Qaraǵandydaǵy Abaı atyndaǵy oblystyq balalar kitaphanasynda «Kitap. Jańa format» býktreıler jáne «Týǵan ólkemdi maqtan tutamyn!» atty esse saıystarynyń qorytyndysy shyǵaryldy.
Atalǵan baıqaýda oblystyń kitaphanashylary men kitaphana oqyrmandary baq synady. «Býktreıler» degen tańsyq sózdiń maǵynasy mynadaı: ol – kitap jaıly kórkem tilde baıandaıtyn qysqasha beınebaıan.
– Býktreılerler saıysyna eki nomınasııa boıynsha 20 jumys usynyldy. Barlyq jumastar «Vkontakte» áleýmettik jelisinde jarııalanyp, sol jerde olarǵa daýys berildi. Al «Týǵan ólkemdi maqtan tutam!» atty esse saıysyna barlyǵy 39 jumys kelip tústi, – dedi Abaı atyndaǵy kitaphananyń ádiskeri Sáýle Júsipova.
Sonymen, býktreılerler báıgesinde «Bas almaı oqıtyn kitap» atalymy boıynsha Sátbaev qalasynan kelgen Arýjan Aıapova birinshi júldeni jeńip aldy. Segiz jasar Arýjan qazylar alqasynyń talqysyna «Moı lıýbımyı poet ı ego proızvedenııa: A.S. Pýshkın» atty týyndysyn usynǵan bolatyn.
Sonymen qatar, bul atalymda qazylar alqasy Buqar jyraý aýdanynan kelip qatysqan 15 jasar Nurlybek Tókenovtiń jumysyna da joǵary baǵa berdi. Ol Ilııas Esenberlınniń «Kóshpendiler» kitabyna býktreıler jasaǵan bolatyn.
«Qazaqstannyń 2018 jylǵy mereıtoıly kitaby» atalymy boıynsha birinshi júldege Qarqaraly aýdanyndaǵy Appaz aýlynyń kitaphanashysy Baqytgúl Kákimova ıe boldy. Qazylar alqasy Baqytgúldiń jazýshy Berdibek Soqpaqbaevtyń «Meniń atym Qoja» kitabyna jasaǵan býktreıler jumysyn úzdik dep tanydy. Sondaı-aq, osy atalymdaǵy onlaın daýys berý nátıjesinde Qarajal qalasynyń turǵyny Tórehan Bıken jeńimpaz atanyp, oǵan kórermen kózaıymy syılyǵy tabys etildi. 13 jasar jeńimpazdyń Aleksandr Dıýmanyń «Úsh noıan» kitaby boıynsha jasaǵan býktreıleri 611 daýys jınady.
Al «Týǵan ólkemdi maqtan tutam!» dep atalǵan esse saıysynda Buqar jyraý aýadynynyń Ǵ. Mustafın aýyly atynan qatysqan Iýlııa Iаkýsheva úzdik shyqty.
Saıystardy uıymdastyrýshy – bıyl óziniń 65 jyldyq mereıtoıyn atap ótken Abaı atyndaǵy oblystyq balalar kitaphanasy jeńimpazdar men júldegerlerdi dıplomdarmen jáne estelik syılyqtarmen marapattady.
Qaırat ÁBILDA,
«Egemen Qazaqstan»
QARAǴANDY