Atyraý qalasynyń qurylǵanyna 378 jyl tolýyna arnalǵan sharalar legi bastaldy, dep habarlaıdy Atyraý qalasy ákimdiginiń baspasóz qyzmeti.
Merekelik sharalar búgin ertemen bastaldy. Ashyq velojarysqa eki myńǵa jýyq adam qatysty. Júldegerler bes atalym boıynsha marapattaldy.
-Qalalyq velojarystar ótken saıyn qatysýǵa nıettilerdiń kóbeıip kele jatqany jáne tek atyraýlyqtar men elimizdiń basqa óńirlerinen ǵana emes, shetelderden de osy sharaǵa arnaıy kelip qatysýshylardyń bary bizdi qýantady. Mysaly, búgin velojarysqa Ázerbaıjannan kelgen týrıst qatysty, ol TMD, AQSh, Afrıka elderin jaıaý aralap, 10 myń shaqyrymdy baǵyndyrǵan, - deıdi qalalyq sport jáne dene tárbıesi bóliminiń basshysy Rınat Ibragımov.
Sultan Beıbarys alańynda sándik-qoldanbaly buıymdar kórmesi, jergilikti shyǵarmashylyq ujymdar konserti, ulttyq sport túrlerinen ashyq týrnır uıymdastyryldy. Oblystyq ákimdik aldyndaǵy pırs aýmaǵynda baıdarka men kanoede eskek esýden qalalyq týrnır ótti. Merekeni atap ótý barysynda Atyraýda qala turǵyndaryna arnalyp uzyndyǵy 10 m, eni 80 sm tort pisirildi.
-Búgin Atyraý kezekti jasyn toılap jatyr. Shahar kún sanap kórkeıip, jańa sáýletke ıe bolyp keledi. Qazir oblys ortalyǵynda kóptegen jańa jobalar júzege asyrylyp jatyr, sol arqyly qalamyzdyń sáni kirip, taza, qolaıly bolyp keledi. Barshańyzǵa densaýlyq, otbasylaryńyzǵa baqyt pen bereke tileımin, - dedi qala ákimi Alımuhammed Kuttumuratuly.
Atyraý qalasynyń kúnin atap ótý barysynda Nursaıa yqshamaýdanynda 800 oryndyq jabyq akvapark ashyldy. Jańa oıyn-saýyq oryny zamanaýı standarttarǵa negizdelgen, munda ár aýysymda 18 qutqarýshy kezekshi bolady.
Merekelik shara 19.00-de Sultan Beıbarys alańynda qazaqstandyq jáne reseılik estrada juldyzdarynyń qatysýymen ótetin gala-konsertpen aıaqtalady.
23.00-de mereke qonaqtarynyń qurmetine mýzykalyq otshashý bolady.