Meıirim

Elimizde qazir jalǵyzbasty analardyń sany – 444 myń 800 bolsa, nekesiz týyl­ǵan sábılerdiń sany da 352 myńnan asyp jyǵylady eken. О́tkende Reseı telear­na­larynyń birinde jasandy túsik tastaý jaıynda ótikizilgen tok-shoý baǵdarla­ma­synda pravoslavıelik bir dindar ákeı: «Qoǵamdaǵy osy problemany aldymen erkekterdiń problemasy dep qaraǵan jón. Eger erler ózderiniń ákelik jaýapkershiligin sezingende bul áńgime týmas edi», dep bizdińshe durys bir oıdyń ushyǵyn shyǵardy. Shynynda jetimder sanynyń artýyna, tastandy balalardyń kóbeıýine tek áıelder kináli me?! «Meıirimdilik – mahabbat, qaıyrym­dylyq, adaldyq sekildi aq júrekten shy­ǵa­dy», deıdi danyshpan Shákárim. О́zgeniń muńyna jan aýyryp, qysylǵanda qol­ushyn berip, jan jylylyǵyn sebe bilý ekiniń biriniń mańdaıyna jazylmaıtyn qasıet pe dep qalamyn keıde. О́ıtkeni, ózi úshin emes, tipti otbasyna, týǵan-týys­taryna esh qatysy joq, áıteýir qaımana bir qazaq balasy úshin tynym kórmeı, sol úshin kóshedegi adamdardy toqtatyp, ókimettiń, qoǵamdyq uıymdardyń esigin qaǵyp, keńse jaǵalap, zyr júgirip júrýdi ekiniń biri jasamaıtyny anyq. Bir kúni ápkem ekeýmiz bazarǵa bardyq. Balalardyń oıynshyǵy satylyp jatqan tusqa aıaldap edik, bir jigit aǵasy bolyp qalǵan azamat sypaıy túrde: «Keshiri­ńiz­der, maǵan sál ǵana, ári ketse bes mınótke ýaqyt­taryńyzdy qııasyzdar ma?»–deıdi qıylyp. Mundaıda kóshede júrseń aıa­ǵy­ńa oralyp, jyp-jyly sóılep, qolyndaǵy kitabyn tyqqyshtaıtyn mıssıonerlerdiń biri me dep tiksinip te qalasyń ǵoı. Joq, ondaı emes, túr-basyna qarasańyz jón­dem adam tárizdi. Toqtadyq. «Keshiri­ńiz­der, balalar­dyń oıynshyqtaryn qarap jatyrsyzdar ǵoı, sondyqtan da sizderge bóbekter ja­ıyn­da birer aýyz sóz aıtsam dep edim». Esimin Júzbaı degen azamat jónin aıtty. Osy Astanadaǵy «Mıras A» qaıy­rymdylyq qorynan eken. «Biz qalalyq densaýlyq saqtaý departamentimen kelisip, osyndaǵy 3 perzenthanamen jumys isteımiz. Ondaǵymyz, perzenthanada bala­syn tastaımyn degen qyzdarmen sóılesip, balalaryn tastatqyzbaı, baratyn jerleri joq bolsa shyǵaryp alyp, arnaıy orta­lyǵymyzǵa ákelemiz, olardyń jigitterin taýyp alyp sóılesemiz, ata-analarymen kezdestiremiz. Tipti, bizdiń aralasýy­myz­ben balalarynyń ákesine qosylyp, kádimgideı otbasyn quryp jatqandar bar. Búginge deıin 37 qyzdy shyǵaryp alyp, otandaryna qostyq. Qazirgi kúni orta­ly­ǵy­myzda 8 qyz bar», – dedi bizdi toqtatqan azamat. Endi saýaldy biz qoıýǵa kóshtik. «Du­rys eken, sonda bizden sizge qandaı kómek qajet, ortalyqta qyzdar qansha ýaqyt turady, barlyǵy da qazaqtyń qyzdary ma?» – degen tárizdi saýaldardyń astyna aldyq. Álgi azamat olardyń bar­lyǵyna jaýap berip jatyr. Men ózimniń jýrnalıst ekenimdi, keıinirek kelsem, orta­lyq­tyń jumysymen tanyssam degen oıymdy aıttym. Kelistik. Ýádelesken kúni «Mıras» qaıyrymdylyq qory oryn tepken keńsege keldim. – Mundaı qor qurý ıdeıasy qaıdan