Soltústik óńirde kirpigi ǵana qımyldaıtyn qazaq tiliniń alpys eki tamyryna qan endi júgirýi tıisti. Oblys ákimi Málik Myrzalınniń tapsyrmasymen orys tilinde bilim beretin mektepterdegi qazaq tili pániniń muǵalimderi arasynda «Úzdik qazaq tili páni muǵalimi» baıqaýy jarııalandy.
Buryn orys tilinde bilim beretin mektepterdegi qazaq tiliniń qanshalyqty deńgeıde oqytylyp jatqandyǵyna kóńil bóline bermeıtin. Budan bylaıǵy arada muǵalimderdiń de ynta-yqylasy artyp, tilimizdiń tuǵyry bıikteı me degen úmit bar. Taıaýda orys tilinde bilim beretin bilim oshaqtarynda qazaq tilin oqytyp júrgen ustazdar arasynda oblystyq baıqaý ótkizildi. Bul eń aldymen el ishinde jaǵymdy jańalyq retinde atalyp jatyr. Ustazdar arasynda ońdy úrdisti óristetý – eń addymen tilge degen jandy janashyrlyq. Alǵashqy dodaǵa 15 muǵalim qatysyp, óz boılaryndaǵy bilim men bilikti sarapqa salyp, tájirıbelerimen bólisti.
Bas júldeni Býrabaı aýdanyndaǵy Zelenobor mektep-gımnazııasynyń qazaq tili men ádebıeti pániniń muǵalimi Damır Suraǵanov jeńip aldy. Birinshi dárejeli dıplom Jaqsy aýdanyndaǵy Q.О́skenbaev atyndaǵy Qıma orta mektebiniń muǵalimi Janargúl Alshynbaevaǵa buıyrdy.
Oblys ákimi Málik Myrzalınniń qatysýymen ótken saltanatty is-sharada jeńimpazdarǵa syı-sııapat kórsetildi. Bas júldege 600 myń, birinshi orynǵa 400 myń teńge berildi. Ekinshi, úshinshi oryn alǵandar da quralaqan qalǵan joq.
Osy bir ıgilikti sharadan keıin muǵalimderdiń boıynda qulshynys paıda boldy. Baıqaýdan soń ustazdar da, bylaıǵy jurtshylyq ta ana tilimizdiń abyroıy asatynyna bek senimdi bolyp tarasty.
Baıqal BAIÁDIL,
«Egemen Qazaqstan»