Kókpekti aýdanynyń Kókjota aýylynda ulttyq at sporty mektebi quryldy. Kóp jyldan beri shaǵyn aýyldyń jas shabandozdaryn shynyqtyryp, attaryn baptap, aýdan namysyn oblysta abyroımen qorǵap júrgen ardager kókparshy Qanat Bıqatov atalǵan mekteptiń tizginin ustady.
Jaqynda aýdan ortalyǵynda bekzada ónerdiń kókjıegin keńeıtetin taǵylymdy shara ótkizildi. Jastar ortalyǵynyń muryndyq bolýymen 6 qazanda ár aýyldan jınaqtalǵan 5 qurama aýdan ákiminiń kýbogyn sarapqa saldy. «Kókpar oıyny – ulttyq muramyz. Jastardy eptilikke, tózimdilikke, batyldyqqa baýlıtyn sport bolǵandyqtan ony damytýǵa atsalysý – bizdiń mindetimiz. Aýdanǵa kelgen kúnnen qamqorlyǵyna alyp, jaǵdaıymyzdy jasap, jumysty júıeli jolǵa qoıyp jatqan Ashat Saıdahmetulyna myń alǵys. Búgingi kúni Jastar ortalyǵynyń dırektory Azamat Halyq bastap qolǵa alyp jatqan azamattardyń isi qýantady. Ár aýylda, ár otbasynda kókpar oınaıtyn balýandar tárbıelesek, ulttyq namysymyzdy mazdatamyz», – deıdi ıgi istiń basy-qasynda júrgen kókparshy Qanat Bıqatov.
Kil myqtylar arasynan kásibıligimen basym túsken Kókjaıyqtyń «Ardager» quramasy aýdan ákiminiń kýbogyn ıelendi. Jeńimpazdar quramasynda oıyn kórsetken taqymy tastaı berik Álibek Máýlen men áıgili atbegi Nurjan Smaǵulovtyń oıyny kórermenniń aıyzyn qandyrdy. Quramynda Muratqazy Bekishev, Batyr Smaǵul syndy kókjal oıynshylary bar Kókpekti quramasy 2-oryndy ıelense, Tassaı aýylynyń kókparshylary 3-oryndy oljalady. Sonymen birge Mamaı aýylynyń jáne Aqoı jigitterinen jasaqtalǵan Kókjaıyqtyń ekinshi quramalarynyń kórsetken óneri de kórermen kóńilinen shyqty.
Darhan BERDIBEK,
Shyǵys Qazaqstan oblysy
Kókpekti aýdany