shyqty? Jalpy, ózderińizdiń jumys­tary­ńyz jaıynda keńirek aıtyp berseńiz, – dedim onyń dırektory Júzbaı Serikke. – Qor qurý ıdeıasyna kelýge lıýterandar áser etti, – dep bastady áńgimesin ol. – Birde osy baýyrlarymyz qalaı ózge dinderge ótip ketedi degen saýalǵa jaýap izdep, solardyń jıynyna bardym. Barsam, 115 oryndyq tur, sonyń 115-inde de aqsaqaldary, aq jaýlyqty analary bar, jas-kárisi aralas biryńǵaı qazaq otyr. Sóıtsek, olarda ózderiniń qataryn kó­beı­tý­diń bir joly – ot basyp qalǵan qyz­dar­ǵa kómek qolyn sozyp, kómektesip, arty­nan dinderine kirgizip alý eken. Kóńilim kádimgideı ortaıyp, qulazyp shyqtym. Sodan, qoı, halqymyz jesirin jylatpaı, jetimin jebegen el edi ǵoı, basqany aıtpaǵanda, jurtymyzdyń osy bir jaqsy qasıetin nege tiriltpeske dep osy ju­mys­ty bastaýǵa nıettendim. Qazir ıslam dininde de túrli aǵymdar paıda bolyp, jurtshylyq qorqyp qalǵan ýaqyt qoı, sodan respýblıkalyq múftııatqa baryp: «Oıymyz sizderge kedergi keltirý emes, tize qosa qımyldaý, óz qyzdarymyzǵa kómek­teseıik, sizder de bul isten shet qal­masańyzdar eken», – dedim. Olar bul oıdy keremet jaqsy qarsy aldy. Sodan qor ashylýyna Astanadaǵy meshitterdiń ımam­daryn shaqyrdyq. Osylaısha 2010 jyl­dyń 25 mamyrynda ashyldyq. Endi qala­daǵy perzenthanalarmen baılanys ornatý úshin aldymen densaýlyq saqtaý departamentinen ruqsat alý kerek boldy. Onda­ǵy­lar: «Eger sizder bir sábıdi perzenthanadan anasymen birge alyp shyqsańyzdar, sonyń ózi úlken is», dedi. Sóıtip, departament basshysy zańgerlerin, maman­daryn shaqyryp alyp, memorandýmǵa qol qoıdyq. Biz úshin perzenthanalarǵa barýǵa jol ashyldy. Biraq bizdiń ýaqytymyz tar, nebári 3 kúnniń ishinde balasyn tastaı­myn degen anamen jolyǵyp, ony raıynan qaıtaryp, shyǵaryp alyp ketpesek, onda bala zańdy túrde «tastandy bala» ata­nady da bóbekter úıine jóneltiledi. Aldymen bizge dárigerlerden habar tú­sedi, sodan perzenthanaǵa baryp, jas bo­san­ǵan anamen sóılesemiz. «Qyzym, ne úshin tas­tap jatyrsyń?» degen saýa­ly­myzǵa 3 túrli aıtylatyn jaýap bar. Birinshisi – al­dan­dym, úılenemin degen jigitim qashyp ket­ti, dese, ekinshisi – ata-anama kúıe jaq­tym, el betine qaraǵysyz ettim, endi olar meni keshirmeıdi, deıdi. Úshinshisi – barar jerim joq, turatyn oryn, tirshilik eter jaǵ­daıym joq, deıdi. Sodan áke-shesheni ýaqyt sheshedi, baýyr eti balasynyń jaza basqanyn keshirmeıtin ata-ana joq, erteń-aq jıenin baýy­ry­na basady, al sen qazir tastasań, erteń opyq jeısiń, ómir boıy ókinishiń ózegińdi órteıtin bolady, ata-anańmen sóıleseıin, tipti, seni ortalyqqa alyp keteıin, áke-shesheńdi balańnyń qyr­qy­nan shyq­qanyn­da shaqyramyz, dep perzenthanadan kádimgideı rásimimen shyǵaryp alamyz. Nemese qashyp júrgen jigit bolsa, ony adresimen izdep baryp sóılesemiz. Alǵashynda qyzdyń anasymen sóıles­ken­de: «Atama júziqarany, ol bir shirigen jumyrtqa», dep bet qaratpaıdy. Sodan kishkentaıdy qyrqynan