek, halyq atqarylǵan jumystyń nátıjesin kórýi kerek.

Qazaqstan Prezıdenti Ákimshiliginiń basshysy Á.Isekeshev Memleket basshysy óz Joldaýynda Úkimet qyzmetiniń basty basymdyǵy retinde qazaqstandyqtardyń ál-aýqatyn anyqtaǵanyn eske saldy. Ol eki quramdy bólikten turady: halyq kirisiniń ósimi men áleýmettik qyzmetter sapasynan, ómir súrýge jaıly orta men qaýipsizdikten turatyn ómir sapasynyń artýy. Budan ózge, Pre­zı­dent qys mezgiline, egin jınaý naýqa­nyna, azyq-túlik ónimderi men kómir ba­ǵa­synyń negizsiz ósý jaǵdaıyna jáne qoǵam­dyq-saıası jaǵdaıdan kórinetin qazaq­stan­dyqtardyń kóńil kúıine qatysty basqa da máselelerdi baqylaýda ustaıtyn bolady. 

О́z kezeginde úkimet músheleri Mem­leket basshysy alǵa qoıǵan min­det­terdi iske asyrý jónindegi josparlary týraly baıandady.

Kirister deńgeıin  arttyrý

Eń aldymen halyq kirisiniń deńgeıin arttyrý sharalary qabyldanady. Má­se­len, 2019 jylǵy 1 qańtardan bastap eń tó­men jalaqy 1,5 esege arttyrylyp, 28 myń teńgeden 42,5 myń teńgeni quraıtyn bolady. Osynyń nátıjesinde 1,3 mln azamattyń eńbekaqysy ósedi. Budan ózge, 275 myń azamattyq qyzmetkerdiń eńbekaqysy orta eseppen 35%-ke arttyrylady. Bul bilim berý jáne densaýlyq saqtaý salasynyń qyzmetkerleri.

Eńbek jáne halyqty áleýmettik qorǵaý mınıstri Madına Ábilqasymova Memleket basshysynyń eń tómen jalaqy mólsherin 1,5 esege, 42,5 myń teńgege deıin arttyrý boıynsha tapsyrmasyn oryndaý maqsatynda 2019 jylǵy 1 qań­tar­dan bastap «2019-2021 jyldarǵa arnal­ǵan respýblıkalyq bıýdjet týraly» Za­ńynyń jobasyna tıisti ózgerister engiziletinin aıtty.

Budan ózge, eń tómengi jalaqynyń artýyna baılanysty jumyspen qamtylǵan halyqtyń salyq júktemesi azaıyp, barlyq jaldamaly jumyskerlerdiń tabysynan salyqtyq shegerimder ulǵaıady. 6 mln-nan astam jaldamaly qyzmetkerdiń salyq júktemesi tómendetiledi. Jalpy alǵanda, eń tómengi jalaqynyń ósýi ekonomıkanyń barlyq sektorlarynda tómen jalaqy alatyn 1,3 mln adamnyń eńbekaqysynyń ósýine ákeledi.

Bilim berý sapasy  

Prezıdent 5 jyl ishinde bilim, ǵylym, densaýlyq saqtaý salalaryna barlyq kózderden jumsalatyn qarajatty ishki jalpy ónimniń 7,4%-ten 10%-ke deıin jetkizý týraly mindet qoıdy. Budan ózge, pedagogterdiń mártebesin arttyrý, jańa mektepter salý, sondaı-aq, ýchaskelik medısına qyzmetkerleriniń eńbekaqysyn 20%-ke birtindep arttyrý, densaýlyq saqtaý salasyn sıfrlandyrý jáne As­ta­nada jańa ǵylymı onkologııalyq orta­lyqty salý sharalary qabyldanady.

Bilim jáne ǵylym mınıstri Erlan Sa­ǵadıev mektep jáne mektepke deıingi bi­lim berý sapasyn túbegeıli jaqsartý úshin mınıstrlik ákimdiktermen birlese oty­ryp, mektepke deıingi bilim beretin tár­bıe­shilerdiń biliktiligin arttyrý jáne biryń­ǵaı biliktilik talaptaryn engizýdi qam­tı­tyn Jol kartasyn daıyndaıtynyn aıtty.

