Eki myń jyldyq tarıhy bar Taraz topyraǵynda «Taraz – Aspara fashion week» halyqaralyq sán aptalyǵy bastaldy. Qazaqstandaǵy О́zbekstan jyly aıasynda Jambyl oblysy ákimdiginiń jáne «Asyl Dızaın» sán úıiniń birlese uıymdastyrýymen «Araı Plaza» kesheninde ótken saltanatty sharaǵa Memlekettik hatshy, Qazaqstan Respýblıkasy Prezıdentiniń janyndaǵy Áıelder isteri jáne otbasylyq demografııalyq saıasat jónindegi komıssııanyń tóraıymy Gúlshara Ábdiqalyqova qatysty.
Gúlshara Naýshaqyzy álemniń Italııa, Úndistan, Gollandııa, Qytaı, Fransııa, Reseı sekildi 19 memleketinen kelgen qonaqtardy saltanatty sharanyń ashylýymen quttyqtap, olardyń jumystaryna sáttilik tiledi. Tarıhymyzdyń temirqazyǵy bolyp sanalatyn Taraz qalasynda osyndaı sharanyń ótip otyrǵanyna qýanyshty ekenin jetkizdi. Budan keıin О́zbekstan Respýblıkasy Áıelder komıteti tóraǵasynyń orynbasary Mýkarram Nýrmatova áýeli tarazdyqtarǵa ózbek halqynyń ystyq sálemin jetkizdi. Qazaq elinde ótip jatqan sán aptalyǵynyń mańyzdylyǵyna toqtalyp, búgingi tańda qazaq pen ózbek halyqtary arasyndaǵy dostyq baılanystyń joǵary deńgeıde ekenin atap ótti. Al óz sózinde Jambyl oblysynyń ákimi Asqar Myrzahmetov ejelden Taraz tarıhı qala ekenin aıta kelip, baı mádenıetimiz ben tarıhymyzdy tamashalaýǵa kelgen sheteldik azamattarǵa alǵysyn bildirdi. Sonymen qatar tarazdyq dızaınerlerdiń qazaq eline ǵana emes, birqatar shetelderge de tanymal ekenin, sondyqtan da búgingi saltanatty sharanyń joǵary deńgeıde ótetindigine senetindigin jetkizdi.
Budan keıin jýyrda ǵana Italııa memleketiniń Mılan qalasynda óner kórsetip, qazaq sán úlgisin álemge tanytyp qaıtqan jergilikti dızaıner Aıdarhan Qalıevtiń «Taraz perishteleri» sán úlgileri kópshilikke kórsetildi. Shyǵystyq úlgide sahnalanǵan bul kórinisti álemniń kóptegen elinen kelgen sángerler qyzyǵa tamashalady. Sonymen qatar Taraz tarıhyna qatysty da málimetterge qanyqty.
Jalpy, Taraz óńirinde alǵash ret uıymdastyrylyp otyrǵan «Taraz – Aspara fashion week» halyqaralyq sán aptalyǵy qazan aıynyń 8-12-si aralyǵynda Jambyl oblysynyń aýmaǵynda ótedi. Bul oraıda álemniń 19 memleketinen kelgen 30 sán dızaıneri Áýlıeata óńirinde óz sheberlikterin ortaǵa salady. Sonymen qatar jambyldyq 55 qolóner sheberiniń eńbekteri de shetelden kelgen qonaqtardyń nazaryna usynylady. Bul kórmede áýlıeatalyqtar álemdik deńgeıdegi sán úlgisinen habardar bolyp qana qoımaı, ózderiniń qoldan jasaǵan túrli buıymdaryn da sheteldikterge jarnamalaı alady. Budan bólek, sheteldik týrıster Taraz qalasyndaǵy birneshe nysanmen qatar, Aqyrtas kesheninde jáne Aısha bıbi kesenesinde bolady. Olar jalpy óńirdegi 11 tarıhı oryndy aralap, ult tarıhymen de keńinen tanysady. Aptalyq barysynda halyqaralyq deńgeıdegi 7, respýblıkalyq deńgeıdegi 5 memorandýmǵa qol qoıylady dep kútilýde.
Jambyl oblystyq týrızm basqarmasynyń basshysy Qarlyǵash Aralbekovanyń aıtýynsha, osy ýaqyt aralyǵynda sheteldik qonaqtar Áýlıeata óńiriniń tarıhı jerlerine saıahat jasap qana qoımaı, «Tórtkúl» kesheninde qazaqtyń ulttyq taǵamdarymen de tanysady.
Atalǵan sán aptalyǵynyń ashylý saltanaty joǵary deńgeıde ótti. Munda О́zbekstan memleketinen kelgen dızaınerlerdiń úlgileri kópshilik nazaryna usynyldy. Bul oraıda ózbek elinen kelgen dızaıner Sabına Abdýnazarova Taraz topyraǵyna kelip, osyndaı sharaǵa qatysqanyna qýanyshty ekenin jetkizdi. Sonymen qatar aldaǵy ýaqyttarda da sán aptalyǵy qazaq jerinde ótip tursa degen tilegin aıtty. Aıta keteıik, Taraz qalasynda tuńǵysh ret uıymdastyrylyp otyrǵan saltanatty shara endi jyl saıyn jalǵasyn tabatyn bolady.
Hamıt Esaman,
«Egemen Qazaqstan»
Jambyl oblysy