shyǵararda eń bolmasa alǵashqy rásimine qatysyńyz, dep ana­syn aldyryp, balany besikke salyp, qyr­qynan shyǵa­ryp, azan sha­qy­ryp at qoıyp, ózimiz jasaı­tyn kishigirim dastarqanǵa keltiremiz. Sonda ana baıǵus: «Shyraǵym, rahmet, aıdala­daǵy sender osylaı jasap jat­qan­da, ish­ten shyqqan qulynyma biz qat­ty­lyq ja­sap­pyz, baryp ákesine aıta­myn», dep jy­laıdy. Ne kerek, osydan keıin jıenderin kóp uzatpaı bizdiń úıden alyp ketedi. Jas qyzdar balany jórgekke qalaı oraýdy da bilmeıdi, qor qyz­met­kerleri­niń kóshe jaǵalap júrip aıtqan áń­gimesinen keıin óz erikterimen kelip, Qurman­kúl, Torǵaı, Toty syn­dy volonter apaılar jas analarǵa kó­mekterin kórsetti. Jal­py, biz qan­daı kómek bolsa da qýana qarsy alamyz. Dáýletti adamdar­dyń kıimderi toz­baı­dy ǵoı, moda­sy ótken kıimderin ákelip berse, ony da muqtaj adam­darǵa úlesti­remiz. Azyq-túlik bolsa da qýa­na ala­myz. Jańa jyl­da Aıaz Ata emes Qydyr ata keldi, dep ba­la­larǵa qajetti syı­lyqtar jasadyq. Bul jumysymyzdy estigen jan­nyń barlyǵy birdeı qoldaıdy dep te aıta al­maımyn. Zınadan týǵan shataǵa bola son­shama alaókpe bolyp ne kórindi, dep kús­tánalaıtyndar da tabylady. Biraq, jetimin jylatpaǵan eldiń, jesirin jatqa bermegen eldiń urpaǵy edik qoı, biz bala­lary­myzdy jetimder úıine jiberip, olar­dy shet eldikterdiń asyrap, jat jerge áketýleri jan aýyrtar jáıt emes pe. Pat­rıottyq sezim degenniń ózi ne? Qaryn­da­syń jylasa, odan týǵan sharana týmaı jatyp, qoǵamnan qaǵajý kórse, er­teńimiz ne bolady degen oı maza bermedi. Osyndaı jaǵdaılar qaıtalanbasyn, jastarǵa oı salsyn, ári qoǵamnyń qar­jylyq esebine septigi bolsyn, dep áýes­qoı ártisterden teatr ashtyq. Sonymen, spektaklder, konsertter qoıamyz. Ssenarıı qyzdardyń basynan ótken naqty oqıǵalarǵa qurylǵan. Qazir sony mektepter men joo-larda stýdentter arasynda qoıyp júrmiz. Sosyn jastardyń sekta­larǵa ótip ketýlerine qurylǵan «Sheshilmegen túıin» degen de spektaklimiz bar. Kórer­mender óte jaqsy qabyldaıdy. Qa­zirgi kúni ortalyqta 8 qyz balalarymen turyp jatyr, baryp sóılesýińizge de bolady. Dırektordyń sózinen keıin ortalyq­tary­na soqtym. – Meniń bir jarym jasymda ákem men anam ajyrasyp ketipti. Anam baıǵus áli qanattary qataımaǵan úsh balamen jesir qaldy. Al úsh jasqa tolǵanymda anam ekinshi ret turmys qurdy. О́geı ákeniń aty ógeı emes pe, bizge múldem durys qara­mady. Eń bastysy, anamyzǵa sóz keltirmeıik dep úndemeı ógeı ákemizdiń aıtqanyn istep júre berdik, taıaqty da jeımiz, uzyn sózdiń qysqasy, kórmegen qıyndyǵymyz joq. О́geı ákemnen týǵan bir ul, bir qyz bar, olardyń ómiri patshadaı. Biz solardan qalǵan kıimdi kıip, árqashan ekinshi orynda turatynbyz. Anam ógeı ákeme qarsy eshteńe aıta almaıdy. Al ózimniń týǵan ákem bolsa, anammen ajyrasqannan keıin bizge múldem kelmedi. Sol ketkennen mol ketti, ekinshi ret úılendi dep estidik. Bizge bir ret bolsa kelip, bala­larynyń hal-jaǵdaıyn