«Mektepte bul is bastalyp ketti. Bıyl ulttyq biliktilik synaǵy engizildi. At­tes­tasııalaý nátıjesinde 34 myńnan astam mektep muǵalimi sáıkes biliktilik sanattaryna ıe boldy. Bul ustazdarǵa qosymsha tó­lem 2018 jyldyń 1 qyrkúıeginen bas­tap tólenip jatyr. Jalpy, qosymsha tó­lem muǵalim sanatyna qaraı 30%-ten 50% aralyǵynda ózgeredi», – dedi mınıstr.

Bilim berý salasy keste boıynsha halyqaralyq standarttarǵa kóship jatyr. 2019-2020 jyldary barlyq baǵalaý júıesi PISA, SAT, AST standarttaryna kóshirilmek.

Budan ózge, mektepterdegi oqýshy or­nynyń tapshylyǵyn azaıtý jumysy jal­ǵasyn tabady. Balalardyń qaýipsizdigin qam­tamasyz etý úshin mektepter men bala­baqshalardy 100% beınebaqylaý kameralarymen qamtý sharalary qolǵa alynady. Shamamen 4 myń beınebaqylaý kamerasy satyp alynbaq.

Memleket basshysynyń tapsyrmasyna sáıkes, «Pedagog mártebesi týraly» zań ázirlenedi. Zańda pedagogtyń áleý­mettik mártebesin kóteretin stımýl­dar, oqý júktemesin azaıtý, qajetsiz tek­seristerdi azaıtý máseleleri kórinis taba­dy. Sondaı-aq, E.Saǵadıev joǵary oqý oryn­darynda oqytý sapasyna qoıylatyn talaptar ári qaraı kúsheıetinin jetkizdi.

Medısınalyq qyzmet kórsetý 

Medısınalyq qyzmetterdi usynýdyń mańyzdy býyny – emhanalar men ambýlatorııalar deńgeıindegi alǵashqy kómek.

Densaýlyq saqtaý mınıstri Eljan Birtanov halyqqa medısınalyq qyz­met kórsetý sapasyn jaqsartý maq­satynda barlyq ýchaskelik medısına qyz­metkerleriniń jalaqysy satylaı 20%-ke artatynyn aıtty. Iаǵnı, bul – 10 myńnan asa ýchaskelik dáriger men 30 myń medbıkeniń jalaqysy jańa ádisterdi meńgerý deńgeıine qaraı kelesi jyldyń sońyna deıin ósedi degen sóz. Bul maqsatqa 5 mlrd teńge bólinedi. Bul medısınalyq kómektiń sapasyn jaqsartýǵa, negizgi aýrýlar kezinde asqynýlar men aýrýhanaǵa jatqyzý sanyn azaıtýǵa, sondaı-aq bala­lar men júkti áıelderge sapaly med­kómek kórsetýge múmkindik beredi.

Sonymen qatar, bıyl qaǵazsyz den­saýlyq saqtaý júıesine kóshý boıynsha pılottyq joba aıaqtalýda. Joba pı­lottyq uıymdardyń 92%-inde júzege as­ty. Memleket basshysynyń tapsyrmasyn iske asyrý aıasynda 2019 jyldyń 1 qańtarynan bastap barlyq emhanalar men aýrýhanalar tolyǵymen qaǵazsyz me­dı­sınalyq qujattarmen jumys isteıtin bolady. Budan basqa, 2020 jylǵa qaraı halyqtyń 100%-i elektrondy pasportpen qamtylady.

