Qazan aıynyń 10 kúni Polshanyń Baltyq teńizindegi qaqpasy, eldiń iri ǵylymı – mádenı ortalyqtarynyń biri – Gdansk qalasy, Gdansk mýzeıinde QR Ulttyq Mýzeıiniń «Uly Dala murasy: zergerlik óner jaýharlary» atty kórmesi óz jumysyn bastady.
Qazaqstan Respýblıkasy Prezıdentiniń «Rýhanı jańǵyrý» baǵdarlamasynyń negizinde, «Altyn adamnyń álem mýzeılerine sherýi» halyqaralyq kórme jobasynyń aıasyndaǵy shara sheteldik BAQ úshin uıymdastyrylǵan baspasóz konferensııasynan bastaldy. Jýrnalıstermen kezdesý barysynda memleketimiz tarıhynyń saq – savromat kezeńi, sol kóne dáýirden búginge jetip, otandyq ǵalymdardyń qajyrly eńbeginiń arqasynda zerttelip, zerdelengen altyn buıymdar, olardyń jasalý tehnologııasy men erekshelikteri, qazaq halqynyń arǵy babalary bolyp tabylatyn saq taıpalarynyń ómiri men dúnıetanymy turǵysynda keshendi aqparattar berildi. Sonymen qatar, kórmege qoıylǵan qazaq halqynyń kúmisten jasalǵan áshekeı buıymdary da tanystyrylyp, polıak eline jalpy sany 300 - ge taıaý eksponattardyń jetkizilgendigi aıtyldy.
Baspasóz konferensııasynyń sońyn ala QR Polsha Respýblıkasyndaǵy Tótenshe jáne ókiletti elshisi Marǵulan Baımuhan, Gdansk qalasy basshysynyń orynbasary Petr Kovalchýk, Gdansk mýzeıiniń dırektory Leonıd Ossovskıı myrzalardyń, L.N. Gýmılev atyndaǵy EUÝ Arheologııa ǴZI –ń dırektory Maral Habdýlınanyń, QR Mádenıet jáne sport mınıstrligi, QR Ulttyq Mýzeıi ókilderiniń qatysýymen ótken kórmeni ashý saltanatyna: Polsha parlamentiniń depýttattary, shet memleketter elshilikteriniń ókilderi, joǵary oqý oryndarynyń professorlyq – oqytýshylyq quramy, kásipkerler men bilim alýshy jastar qatynasty.
Kelýshilerdiń úlken qyzyǵýshylyǵyn týdyrǵan kórmeniń ashylýy barysynda óner kórsetip, ulttyq jáne álemdik mýzykanyń klassıkalyq týyndylaryn oryndaǵan almatylyq «Sazgen sazy» folklorlyq – etnografııalyq ansambli jınalǵan qaýymnyń yqylasyna bólendi.
Osyǵan deıin Máskeý, Baký, QHR-dyń Sıan shaharlarynda qoıylǵan kórmeniń Gdansk mýzeıindegi jumysy jeltoqsan aıynyń 10 juldyzyna deıin jalǵasatyn bolady.
Jandos Áýelbekuly,
«Egemen Qazaqstan»
Gdansk, Polsha