bilmedi. Men altynshy synypqa kelgende ózim­nen eki jas úlken jigitke ǵashyq bol­dym. Kezdesip júrgenimizge úsh jyl tolǵanda, ıaǵnı men toǵyzynshy synypty bitirgende sol jigitimnen aıaǵym aýyrlap qaldy. Biraq jigit aýqatty jerden bolǵandyqtan, onyń ata-anasy meni alýǵa úzildi-kesildi qarsy boldy. Qyzymdy týǵanda, ákemdi izdestirip taptym, biraq ol menen bas tartty. Osydan bir jyl buryn qaıtys boldy dep estidim. О́mirge kelmeı jatyp nebir qıyndyqty mańdaıyma úıip-tógip beretindeı taǵdyryma ne jazdym dep nalıtyn sátterim de bolady. Ne kerek, qyzym Tomırıs dúnıege keldi. Qyzym bir jasqa tolǵan kúnniń erteńine sábıimdi anama qaldyryp, Astanaǵa jumys isteýge jolǵa shyqtym. Sonymen, elordadaǵy qym-qýyt ómi­rim bastaldy, munda kelgende istemegen jumysym qalmady. Aspazshy da, eden jýý­shy da, qurylysshy da boldym. Ar­na­ıy mamandyǵym bolmaǵannan keıin bar­lyq jumysty istep shyqtym. Munda áp­kem ekeýmiz bireýdiń jertólesinde tu­ryp jattyq, páter jaldaýǵa qaraja­tymyz bolmady. Kafede aspazshy bolyp júrip, Azamat esimdi jigitpen tanystym. Jaǵ­daıymdy sol túsiner dep oıladym, sebebi, ol da men sııaqty jastaıynan nebir qıyn­dyq kórgen jetimder úıiniń tár­bıe­lený­shisi edi. Az ýaqytqa bolsa da ba­qytty ómir keship jattym. Ol baqyttyń da ǵumyry uzaqqa so­­zylmaıtynyn bilsemshi. Ekeýmiz úı­lenip otaý quramyz degen mende tátti ar­man-qııal bolǵan edi. Ekin­shi balama aıa­ǵym aýyrlaǵanyna jeti aı bolsa da jumys istep júrdim. Ádettegideı bir kúni ju­mystan kelsem, te­re­­zeniń aldynda bir paraq qaǵaz tur. Onda bylaı dep jazy­lypty: «Keshir, Jadyra, men saǵan úılene almaımyn. Meniń áli ondaı jaýapkershilikti moınyma alar múmkindigim joq. Balany ne isteısiń, ony óziń bilersiń. Árıne, keshire alsań keshirersiń. Qosh bol, Jadyra». Sonymen, qalyń tumannyń ishinde taǵy da jalǵyz ózim qaldym. Eki kózdiń jasyna erik berip, jastyǵymdy shylq-shylq sý etemin. Elge barar bet joq, birinshi qyzymdy anam ósirip jatyr. Endi mynandaı bolyp baryp tursam, ógeı ákem­niń óltiretini aıdan anyq, onymen qoı­maı el-jurttyń betine qalaı qarama­q­pyn? Ol ýaqytta ápkem turmysqa shyq­qan, soǵan bardym. Bar pana izderim sol áp­kem ǵana, týǵan aǵam da osy qalada tu­rady, biraq odan paıda joq. Eki aı áp­kemniń qolynda turdym. Gúlnazym qysta týdy. Qystyń qaqaǵan aıazymen birge, sá­bıimniń shyryldaǵan daýysy odan saıyn meniń muzdaǵan júregimdi qataıta tústi. Sanam san saqqa júgirýde, balamnan bas tartpasam qalaı bolady. Biraq qaıda baramyn, qaıtip kún kóremin, bala túgili ózimdi asyraýǵa jaǵdaıym joq. Aýylǵa barsam qalaı bolady, el-jurttyń betine qalaı qaramaqpyn, ógeı ákem úıge kirgize me, anamdy tirideı jerge kómbekpin be? degen saýaldar mıymdy ashytty. Aqyry, baladan bas tartýǵa sheshim qa­byldadym. Sóıtip, dárigerlerge balamnan bas tartatynymdy aıttym. Árıne, olar óz­deriniń aqyldaryn aıtyp baqty. Biraq esh­qaısysy meniń qatyp qalǵan