Qostanaıdaǵy L.Tolstoı atyndaǵy oblystyq ámbebap kitaphanada ataqty mehanızator, Sosıalıstik Eńbek Eri, qoǵam qaıratkeri Kámshat Dónenbaevany eske alý keshi ótti. Oǵan Kámshat apanyń sińilisi Múgilsim Qusmanova, zamandas qurbysy Sara Omarova, aqyn Aqylbek Shaıahmet, kelini Darıǵa Jaqsybaeva shaqyryldy. Olar jastar aldynda Kámshat apa týraly estelikter aıtty.
«Kámshat apa týraly oblystyq radıoda qyzmet istep júrgende jarty saǵattyq suhbat jasaǵan edim. Ol qazir radıonyń altyn qorynda bolýy tıis. Kámshat apa tek eńbek adamy ǵana bolǵan joq, ol qazaqtyń danagóı analarynyń qataryna, qazaq halqynyń maqtanyshy dárejesine kóterildi. Onyń ómiri men qyzmeti búginde barlyq jastarǵa, qazaq áıeline úlgi ónege der edm. Ol bala tárbıeledi, úlken kisilerin, ata-enesin baqty, jumysyna asa jaýapkershilikpen qarady. Qazaqtyń qara qyzynyń osynyń barlyǵyna kúsh-qýaty jetken edi» dedi Aqylbek Shaıahmet.
Sińilisi Múgilsim apasynyń ózine qamqorlyǵy týraly aıtty. Oblystyq arhıvtiń qyzmetkeri Anna Karpýhına keshke qatysqan jastarǵa Keńes Odaǵy kezindegi qurmetti ataqtar tarıhy, olardy bizdiń oblysta kimder alǵany jóninde áńgimelep berdi. Qurbysy, syılas sińilisi bolǵan Sara Omarova Kámshat Baıǵazyqyzynyń mehanızator bola júrip, depýtattyq qyzmetin qalaı uqyptylyqpen, biliktilikpen atqarǵanyn eske aldy.
«Kámshat Baıǵaqyzyna aıyna 300-den asa hat keletin. Olardy ózi iriktep, qaısy hat boıynsha qandaı mınıstrlikterge, tıisti oryndarǵa barýy, hat joldaýy kerektigin retteıtin. Onyń aralasýymen qanshama adamdardyń ádilettilikke qoly jetti, kómek aldy», dedi Sara Ýálıqyzy.
Al kelini Aqmaral Jaqsybaevanyń enesi týraly aıtar áńgimesi mol. Ol enesiniń sondaı jaýapkershilikti, aýyr jumysynda júrip balalaryn eńbekke tárbıelegenine rızashylyǵy bar ekenin aıtty. Enesiniń kózi tirisinde kelinine aıtyp bergen áńgimelerin eske aldy.
«Meniń enemniń eneleri de dana kisiler bolǵan. Anamyz olardyń tárbıesin ala bergen. Birde mamam bir shelek qorytylǵan sary maıdy tógip alady. Ol dereý jerdi qyryp, alyp tastaıdy. Enesi túk bilmegendeı, Kámshatqa eshteńe aıtpaıdy. Keıin kóp jyldar ótkende mamam enesinen osy jaıdaıdy eske alyp suraıdy. «Apa sonda meniń maıdy tógip alǵanymdy bildińiz be?» deıdi. «Árıne bildim, qalqam» deıdi. Sonda mamamnyń kóńiline tıip eshteńe aıtpaǵany úlken ájemizdiń danalyǵy emes pe?» dedi Aqmaral. Ol jaqynda enesi týraly estelikter jınaǵy shyǵatynyn jáne qaladaǵy Kámshat atyna bergen kóshede gúlzar men onyń eskertkish músini ornatylatynynan habardar etti. Oblystyq kitaphananyń dırektory Darıǵa Dúısenbaeva kópshilikke ktaphana qyzmetkerleri daıyndaǵan Kámshat týraly jazylǵan dúnıelerdiń kórsetkishin tanystyrdy.
Keshke kelýshiler Kámshat Dónenbaeva men onyń zamandastary týraly oblystyq arhıv qyzmetkerleri uıymdastyrǵan kórmeni tamashalady.
Názıra JÁRIMBET,
«Egemen Qazaqstan»
Qostanaı