Memleket basshysynyń tapsyrmasy boıynsha Astanadaǵy Ulttyq ǵy­ly­mı onkologııalyq ortalyqtyń jańa tujy­rymdamasy ázirlendi. Ortalyq qury­lysy Astanadaǵy qoldanystaǵy medı­sınalyq klaster nysandarynyń birin­de turǵyzylmaq. Bul ortalyqty bola­shaqta Medısına mektebi men Nazarbaev ýnıversıtetiniń ǵylymı ortalyqtarymen ıntegrasııalaýǵa múmkindik beredi. Onda onkologııalyq aýrýlardy anyqtaý men emdeýge, onyń ishinde ıadrolyq medısınada, proton terapııasynda, radıohırýrgııada, jasýshalyq ımmýnoterapııada qoldanylatyn zamanaýı tehnologııanyń bári bolmaq. Qurylys jumystary bıyl bastalady.

Indýstrııalandyrýdyń jańa joldary

Úkimet uzaqmerzimdi perspektıvada IJО́ ósiminiń negizgi quramdas bóligi retinde shıkizattyq emes eksportty damytýǵa qosymsha yntalandyrýdy qamtamasyz etedi. О́ńdeý ónerkásibiniń eksportqa baǵyttalǵan tıimdi óndirýshilerin maqsatty qoldaýǵa kóshý júzege asyrylatyn bolady. Investısııalar jáne damý mınıstri Jeńis Qasymbek ekonomıkaǵa qosylǵan qundy odan ári ulǵaıtý, eksportqa baǵyttalǵan óndiristik prosesterdi arttyrý, adam áleýetin jáne ómir súrý sapasyn jaqsartyp, aımaqtyq jáne jahandyq turǵyda el ekonomıkasynyń ıntegrasııalanýy jaıly baıandady.

Indýstrııalandyrý jumysyn jandandyrý úshin qysqa jáne uzaq mer­zimdi jańa tásilder jasaldy. Taýarlardyń shyǵarylǵan qorjynyn odan ári «kúr­delendirý» jáne syrtqy naryqtarǵa shyǵý aýqymyn keńeıtý basty basymdyq bolmaq. О́nerkásipti «sıfrlyq dáýirge» daıyndaý úshin qajetti ınfraqurylym men standarttar, «modeldik zaýyttar» qurylady. О́nerkásipti sıfrlandyrý bizdiń kásiporyndardyń ónimdiligi men básekege qabilettiliginiń negizgi quraý­shy­larynyń biri bolady. Sondaı-aq, eksporttaýshylarǵa keshendi qarjylyq jáne jalpylaı qoldaý kórsetý isi ny­ǵaıady. Aldaǵy úsh jylda bul maqsatqa 500 mlrd teńge bólinedi.

Eksportty qoldaýdan kútiletin áser­ler arasynda: shıkizattyq emes eksport­tyń 2022 jylǵa deıin 1,5 ese ósýi, 2022 jyl­ǵa qaraı shıkizattyq emes eksporttyń IJО́-niń ósýine jyldyq úlesi 5 p.t. deıin ul­ǵaıa­dy, sondaı-aq eksportqa baǵyt­tal­ǵan ká­sip­oryndar sanynyń ósýi (450-ge deıin).

Sapaly jáne qoljetimdi turǵyn úı

Prezıdent Joldaýynda aıtylǵan tur­ǵyn úı qurylysyn damytýdy qol­daý týraly tapsyrmalaryn oryndaý kóp­tegen azamattarǵa ózderiniń ómir súrý jaǵ­daılaryn edáýir jaqsartýǵa jáne el ekonomıkasyn damy­tý­ǵa qosymsha serpin beredi. Bul – jańa ju­­mys oryndarynyń qurylýy jáne qury­lys salasynyń damýy, otandyq ındýs­trııa jáne tıisti salalardyń damýy (jı­haz, turmystyq tehnıka, jabdyqtar shyǵarý).

Sapaly jáne qoljetimdi turǵyn úı­men qamtamasyz etý maqsatynda «Nurly jer» memlekettik baǵdarlamasy aıasynda aldaǵy bes jylda 650 myńnan astam (76,6 mln sharshy m) turǵyn úı salý josparlanyp otyr. Bul – shamamen 2 mln adamdy turǵyn úımen qamtamasyz etedi.