júregimdi jibite almady. Sol sátte dári­gerler «Mıras-A» qaıyrymdylyq qory­na habarlasqan eken. Qordyń qyzmet­ker­leri kelip, maǵan aqyl-keńesterin aıtty. Sen onsyz da ómirge nekesiz sábı ákelip, kúná jasadyń, endi sol jasaǵan kúnáńdi moıyndaýdyń ornyna ekinshi kúnáni arqalamaqshysyń. Sony oıladyń ba, nege táýbeńe kelmeısiń, erteń aryńnyń aldyn­da qalaı aqtalmaqsyń degen sózder on­syz da ashyp turǵan jarama tuz sepkendeı boldy. Qazir «Mıras-A» qaıy­rym­dylyq qory ashqan beıimdeý orta­ly­ǵynda sábıim­men birge turyp jatyrmyn. Aýrýhanada jatqanda qaltamda kók tıyn aqsham joq edi. Qordyń qyzmetkerleri kelip, emhanadan shyǵaryp, qazaqtyń salt-dástúri boıynsha balama azan shaqyryp at qoıyp, besikke saldy, – deıdi Jadyra esimdi muńlyq. Aıgúl aıtady: Alǵashynda men osyn­daı zamanda eshqandaı aqysyz-pulsyz kómek kórsetetin oryn bar degenge tipti ılanǵan joqpyn. Bular balam men meni shyǵaryp alyp, baladan bólip tastap, ózimdi jumysqa salyp qoıa ma degen de aram oı keldi. Perzenthanada balasyn tas­taımyn degen adamǵa jurttyń kóz­qara­sy jaman bolatyny túsinikti ǵoı. Al biraq baratyn jerim joq. Aldymen maǵan Berdibek aǵa men Nyǵmet ata kelip sóılesti. Men sizdermen baramyn dep kelisken soń shyǵaryp aldy. Qazir soǵan keremet qýa­na­myn. Áıtpese qyzym qaı jerde eken, bireý asyrap aldy ma dep, kóshedegi qyzymmen quralpy ár balaǵa kózimdi súzip júrer me edim. Ákesi qyzynyń týǵanyn dosy arqy­ly estip, alyp ketemin dep aıtypty. Biraq, qur sóz, áıtpese keler edi ǵoı. – Al men kóp balaly otbasynan shyq­tym. Áke-sheshem alystaǵy aýylda tura­dy. Osynda qonystanǵan aǵalarym bar, biraq olar balany tasta dedi. Barlyǵy renjip, sen bizdiń betimizge salyq bola­tyn boldyń, elge ne aıtamyz, dep urys­ty. Qınaldym, biraq balany tastamaı, osy ortalyqqa keldim. Týǵandarym bola turyp jalǵyzdyǵyma nalydym. Qatty depressııadan júıke aýrýyna shal­dyq­qandardyń aýrýhanasyna da tústim, qazir aǵalarym áke-shesheme aıta almaı otyr, kishkene shyda, osynda bola tur, sosyn alamyz, balańdy jetkizýge de kómek­te­semiz dedi, – dep ýildegen kishkentaıyn aldyna alyp otyrǵan taǵy bir ana áńgi­mege qosylǵan. – Depressııa degen bizdiń bárimizge ortaq, ýaıymnan, jylaýdan bizden sút te shyqpaıdy. Balalardyń birazy jasandy sútpen ósip jatyr. Al Jazıra aýrýhanaǵa túskende biz kishkentaıdy ózimiz baqtyq. Eger anasy joq bolsa, onda ony bóbekter úıine tapsyramyz degenge janushyryp dárigerlerdi kóndirdik. Táte, osyndaǵy qyzdardyń barlyǵy qala­ǵa oqý izdep kelip, odan jumysqa tur­ǵandar. Arnaıy mamandyqtarymyz joq bol­ǵan­­dyq­tan, bizder jeke ká­sip­ker­ler­de túrli jumystar istedik. Olarda, ózińiz bilesiz, eń­bek sharty, nemese dekrettik dema­lys­qa jiberý degen joq. Aıaǵyń aýyrla­ǵan­da tórt quby­laǵa qa­ra­typ, bar endi, dep jóni­ńe qoıa beredi. Qa­zir de biz tek qor­ǵa qarap aý­zy­myzdy ashyp otyr­maı, ju­mys­­qa shyqqy­myz keledi. Biz sııaq­tylar