Keshe Elbasy Nursultan Nazarbaev Aqordada Serbııa Respýblıkasynyń Prezıdenti Aleksandr Výchıchpen kezdesti. Saltanatty qarsy alý rásiminen keıin taraptar shaǵyn quramda ekijaqty qarym-qatynastar men halyqaralyq kún tártibiniń ózekti máselelerin talqylady.
Qazaqstan Prezıdenti eki el arasyndaǵy ózara baılanystardyń dostyq sıpatyn atap ótip, ony odan ári damytý qajettigin aıtty. «Prezıdent myrza, Ciz EKSPO-2017 halyqaralyq kórmesine arnaıy kelip, bizge qoldaý kórsettińiz. Al búgin Álemdik jáne dástúrli dinder kóshbasshylarynyń VI sezine qatysý úshin Qazaqstanǵa resmı saparmen keldińiz. Munyń bári bizdiń elimizge degen sizdiń naǵyz dostyq nıetińizdi bildiredi. Biz muny joǵary baǵalaımyz», dedi N.Nazarbaev.
Memleket basshysy ekijaqty ekonomıkalyq qatynastardy ilgeriletý múmkindikterine arnaıy toqtalyp, birqatar salalardy jandandyrýǵa múmkindik mol ekenin jetkizdi.
«Meniń Serbııaǵa saparym barysynda qol jetkizilgen ýaǵdalastyqtarǵa sáıkes logıstıka, kólik jáne kommýnıkasııa, qorǵanys ónerkásibi, aýyl sharýashylyǵy, farmasevtıka jáne qurylys salalarynda yntymaqtastyǵymyzdy keńeıtý qajet. Sizdiń búgingi saparyńyz ózara yqpaldastyǵymyzdy jańa deńgeıge kóterýge múmkindik beredi», dedi Elbasy.
Kezdesý barysynda Nursultan Nazarbaev Qazaqstan Respýblıkasy men Serbııa Respýblıkasy arasynda dostyq pen yntymaqtastyqty jáne beıbitshilikti nyǵaıtýǵa qosqan úlesi úshin Aleksandr Výchıchti I dárejeli «Dostyq» ordenimen marapattady.
«Serbııa barlyq halyqaralyq máselelerde bizdi qoldap keledi. Biz de Serbııa tarapyna qoldaý bildiremiz. Osynaý dostyq qarym-qatynastardy eskere kele, Sizdi sheteldik dıplomattarǵa arnalǵan eń joǵary nagrada – birinshi dárejeli «Dostyq» ordenimen marapattaý týraly Jarlyqqa qol qoıdym», dedi Elbasy.
A.Výchıch óz kezeginde N.Nazarbaevqa qonaqjaılylyq kórsetip qarsy alǵany úshin jáne halyqaralyq arenada Serbııaǵa jan-jaqty qoldaý bildirgeni úshin rızashylyǵyn jetkizdi. Elbasynyń eki el arasyndaǵy ekijaqty qarym-qatynasty damytýdaǵy rólin atap kórsetti. Sonymen qatar Qazaqstan Prezıdentin eń joǵary memlekettik deńgeıdegi I dárejeli «Serbııa Respýblıkasynyń Ordenimen» marapattady. Aıta ketý kerek, mundaı qurmetke Reseı Prezıdenti Vladımır Pýtın men Qytaı Tóraǵasy Sı Szınpın ǵana ıe bolǵan.
Ekijaqty kelissózderden keıin memleketter basshylary resmı sapar qorytyndysy boıynsha buqaralyq aqparat quraldary ókilderi úshin brıfıng ótkizdi.
Qazaqstandyq jáne sheteldik BAQ ókilderi aldynda sóılegen sózinde Elbasy Serbııa Prezıdentine Qazaqstanǵa alǵash ret resmı saparmen kelgeni úshin rızashylyq bildirip, eki el arasyndaǵy yntymaqtastyqtyń damý qarqynyn erekshe atap ótti.