Aldaǵy bes jylda «7 – 20 – 25» baǵ­dar­lamasy aıasynda shamamen 103 myń adam turǵyn úı ıesi atanýy múmkin. Osy baǵdarlama aıasynda ákimdikterge jer­gilikti bıýdjetten bastapqy jarnalardy ishinara sýbsıdııalaý mehanızmin ázirleý tapsyryldy. Iаǵnı, jas otbasylar men bıýd­jettik salanyń qyzmetkerlerine bas­tapqy jarnanyń jartysyn óteý úshin áleýmettik kómek kórsetiledi.

Budan basqa, «Turǵyn úı qurylys jı­naq banki» júıesi arqyly 71 myń áske­rı jáne quqyq qorǵaý organdary qyzmet­ker­lerin úımen qamtamasyz etýge arnaıy ıpotekalyq baǵdarlama iske qosyldy.

Mınıstr J.Qasymbektiń aıtýynsha, memlekettik qarajatqa 20 myń jalǵa beriletin jáne 56 myń nesıelik turǵyn úı salynady. Sonymen qatar, Mem­leket basshysynyń alǵa qoıǵan min­detterin júzege asyrý úshin Úkimet jal­­ǵa beriletin turǵyn úı qurylysyn qar­­jy­landyrýdy 25 mlrd teńgeden 35 mlrd teńgege deıin ulǵaıtady.

Bıznes jáne ınvestısııalyq ahýaldy jaqsartý

Úkimet Memleket basshysynyń bıznes-ortany jaqsartýǵa baılanysty tapsyrmalaryn tolyq ári ýaqytyly oryndaý jóninde sharalar qabyldaıdy. Ulttyq ekonomıka mınıstri Tımýr Súleımenov Úkimet otyrysy barysyn­da «Bıznestiń jol kartasy – 2020» mem­lekettik baǵdarlamasyn odan ári iske asyrý úshin jyl saıyn shaǵyn jáne orta bıznesti damytý aıasynda qosymsha 30 mlrd teńge qarastyrylatyn bolady dedi. Qazirge deıin 4 myń jobany qamtıtyn jańa pýl jasaldy. Sýbsıdııalar tikeleı «Damý» KDQ operatory arqyly beriletin bolady.

T.Súleımenovtyń aıtýynsha, báse­ke­lestikti damytý men monopolııaǵa qarsy jumys boıynsha TKSh turǵysynan usynystar Parlament qaraýynda jatqan (QR IDM zań jobasy) TKSh máseleleri jónindegi zań jobasy aıasynda iske asyrylady. UEM kóleńkeli aınalymdy joıýǵa qatysty ERP-júıelerdi jáne «keshbekterdi» paıdalaný, qolma-qol aqshasyz tólemderdi eskermeý boıynsha birqatar túzetýler ázirledi. Jyl sońyna deıin bıznes ortany damytý men saýda qyzmetin retteýdi jetildirý jónindegi zań jobasy aıasynda shaǵyn jáne orta bız­­nes úshin «salyq amnıstııasyn» júr­gizý boıynsha qajetti ózgerister eskeri­letin bolady.

Agroónerkásip keshenin órkendetý

Úkimet Memleket basshysynyń eńbek ónimdiligin jáne óńdelgen ónim eksportyn 2,5 esege arttyrý týraly tapsyrmalaryn oryndaý boıynsha jumystardy qolǵa aldy. Osylaısha, Agroónerkásiptik keshendi damytýdyń ózektendirilgen memlekettik baǵdarlamasy aıasynda salanyń básekege qabilettiligin arttyrý jáne ony tehnologııalyq qaıta jaraqtaý boıynsha qajetti sharalar qabyldanatyn bolady. Osy maqsattarǵa qosymsha jyl saıyn keminde 100 mlrd teńge bólinip otyrady, bul agroónerkásiptik keshen aldyna qoıylǵan mindetterdi tolyq iske asyrýǵa múmkindik beredi. Premer-Mınıstrdiń orynbasary-Aýyl sharýashylyǵy mınıstri О́mir­zaq Shókeev Memleket basshysynyń Jol­daýyndaǵy bastamalar memlekettiń agro­sektordaǵy rólin jańa sapaly deńgeıge shyǵaratynyn atap ótti.

