Indonezııada máresine jetken Azııa oıyndarynda qazaq balasy tuńǵysh ret trıatlonda júldege ilikti. Onyń esimi – Aıan Beısenbaev. Qýanyshty sátimen quttyqtap habarlasqanymyzda, 22 jastaǵy jigittiń jigerine ǵana emes, qarapaıymdylyǵyna da qýandyq.
– Aıan, kúmis medal qutty bolsyn! Barlyǵy jospardaǵydaı boldy ma?
– Rahmet! Josparymyz tolyq oryndaldy deýge kelmes. Sebebi altyn medaldan úmittenip edim. Aıaǵymnyń sińiri tartylyp, biraz mazamdy aldy. Aýa raıynyń ystyqtyǵy da keri áserin tıgizdi. Beıimdelý qıyn boldy. Biraq shamam kelgenshe tyrysyp, barymdy saldym. Kúmis medal alǵanyma qýanyshtymyn.
– О́zińizdiń ýaqyt kórsetkishińiz qanshalyqty kóńilińizden shyqty?
– Trıatlon – ýaqytty boljap bolmaıtyn sport túri. Munda bári aýa raıyna, jelge, jolǵa, tipti sýdyń temperatýrasyna da baılanysty. Jalpy, nátıje jaman emes. Aldaǵy ýaqytta bul kórsetkishti jaqsartýǵa tyrysamyn.
– Jalpy, Azııa oıyndaryna daıyndyq qalaı júrip edi?
– Biz bul oıyndarǵa uzaq daıyndaldyq. Daıarlyq kezinde azdaǵan qıyndyqtar kezdesti. Biraq olardy bapkerlermen birigip sheship otyrdyq.
– Djakartada osydan tórt jyl buryn Inchhondaǵy kórsetkishińizdi jaqsartyp qana qoımaı, kúmis medal enshiledińiz. Osy aralyqta daıarlyq júıesinde ne ózgerdi?
– Inchhonda toǵyzynshy orynmen shektelýim tym jas bolǵanyma baılanysty shyǵar. Sebebi ol kezde jasym 18-de bolatyn. Sondyqtan Azııa oıyndaryna qatysýyma áreń ruqsat berildi.
Ár jarys saıyn kem-ketikterdi anyqtap, bapkerimmen birge solardy joıý jolynda eńbektenemiz. Djakartadaǵy oıyndar aldynda basymdyqty júzýge berdik. Sebebi júzýde áli de kemshin tustarym bar. Osy joly velosıped jarysyn oıdaǵydaı ótkizgenimmen, júgirýde aıaqtarym biraz syr berdi.
– Úsh sport túrinen úsh túrli mamannyń jattyqtyrýyna qatysty oıǵa pikirińiz qandaı?
– О́zim trıatlon bapkeriniń qaramaǵynda jattyǵamyn. Bul suraqqa birjaqty jaýap berý qıyndaý. Sebebi ár bapker óz salasyna kóbirek basymdyq beredi de qalǵan eki sport túri qalys qalady. Al trıatlonda aýyrtpalyq birdeı bolýy kerek. Buryn júzýden bapkerimiz bólek bolatyn. Ol kisi osy sportta kóp jattyǵý jasatyp, sońynda júgirý men velosıped tebýge shamamyz kelmeı qalatyn. Sondyqtan bul jerde bapkerdiń biliktiligi mańyzdy.
– Al bizde bilikti mamandar jetkilikti me?
– Jeke bapkerim Iýrıı Solovev – óz isin biletin maman. Álem chempıony, Dohadaǵy Azııa oıyndarynyń jeńimpazy, Olımpıadada tórtinshi oryn alǵan Dmıtrıı Gaag Iýrıı Vıktorovıchtiń shákirti. Osyndaı tanymal shákirtteri kóp. Bul da sol kisiniń biliktiliginiń arqasy ǵoı.
– Úsh sport túrinen jattyǵýlarǵa ýaqytty qalaı bólesiz?
– Tańerteń velosıpedpen 60 shaqyrymdaı júrip ótken soń, basseınde 3-4 shaqyrym júzemiz. Túski tamaqty iship bolǵan soń biraz tynyǵyp jeńil atletıka jattyǵýymen jalǵastyramyz. Bul jobalap aıtyp turǵanym. Jattyǵýdyń kúndelikti baǵdarlamasy bapkerge baılanysty.
– Trıatlon – tózimdilikti talap etetin sport. Sondyqtan oǵan egde jastaǵylar qyzyǵady dep jatady. Siz qalaı oılaısyz?
– Eresekter qataryna endi qosylǵan jyldary aýyrlaý soqty. Al qazir aǵzam úırenip ketti. Bul úzdiksiz ári júıeli jattyǵýdyń arqasy. Buryndary trıatlon jarystarynda qatysýshynyń jasy eskerilmese, búginde qashyqtyqty jas deńgeıine qarap qoıady.
Anam sportpen shuǵyldanýym úshin birneshe úıirmege apardy. Ol kezde júze almaıtynmyn, ári onsha qyzyqqan da joqpyn.
– Nelikten tańdaýyńyz trıatlonǵa tústi?
– Bala kúnimde velosıped tepkendi jaqsy kóretinmin. Anam sportpen shuǵyldanýym úshin birneshe úıirmege apardy. Ol kezde júze almaıtynmyn, ári onsha qyzyqqan da joqpyn. Bir kúni velosıped, júzý jáne júgirýdiń basyn biriktirgen trıatlon jaıly estip, baǵymdy synap kórgim keldi. Tym quryǵanda júzip úırenemin degenmin. Ýaqyt óte bul sportqa qyzyǵýshylyǵym artyp, birjola den qoıdym.
– Eki saǵatqa sozylatyn jarysta ne týraly oılaısyzdar?
– Ádette aldaǵy kezeńge taktıkalyq jospar quramyn. Aıtalyq, júzý kezinde aldaǵy eki jarysqa oısha daıyndalamyn. О́zimniń áleýetimdi baǵalap, kúshimdi durys jumsaý týraly oılaımyn. О́ıtkeni trıatlon naqty josparǵa da baǵynbaıtyn sport qoı.
– Ata-anańyz Djakartadaǵy ulynyń bul jetistigin qalaı qabyldady?
– Ol kisiler teletranslıasııa bolmaǵandyqtan, bul jarysty tamashalaı alǵan joq. Márege jetkendegi, tuǵyrdaǵy sýretterdi bapkerim jibergen soń qýanyp quttyqtap jatyr. Ol kisiler jeńsem de, jeńilsem de amandaǵym úshin qýanady.
– Trıatlonnan Azııa oıyndarynda júlde salǵan tuńǵysh qazaqsyz. Munyń siz úshin mańyzy qandaı?
– Tuńǵysh degen uǵym men úshin sonshalyqty mańyzdy dep aıta almaımyn. Buǵan deıingi trıatlonshylarymyz týraly kóp estigenmin. Bizdiń elde bul sporttyń deńgeıi joǵary bolǵan. Álem, Eýropa chempıonattarynda atoı salǵan talaı sportshymyz bar. Tek sońǵy 5-6 jylda kenjelep qaldy. Solardyń qasynda ózimdi ereksheleý orynsyz. Olımpıadada úzdikter qataryna iliksem, sonda maqtanýǵa bolatyn shyǵar.
Mádına ASYLBEK,
jýrnalıst