N.Nazarbaev búgingi ótken kelissózder nátıjesinde qol jetkizilgen kelisimderge toqtalyp, «Bizdiń joǵary deńgeıdegi kezdesýlerimiz taraptardyń ózara baılanystardy damytýǵa múddeli ekendigin bildiredi. Eń aldymen, bul – saýda-ekonomıka salasyndaǵy kooperasııany odan ári ilgeriletý. Elderimizdiń ekonomıkasy birin-biri tolyqtyryp turady. Jetkiziletin ónimder túrlerin keńeıtýge daıynbyz», dedi.
Memleket basshysy Qazaqstan men Serbııa arasyndaǵy qatynastardy odan ári ilgeriletetin basym baǵyttardy da atady.
«Biz Saýda-ekonomıkalyq yntymaqtastyq jónindegi úkimetaralyq komıssııa aldyna jańa mindetter qoıdyq. Jaqynda bul komıssııanyń ekinshi otyrysy ótti. Onda basym baǵyttar aıqyndaldy. Olar – aýyl sharýashylyǵy, ónerkásip, qurylys, kólik, energetıka jáne basqa da salalar. Biz Azııa men Eýropa arasynda júk tasymalyn jedeldetý úshin tıisti ınfraqurylym qalyptastyrýǵa múddelimiz», dedi Elbasy. Qazaqstan Prezıdenti qazirgi ýaqytta Eýrazııalyq ekonomıkalyq odaq pen Serbııa arasyndaǵy erkin saýda aımaǵyn qurý úshin saraptamalyq kelissózder jalǵasyp jatqanyn atap ótti. Sondaı-aq kelissózder barysynda óńirlik jáne halyqaralyq saıasat máseleleri talqylanǵanyn aıtty.
Sońynda Memleket basshysy Álemdik jáne dástúrli dinder kóshbasshylarynyń VI sezine qatysýǵa shaqyrýyn qabyl alǵany úshin Serbııa Prezıdentine rızashylyq bildirdi.
О́z sózinde A.Výchıch qonaqjaılylyq kórsetkeni úshin N.Nazarbaevqa alǵys aıtyp, kelissózderdiń jemisti bolǵanyn atap ótti. «Menińshe, Ortalyq Azııada Astana sııaqty qarqyndy ózgerip ári órkendep kele jatqan qala joq. Prezıdent Nazarbaevtyń jáne onyń kóregendiginiń, kúsh-jigeri men iske berilgendiginiń arqasynda Qazaqstannyń qol jetkizgen jetistikteri meni tańǵaldyrady. Sizderdiń «Qazaqstan-2050» strategııasynda belgilegen maqsattaryńyzǵa jetetinderińizge kámil senemin», dedi A.Výchıch.
Serbııa Prezıdenti eki el arasyndaǵy saýda-ekonomıkalyq yntymaqtastyqtyń mańyzdylyǵyn aıtyp, ony ári qaraı kúsheıtý úshin zor áleýettiń bar ekenin atap ótti.
«Keleshekte yntymaqtastyǵymyzdy nyǵaıta túsip, taýar aınalymymyzdy arttyratyndyǵymyzǵa senimdimin. О́ıtkeni eki el arasyndaǵy baılanysty nyǵaıta túsýge mol múmkindik bar. Aldaǵy ýaqytta Belgradta Qazaqstan elshiligin ashsańyzdar, qýanyshty bolar edik. Bul – bizdiń úlken ótinishimiz», dedi Serbııa Prezıdenti.
Sonymen qatar Serbııa Respýblıkasynyń Prezıdenti eki memlekettiń halyqaralyq deńgeıde bir-birine ózara qoldaý kórsetýin nyǵaıtý qajettiligine toqtaldy.
Aıta keteıik, Serbııa basshysy Qazaqstan Prezıdenti N.Nazarbaevtyń shaqyrýymen resmı saparmen kelip otyr. Sapar aıasynda Aleksandr Výchıchtiń Qazaqstan-Serbııa iskerlik forýmyna, Álemdik jáne dástúrli dinder kóshbasshylarynyń VI seziniń ashylýyna qatysýy josparlanǵan.
Abaı ASANKELDIULY,
«Egemen Qazaqstan»