«Búginde memleket tarapynan agrosektordy memlekettik qoldaý is júzinde bıýdjette qarastyrylǵan qar­jy­lardan turady – 240 mlrd teńge jáne kóktemgi egis jumystaryna – 60 mlrd teńge. Búgin Memleket basshysy Úkimetke jyl saıyn respýblıkalyq bıýdjetten 100 mlrd teńge jáne Ulttyq bankten bólinetin 600 mlrd teńgeden aýyl sharýashylyǵy kvotasyna 200 mlrd teńge bólýdi tapsyrdy. Iаǵnı, aýyl sharýashylyǵy salasyna kórsetiletin memlekettik qoldaý eki esege artýda», – dedi О́.Shókeev.

Agrarlyq ǵylym men bilimdi bız­nes­tiń qajettilikterine baǵyttaı otyryp, reformalaý jáne tehnologııalardy transfertteý sharalary qolǵa alyndy. Úsh baǵytta jumys istelip jatyr, olar – bilim, ǵylym jáne bilim taratý júıe­si. Agrarlyq bilim berýdiń sapasyn jaq­sartý maqsatynda úsh agrarlyq oqý or­ny bilikti mamandar daıarlaý isi­ne jumyl­dyrylyp jatyr. Olarǵa Nazar­baev Ýnıversıtetiniń úlgisimen álemdik ozyq joǵary oqý oryndarynyń standarttary engiziledi jáne sheteldik oqý oryndarynyń franshızalary tartylady. Nátıjesinde, AО́K sýbektilerin 1,5-2%-ten 20-25%-ke deıin qamtý kózdelgen.

О́ńirlerdi turaqty damytý

Memleket basshysy elimizdi aýmaqtyq damytýdyń jańa tásilderin engizýdi tapsyrdy.

Ulttyq ekonomıka mınıstri T.Súleı­menov atap ótkendeı, qazirgi ýaqytta mı­nıstrlik Ekonomıkalyq zertteýler ınstıtýtymen, sondaı-aq belgili ǵalymdar tobymen birlesip, álemdik tájirıbeni zerdeleı otyryp, elimizdiń aýmaqtyq-keńistiktik uıymdastyrylýyn jetildirý jóninde taldamalyq zertteý júrgizip jatyr.

Atalǵan zertteý elimizdiń 2030 jylǵa deıingi aýmaqtyq-keńistiktik damýynyń jańa boljamdy shemasyn ázirleýge negiz bolmaq. Ol 2019 jylǵy 1 qyrkúıekke deıin Prezıdent Ákimshiliginiń qaraýyna jiberiletin bolady. Boljamdy shemany sapaly iske asyrý úshin 2019 jylǵy 1 qarashaǵa deıin О́ńirlerdi damytýdyń 2025 jylǵa deıingi jańa baǵdarlamasy ázirlenedi.

Memleket basshysynyń tapsyrmalaryn eskere otyryp, jergilikti ın­fra­qu­rylymdy damytý basymdyq bolmaq: ener­gııamen jabdyqtaý, sýmen jabdyqtaý jáne sý tartý, jergilikti joldar. 2018 jy­ly respýblıkalyq bıýdjetten osy maqsat­tarǵa 332 mlrd teńge bólindi. О́ńir­lerdi damytý baǵdarlamasyn júzege asyrý nátıjesinde qalalarda ortalyq­tandyrylǵan sýmen jabdyqtaý – 100%, aýyldardaǵy ortalyqtandyrylǵan sýmen jabdyqtaý – 80%-ti quraıtyn bolady.

Aýmaqtyq damýdyń jańa tásilderi qa­lalar men shalǵaı aýdandardaǵy ómir sú­rý sapasyn arttyrady, sondaı-aq óńir­­­lik ekonomıkanyń damýyn yntalandyrady.

