Oblystyq máslıhattyń kezekten tys sessııasynda depýtattar memlekettik satyp alýdan únemdelgen 2 mlrd teńgeniń qaıda jumsalatynyn naqtylady. Osy qarjynyń 452,6 mln teńgesi Áýlıekól aýdanynynyń Amanqaraǵaı selosyndaǵy 240 úıdi kógildir otynmen qamtamasyz etetin gaz taratý jelisi qurylysynyń alǵashqy satysyndaǵy jumystarǵa jáne gazdy paıdalanýǵa berýge arnalǵan tehnıkalyq tólqujatyn daıyndaýǵa jumsalatyn boldy. 404,5 mln teńge Qostanaı qalasyndaǵy kósheler men úılerdi, jańa turǵyn aýdandardy kórkeıtý jumystaryna baǵyttalady.
Únemdelgen qarjydan 380,5 mln teńge «Bınestiń jol kartasy – 2020» baǵdarlamasy sheńberinde beriletin nesıeniń ústeme prosentin sýbsıdııalaýǵa bólinedi. Ol 101 kásipkerge qarjylaı memlekettik kómek berýge jetip artylady. Taran aýdanyndaǵy aýyl mektebine kúrdeli jóndeý jumysyn júrgizýge 182,2 mln, Amangeldi aýdanyndaǵy joldardy, kóshelerdi ortasha jóndeýge jáne Aralyq-Torǵaı jolynyń aǵymdaǵy jóndeý jumysyna 133 mln ketedi.
140 mln teńge Arqalyq qalasynyń qazandyǵy úshin 10 000 tonna mazýtty tasýǵa beriledi. Oblys ákimi Arhımed Muhambetovtyń aıtýynsha, bul mazýttyń qoryn jasap alýǵa, bıyl turǵyndar úshin jylý tarıfiniń kóterilmeýine kómek bolady. Sonymen qatar únemdelgen qarjyny Qostanaı qalasyndaǵy shaǵyn turǵyn aýdan qazandyǵynyń qurylysyn jalǵastyrýǵa, Amangeldi aýdanyndaǵy 12 páterlik úıdi mamandarǵa arnap qaıta jańǵyrtýǵa, Qostanaı aýdanyndaǵy bilim salasynyń qyzmetkerleriniń aılyq-jalaqysyn kóterýge de jetkizdi. Qostanaı qalasyndaǵy oblystyq tarıhı-ólketaný mýzeıiniń balansyna ótken meshitti ustaý, oblystyq fılarmonııa ártisterine sahnalyq kıim men Kachar kentiniń Mádenıet úıin jóndeý de únemdelgen qarjynyń moınyna ilindi.
Názıra JÁRIMBET,
«Egemen Qazaqstan»
Qostanaı