Keshe qazaq jurty qaraorman halqynyń qamyn kúıttep, ulttyń uly sózin sóılep ótken asa kórnekti qaıratker, Halyq jazýshysy, Memlekettik syılyqtyń laýreaty Sherhan Murtazadaı aıaýly ulymen qoshtasty.
Memleket basshysy Nursultan Nazarbaev: «Sherhan Murtaza qazaq jýrnalısteriniń birneshe býynyn tárbıelegen ulttyq baspasózdiń bıik báıteregi edi. Qashanda ádildik pen aqıqattyń aldaspany bolǵany úshin qara sózdiń zergeri, shyndyqtyń shyraqshysy atanǵan Sherhan Murtazany halqy «Sheraǵań» dep qadir tutty» dep atap aıtqandaı, qoshtasýǵa qaraqurym el, Sheraǵańnyń shekpeninen shyqqan shákirtteri jınalyp, dara tulǵanyń týysqandaryna, kúlli qazaq jurtyna qaıǵyryp kóńil aıtty.
Almatynyń Muhtar Áýezov atyndaǵy Qazaq memlekettik akademııalyq drama teatrynda qaraly mıtıngini ashqan Qazaqstan Jazýshylar odaǵy basqarmasynyń tóraǵasy aqyn Ulyqbek Esdáýlet aqıqattyń aldaspany, shyndyqtyń shyraqshysy bolǵan Sherhan Murtazanyń Táýelsizdik jyldaryndaǵy qosqan ólsheýsiz úlesi týraly aıta kelip, qaıratker qalamger týraly «Sheraǵam el irgesin bekitýde Elbasymyz bireý, qalǵanymyz tireý bolýymyz kerek dep qıyn-qystaý sátterde Elbasynyń senimdi serigi bola bildi, el bolashaǵy úshin Kók baıraqtyń astyna tize qosýymyz kerek dep qadap aıtty. Onyń artynda urpaqqa mıras bolyp ólmeıtin shyǵarmalary qaldy, arqyraǵan aıbatty, naızaǵaıdaı jarqyldaǵan namysy qaldy» dedi.
Elimizdiń Mádenıet jáne sport mınıstri Arystanbek Muhamedıuly Qazaqstan Prezıdenti Nursultan Nazarbaevtyń «Halyqtyń Sheraǵasyna» aınalǵan nar tulǵaly qalamgerdiń, qarymdy qoǵam qaıratkeriniń aýyr qazasyna baılanysty marqumnyń týǵan-týystary men jaqyndaryna kóńil aıtý jedelhatyn oqyp berdi. Sondaı-aq qoshtasý barysynda Senat Tóraǵasy Q.Toqaevtyń, Májilis Tóraǵasy N.Nyǵmatýlınniń jáne Úkimet basshysy B.Saǵyntaevtyń kóńil aıtý hattary oqyldy.
Almaty qalasynyń ákimi Baýyrjan Baıbek, Sherhan Murtaza týǵan Jambyl oblysynyń ákimi Asqar Myrzahmetov, Májilis depýtaty Saýytbek Abdrahmanov, aqyn Nurlan Orazalın jáne basqalary sóz sóıledi.
Táýelsizdiktiń eleń-alańynda jetpis jyldyq tarıhy bar partııalyq «Sosıalıstik Qazaqstandy» naǵyz halyqtyq «Egemen Qazaqstanǵa» aınaldyrǵan dańqty qalamger Sherhan Murtazanyń denesi Almatydaǵy Keńsaı zıratyna qoıyldy.
Alashtyń aıaýly tulǵasymen qoshtasýǵa arnalǵan qaraly mıtıngi Astanadaǵy «Qazmedıa ortalyǵynyń» kınokonsert zalynda da ótti. Jıynǵa Aqparat jáne kommýnıkasııalar mınıstri Dáýren Abaev, Qazaq televızııasynyń ardagerleri Sultan Orazalın, memleket jáne qoǵam qaıratkeri Myrzataı Joldasbekov qatysyp, qalamgerdiń ómiri týraly jarqyn esteliktermen bólisti.
Atyraý men Altaı, Alataý men Arqa arasyndaǵy qaraorman qazaqpen birge Áýlıeata halqy da ardaqty azamatyn azalady. Qaıratker tulǵamen Taraz qalasyndaǵy «Jeńis» saıabaǵynda Jambyl jurtshylyǵy qımaı qoshtasty. Saıabaqtaǵy Sherhan Murtazanyń úlken portreti salynǵan bannerge áýlıeatalyqtar gúl shoqtaryn qoıyp, marqumnyń rýhyna taǵzym etti.
Talǵat SÚIINBAI,
«Egemen Qazaqstan»
ALMATY