úshin úkimet balalar baq­sha­syn ashsa ǵoı, tipti so­nyń aýyr ju­mys­­taryn ózi­miz-aq atqa­rar edik. Eńbek­aqy tóle­se, ári bir jaǵy­nan qınalyp júrgen jal­ǵyz­bas­ty analarǵa kómek bolar edi. – Men – osyndaǵy eń bir uzaq turyp jatqannyń birimin. Kóbine qyzdardy 6 aıǵa jetkizbeı alyp ketedi. Qyzdar balalarynyń ákesi­ne qosylyp, nemese ata-analary kelip áketip jatady. Basynda qor jumysyn basta­ǵan­­da demeýshiler joq edi. Qazir qalalyq kommýnaldyq sharýa­shy­lyq mekemesi ár aıdyń 15-inde qajet zattary­myzdyń tizimin alyp, sony ákelip beredi, – dedi kelesi bir ana. – Bizdiń otbasynda ul joq, 6 qyzbyz, al áke-shesheme bermegen uldy Alla maǵan berdi. Jáne men ákemniń eń súıikti qyzy edim. Ol kisi qyzdarynan jamandyq kór­gen joq. Menen úlkenderi turmysqa shyq­qan, úıli-barandy. Endi osy jaǵdaıdy estise ne bo­la­dy. Ári ákem qazir aýyrady, kishkene ja­zylsyn, sosyn baryp aıtyp, ózimizge jaz­dy­ryp alamyz, – degen Janarǵa múmkin Alla taǵalanyń seniń papańa tartqan syıy shyǵar, muńaıma degenimde, janary jarq ete qalǵan ol: «Ras shyǵar, ápkelerimniń ul­dary bolǵanymen, jezdelerim olardy pa­pam­nyń atyna jaz­dyrýǵa bermeıdi, al me­niń ulym ákem­niń atyn alatyn bolady», – dedi. Qyzdarmen áńgimelesip otyrǵany­myz­da Qaraǵandydan gastrolden qaıtqan ár­tister de kelip qaldy. Aralarynda jasy 70-ten asqan Nyǵmet Erhanuly bar eken. – О́zim de jetimdiktiń taqsyretin tart­qan jan edim. Týa sala ákem «halyq jaýy» atanyp, sol ketkennen mol ketti. Men bolsam, sheshem turmysqa shyǵyp ketken soń, ata-ájeniń baýyrynda qalyp­pyn. Al qordyń atqaryp júrgen jaqsy jumysyn estigen soń, qolymnan kelgenshe kómekteseıin dedim. Jaıaýlap-jalpy­lap, qysty kúnderde qol kóterip, ótken kólikterge jabysyp, ártis balalar bara­tyn jerlerdi daıyndaımyn. Kelisimge kelgennen keıin jastardy bastap alyp baramyn, – deıdi aqsaqal. Bir sát joldan jańa kelgen ártisterdi de sózge tarttym. – Bizdiń qoıylymdar shynaıy oqıǵa­lar­ǵa qurylǵandyqtan bolar, kórermen­der­ge qatty áser etedi. Qyzdardyń aıa­nysh­ty halin kórgende ártis te, kórermen de bulaýdaı bolyp jylap otyrady. Shyq­qannan keıin jastar kelip, alǵystaryn aıtyp, ózderine keremet áser etkenimen bólisip jatady. Ár qoıylymnan keıin jumysymyzdyń jurtqa qajettigin uǵy­nyp, qanattanyp qaıtamyz, – degen olar. Ýildegen kishkentaı sábılerin al­dary­na alyp, bastaryndaǵy muńdaryn aıt­qan­da janarlary kireýkelenip, toryǵa kúr­singen jandar, baldyrǵandary talpynyp nemese kishkentaı qoldaryn qybyrlatyp, analary­nyń betine, aýyzyna tıgizgende, lezde ja­ńa­ǵy qalyptary baqytty bir shýaqqa bólenip, bópelerine meıirlene qaraǵan sińlilerim­men qoshtasyp, aqyryn úıge aıańdadym. Túr­li oı sanamdy shar­pyp, oı júgi ady­mym­dy qysqartyp, bar bolmysymmen bó­bek­terin baýyr­laryna basqan, sýyqqa toń­ǵan torǵaıdaı sharasyz analardyń, beı­kúná sábılerdiń shyn baqytty bolýyn tiledim.

Anar TО́LEÝHANQYZY.