Elimizdegi baıyrǵy oqý orny Abaı atyndaǵy Qazaq ulttyq pedagogıkalyq ýnıversıteti búginde iri ǵylymı jáne bilim berý ortalyǵy dárejesine jetken.
О́ziniń 90 jyldyq tarıhynda pedagog mamandardy daıarlaý isiniń ozyq jetistikteri men zamanaýı bilim berý úlgilerin ıgergen oqý orny jahandyq bilim berý keńistiginde joǵary deńgeıdegi ýnıversıtetter qatarynda atalady. Jaqynda mereıtoıyn saltanatty jaǵdaıda atap ótken ýnıversıtet ujymy básekege qabiletti mamandar daıarlaý salasyndaǵy ozyq jetistikterin úlgi ete otyryp, taǵy bir erekshe kezeńge qadam basty.
Saltanatty jıynǵa Qazaqstan Respýblıkasynyń Memlekettik hatshysy Gúlshara Ábdiqalyqova qatysyp, Prezıdent Nursultan Nazarbaevtyń arnaıy quttyqtaýyn oqydy. Otandyq joǵary bilim berý júıesiniń qara shańyraǵy Abaı atyndaǵy Qazaq ulttyq pedagogıkalyq ýnıversıtetiniń tarıhy elimizdegi jalǵyz pedagogıkalyq fakýltetten bastaý alyp, jetekshi oqý ornyna aınalyp otyr. Oqý ornynyń qalyptasýynda belgili ult qaıratkerleri Ahmet Baıtursynov, Halel Dosmuhamedov, Sáken Seıfýllın, Temirbek Júrgenov jáne kóptegen kórnekti tulǵalardyń qosqan úlesi zor. Búginde ýnıversıtette Qazaqstannyń qaryshty damýyna qajetti mamandar daıarlaıtyn 14 akademık, 155 ǵylym doktory jáne 380 ǵylym kandıdaty sabaq berip keledi.
Shara aıasynda QR Bilim jáne ǵylym mınıstri Erlan Saǵadıevtiń quttyqtaýyn vıse-mınıstr Elmıra Sýhanberdıeva oqyp, merekelik sharaǵa tilegin bildirdi. Al óz kezeginde Fransııanyń Qazaqstandaǵy Tótenshe jáne О́kiletti Elshisi Fılıpp Martıne sóz sóılep, ýnıversıtet ujymyna jetistikter tiledi.
Rektor Takır Balyqbaev mereıtoılyq is-sharanyń mańyzdylyǵyna toqtala kele, Qazaqstannyń pedagogıka salasyndaǵy jetekshi ǵylymı jáne bilim berý ortalyǵy retindegi Abaı atyndaǵy Qazaq ulttyq pedagogıkalyq ýnıversıtetiniń jyl saıyǵy álemdik jáne ulttyq reıtınggi týraly atap ótti. Bıylǵy jyly QS World University Rankings reıtıngsiniń qorytyndysyna sáıkes Abaı atyndaǵy QazUPÝ álemniń úzdik ýnıversıtetteri arasynda 481-shi orynǵa kóterilse, Emerging Europe jáne Central Asia arnaıy reıtınginde Eýropanyń jáne Ortalyq Azııanyń 30 elindegi 200 joǵary oqý oryndary arasynda 86 oryndy ıelengen. Qazirgi ýaqytta ýnıversıtet álemniń 25 elindegi 130 joǵary oqý ornymen ǵylymı jáne akademııalyq baılanys ornatyp, halyqaralyq yntymaqtastyq aıasyn keńeıtip keledi.
Ulttyq ýnıversıtettiń mereıtoılyq saltanatyna QR Parlament Senatynyń depýtaty Dınar Núketaeva, ǵalym, qoǵam qaıratkeri Shámshá Berkimbaeva, QR Bilim jáne ǵylym mınıstrliginiń ókilderi, Ulttyq ǵylym akademııasy jáne shetelden kelgen ǵalymdar qatysty.
Ýnıversıtettiń mereıtoıy aıasynda sheteldik áriptesterdiń qatysýymen birqatar mańyzdy sharalar ótti. Fransııanyń 8 ýnıversıtetimen memorandýmǵa qol qoıylýy oqý orny tarıhyndaǵy mańyzdy is-sharalardyń birine aınaldy.
Mereıtoı aıasynda ýnıversıtettiń tarıhy men jetistikteri týraly derekti fılm kórsetilip, qazaq estrada ánshileriniń qatysýymen merekelik konsert qoıyldy.
Elvıra SERIKQYZY,
«Egemen Qazaqstan»
ALMATY