Aqtaý qalasyndaǵy óńirlik Kásipkerler palatasynda Italııanyń bıznes delegasııasy men mańǵystaýlyq kásipkerler basqosý ótkizdi.
Kezdesý maqsaty - ekijaqty iskerlik qarym-qatynasty damytý. Italııa iskerlik tobyn Lonıgo qalasynyń meri Lýka Restello bastap keldi. Onymen birge Qazaqstandaǵy Italııa elshisiniń orynbasary Marko Ezposto, mer keńesshisi Dıego Markazan jáne «Leızın» halyqaralyq mektebiniń bas dırektory Georgıı Mahvıladze de bar.
Taraptar týrızm, qurylys, aýylsharýashylyǵy, ken óndirý salalaryn birlesip damytýǵa qyzyǵýshylyq tanytyp otyr.
- Memleket basshysy Qazaqstan halqyna arnaǵan Joldaýynda elimizdiń damýyna jańa mindetter júktedi. Elimizge keletin ımportty otandyq ónimmen almastyrý boıynsha jumysty kúsheıtý jáne taýardy eksporttaýshylarǵa qoldaý kórsetý qajettiligin atap ótti. Oblysta syrtqy saýdaǵa shyǵatyn polıetılen qubyrlary, sement jáne ammonıı nıtratynyń eksporty úlken áleýetke ıe. Búgingi tańda Mańǵystaý oblysynyń syrtqy saýda aınalymy 3,5 mlrd. AQSh dollaryn qurady, sonyń ishinde eksport - 3,1 mlrd $, ımport -338,1 mln $. Qazaqstanda saýda áriptestigin nyǵaıtqan alǵashqy úshtikte Italııa tur. Bul elmen Mańǵystaýdyń saýda aınalymy 482,2 mln. AQSh dollaryn qurady, ıaǵnı eksport - 447,1 mln. AQSh dollary, ımport - 35,2 mln. AQSh dollary, dedi Mańǵystaý oblysy kásipkerler palatasynyń dırektory N.Qarasaev.
Syrtqy saýda aınalymynyń negizgi bóligin munaı men munaı ónimderiniń eksporty quraıdy (265,7 mln. AQSh dollar), tabıǵı asfaltqa negizdelgen bıtým qospalary 25 myń AQSh dollaryna jetip otyr. Budan basqa, eksporttyń úles salmaǵyn 54 myń AQSh dollaryn quraıtyn qara metaldardyń jiksiz qubyrlary, tútiksheleri men quımalary tolyqtyrady. Aımaqtaǵy ımport kólemi- 35,2 mln $, sonyń ishinde qubyrlar, kaqpaqtar men qubyrlarǵa arnalǵan jabdyqtar - 10,1 mln $, suryptaý, skrınıng jáne tas bólý úshin jabdyqtar - 10,1 mln. AQSh dollaryna jetti.
Osy jetistikterdi odan ári damytyp, ekijaqty tıimdi qarym-qatynasty kózdegen Lonıgo qalasynyń meri Lýka Restello: «Aqtaý men Lonıgo qalalary arasynda yntymaqtastyqty damytý jónindegi memorandýmǵa qol qoıyldy. Sonyń negizinde óńirde ınvestısııalyq jobalardy damytýdy kózdeımiz. Mádenıet, bilim, sport salalaryna da qosarymyz bar. Aýyl sharýashylyǵyna arnalǵan jobalarymyz da qyzyqtyrýy ábden múmkin, dedi.
Basqosýda sóz alǵan aımaqtyq Kásipkerler palatasy janyndaǵy Mańǵystaý oblysy Isker áıelder keńesiniń tóraıymy Sáýle Salıhova «2007 jyldan beri ınterer, jıhaz jasaýshy 70-ten astam ıtalıandyq kásipkerlermen jumys istep kelemin. Mılanda ótetin barlyq kórmelerge qatysamyn. Ondaǵy zaýyttardyń ınnovasııalyq quraldarmen jabdyqtalǵanyna kózim jetti. Sondyqtan da iskerlik áriptestikti odan ári damytýǵa daıynmyn» dese, oblysta qonaq úıler keshenin damytýshy kásipker Tımýr Abdykarımovtyń aıtýynsha, Mańǵystaýdyń týrıstik áleýeti joǵary. Qazirdiń ózinde qonaqúılerge táýligine 500 adam keledi. Alda úlken keshen qurylysy aıaqtalǵannan soń medısınalyq týrızm ilgerilep, emdeý-saýyqtyrý sharalaryn júrgizip, táýligine 800 adam qabyldaý josparlanǵan. Osy salada ıtalıandyq áriptesterimen tájirıbe almasýǵa daıyn.
Bıznesti birlese damytýdy usynǵan kásipkerler keler jyly sáýirde Italııada ótetin ekonomıkalyq forýmǵa shaqyrtý aldy. Mańǵystaýda teorııalyq turǵyda aıtylyp, qaǵaz júzinde jasalǵan kelisimder sol kezde naqty júzege asady. Investorlar iskerlerge teń dárejede múmkindik jasalady dep sendirip otyr.
Gúlaıym ShYNTEMIRQYZY,
«Egemen Qazaqstan»
Mańǵystaý oblys