Prezıdenttiń tapsyrmalaryn qarjylyq qamtamasyz etý

Ulttyq ekonomıka mınıstri T.Sú­leımenov Ulttyq ekonomıka mınıs­tr­liginde Joldaýda aıtylǵan mindetterdi oryn­daýǵa qajetti, ony is júzinde júze­ge asyrýdyń, qarjylyq qamtamasyz etý­diń tetikteri jáne zańnamalyq shara­lar­ǵa qa­tys­ty naqty jospary bar eke­nin atap ótti. So­ǵan oraı, Memleket basshy­sy­­nyń Jol­daýyn iske asyrý jónin­degi jal­py­ult­tyq jospardy ázirleý jumystary bastaldy.

О́z kezeginde qarjy mınıstri Álıhan Smaıylov bilim berý men densaýlyq saq­taý salalaryn osy salalarda shy­ǵyn­dar­dyń tıimdiligin arttyrýǵa basa kóńil bóle otyryp, memlekettik qoldaýdy keńeıtý boıynsha jumystar jalǵasatynyn aıtty. Eń tómengi jalaqy kólemin ósirýdi iske asyrýǵa jyl saıyn 96,3 mlrd teńge baǵyttalatyn bolady. Onyń ishinde 85,8 mlrd teńge tikeleı 275 myń azamattyq qyz­metkerdiń jalaqysyn kóterýge jum­salady. Al 10,4 mlrd teńgesi – salyq­tyq shegerýlerdiń artýyna baılanysty óńirlerdiń tabys bóliginiń shyǵyndarynyń ornyn toltyrýǵa baǵyttalady. Olar JAO-ǵa maqsatty transfertter túrinde jetkiziledi. Nátı­je­sinde, jalpy ekonomıka boıynsha jalaqyny ósirýmen 1,3 mln adam qam­tylady. О́ńdeý ónerkásibi men eksportty qosymsha qarjylandyrý 500 mlrd teń­ge kóleminde iske asyrylady. ShOB-ty damytýdy memlekettik qarjylyq qol­daýdyń jalpy kólemi 2019-2021 jj. 206,4 mlrd teńgeni quraıdy.

«Úsh jyldyq bıýdjet aıasynda bilimge jumsalatyn shyǵyndardy bıyl 456,3 mlrd teńgeden 2021 jyly 752,1 mlrd teńgege deıin nemese 65%-ke arttyrý jos­parlanyp otyr. Osy kezeńde densaýlyq saqtaýǵa jumsalatyn shyǵyndardy 24%-ke, 1076,2 mlrd teńgeden 1339,1 mlrd teń­gege deıin ósirý kózdelgen», – dedi Á.Smaıylov.

Memleket basshysynyń salyq zań­na­masynyń buzylýy jónindegi qylmystyq jaýapkershiliktiń qoldanylý shegi bo­ıynsha tapsyrmasyn oryndaý úshin Qylmystyq kodekstiń 3-babyna zańdy tulǵalardyń bıýdjetke 20 000 AEK (48,1 mln teńge) bastap 50 000 AEK (120,2 mln teńge) deıingi kólemdegi salyqty jáne basqa da mindetti tólemderdi tóleýden jaltarýynan bolǵan zardaptyń shekti deńgeıin kóterý boıynsha ózgerister engiziletin bolady. Qarjy mınıstri atap ótkendeı, salyq amnıstııasy boıynsha Memleket basshysy 01.01.2019 j. bastap shaǵyn jáne orta bıznes úshin «salyq amnıstııasyn» júrgizýge kirisýdi tapsyrdy.

Osylaısha, Memleket basshy­sy­nyń tapsyrmalaryn oryndaýdy qar­jylaı qamtamasyz etýge bıýdjettik múm­kin­dikter esepteldi. Shyǵystardyń basqa baǵyttaryn jáne buǵan deıin qabyl­danǵan memlekettik mindettemelerdi ońtaı­landyrý qajet emes. Aldaǵy úsh jyl­da 1 trıllıon 226 mlrd teńge qara­jat baǵyttalady.

Ulttyq bank tóraǵasy Danııar Aqyshev óz baıandamasynda Ulttyq banktiń búgin el Prezıdentiniń Joldaýynda aıtylǵan barlyq tapsyrmalardy oryndaıtynyna sendirdi.

