Keshe AQSh-tyń Las-Vegas qalasynda búkil álem jurtshylyǵy taǵatsyzdana kútken reseılik Habıb Nýrmagomedov pen ırlandııalyq Konor Makgregor arasyndaǵy jyl jekpe-jegine balanǵan UFC 229 týrnıri ótti.
Mamandar tarapynan jyl jekpe-jegi dep baǵalanǵan UFC keshinde reseılik Habıb Nýrmagomedovtiń mereıi ústem boldy. Bes raýndqa sozylǵan kezdesýdiń 4-raýndynda Habıb qarsylasyn qylqyndyrý ádisimen jeńdi. Bir qyzyǵy, Makgregor Nýrmagomedovtiń kúres ádisine salyp aıqasatynyn bile tura, oǵan qarsy eshqandaı aıla oılap taba almady. Tipti ara qashyqtyqty da saqtaǵan joq. Jáne ol Nýrmagomedovten aýyr soqqy alamyn dep esh oılamaǵan syńaıly. Konor dál osy ádiske aıla taba almaǵanynyń saldarynan jeńilip qaldy deýge tolyq negiz bar. Habıb bolsa bar múmkindikti tıimdi paıdalana bildi.
UFC 229 sportynan Habıb pen Konor arasynda chempıondyq jekpe-jek ótedi degen sátten bastap jankúıerler bul kezdesýdi taǵatsyzdana kútti. Tipti ırlandııalyq faıter baspasóz máslıhatynda qarsylasyna túrli sóz aıtyp, balaǵattap baıaǵy ádetine basty. Bul onyń kórermenderdiń delebesin qozdyryp, jekpe-jekke degen qyzyǵýshylyǵyn shama kelgenshe odan ári oıatý bolatyn.
Jekpe-jektiń qyzyǵy kezdesý aldynda emes, kezdesý ýaqytynda emes, aıqastyń sońynda boldy. Qazaqta «Toıdyń bolǵanynan boladysy qyzyq» degen sózdi UFC sportyna oraılastyryp, «bul jekpe-jektiń bolǵanynan bitkennen keıingisi qyzyq» boldy dep aıtsaq esh sókettigi joq shyǵar. Habıb Nýrmagomedov jeńisinen keıin sabyr saqtaı almaı, oktagon syrtynda otyrǵan Konordyń komandasyndaǵy bir ókilmen de az-kem aıqasyp qaldy. Al oktagonnyń ishinde Nýrmagomedov komandasynyń ókilderi Makgregorge bir-eki soqqy jasap úlgerdi.
Osyndaı tártipsizdikten soń UFC prezıdenti Dana Ýaıt eki sportshyny da oktagonnan shyǵaryp jiberdi. Nýrmagomedov «men jeńiske jettim, maǵan chempıondyq beldigimdi berińder» dep ýáj aıtqanymen, Ýaıt oǵan segiz buryshtan beldiksiz shyǵatynyn myqtap túsindirgen soń ǵana reseılik sportshy alańdy bosatýǵa májbúr boldy. Jyl jekpe-jegine balanǵan aıqas tóbelespen aıaqtaldy. Mamandardyń aıtýynsha, bul kezdesý munymen bitken joq, jankúıerlerdi alda ekinshi jekpe-jek kútip turǵanyn aıtady.
Álı BITО́RE,
«Egemen Qazaqstan»