«In­flıa­sııanyń tómendeýi – bul nesıe boıyn­sha mólsherlemelerdi tó­men­detý, halyq­tyń naqty tabysyn kóte­rý jáne eko­nomıkadaǵy barlyq shyǵyn­dardy tómen­detý úshin basty faktor. Úkimettiń, Ult­tyq bank pen jergilikti atqarýshy organdardyń birlesken jumysy bıyl ınflıasııany belgilengen maqsatty dálizde ustap turýǵa múmkindik beredi dep sanaımyz», – dedi D.Aqyshev.

Otyrys barysynda Ishki ister mı­nıstri Qalmuhanbet Qasymov IIM júıe­sin reformalaý josparlary týraly baıan­dady.

«Jeke quramnyń shtat sany qaıta qaralatyn bolady, olardy 10%-ke qys­qar­týdy josparlap otyrmyz, bul shamamen 9000 polısııa jáne 1600 – QAJK. Bıýd­jet qarajatynyń qalyptasqan úne­min qyzmetkerlerdiń laýazymdyq jala­qy­laryn arttyrýǵa paıdalanamyz», – dedi Q.Qasymov. Ishki ister mınıstriniń aıtýynsha, sondaı-aq jol-patrýldik polı­sııa­synyń saptyq bólinisteri qyzmet­kerleriniń, ýchaskelik polısııa ınspek­torlarynyń jáne kámeletke tolmaǵan­dar isteri jónindegi ýchaskelik ınspek­tor­lardyń turǵyn úıdi jalǵa alýy úshin ótemaqy tóleýdi qarastyrý qajet.

Budan ózge, reformalaý aıasynda: IIM-di ózine tán emes fýnksııalardan bosatý, qylmystyq-atqarý júıesin jańǵyrtý, azamattyq qorǵaý organdary qurylymyn jetildirý boıynsha sharalardy iske asyrý kózdelgen. Bul jerde memlekettik mekemelerdiń sanyn 54-ten 20-ǵa deıin oń­taı­landyrý josparda bar. Sapany art­tyrý maqsatynda vedomstvolyq bilim berý júıesin reformalaý jáne kadr­lardy irikteý júıesin qaıta qaraý josparlanǵan.

Máseleni qaraý qorytyndysy boıyn­sha Premer-Mınıstr Baqytjan Saǵyntaev birqatar naqty tapsyrmalar berdi. Osylaısha, Joldaýdyń barlyq baǵyttary boıynsha is-sharalardyń jal­py ulttyq jospary daıyndalady. Ulttyq ekonomıka mınıstrligine Úki­metke Elbasy Joldaýyn iske asyrý jó­nin­degi jalpy ulttyq is-qımyl josparyn bekitý týraly tıisti qaýly jobasyn engizý tapsyryldy. Prezıdenttiń ár­bir tapsyrmasyna jekeleı jetekshi taǵaı­yn­dalýy kerek, ony iske asyrýdyń naqty merzimi belgilenip, qatań baqylaý jasalýy kerek.

Endi Memleket basshysynyń Jo­l­daýyn óńirlerde túsindirý jumystary bas­talady. Budan ózge, 20 qazanǵa deıin Joldaýdy aqparattyq qoldaý maq­satynda Úkimet músheleriniń basshy­ly­ǵymen memlekettik organdardyń jáne túrli uıymdardyń ókilderinen tura­tyn respýblıkalyq aqparattyq toptar­dyń saparlary josparlanyp otyr. Ákimder aqparattyq toptarmen kezdesý­lerdi ótkizýge daıyndyq júrgizýi kerek. Aqparat jáne kommýnıkasııalar mı­nıstrligine jergilikti atqarýshy organdarmen birlese otyryp, ortalyq jáne óńirlik buqaralyq aqparat quraldarynda Joldaýǵa qatysty aqparattardy jarııalaý tapsyryldy.

«Adamdar Memleket basshysynyń alǵa qoıǵan árbir tapsyrmasynyń mańyz­dylyǵyn jáne ony iske asyrý kezeń­derin túsinýi kerek», – dedi B.Saǵyntaev.