Elbasy Nursultan Nazarbaevtyń Qazaqstan halqyna arnaǵan «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýy qostanaılyqtarǵa erekshe serpin berdi.
Oblys ákimdiginde búgingi ýaqyt úshin ózektiligi asa mańyzdy tarıhı qujatty talqylaýǵa arnalǵan aktıv jınalysynda óńir basshysy Arhımed Muhambetov Joldaý Elbasy Nursultan Nazarbaevtyń elimiz Táýelsizdigin alǵannan beri júrgizip kele jatqan ekonomıkalyq-áleýmettik saıasatynyń jalǵasy bolyp tabylatynyn aıtty.
– Prezıdent alǵa qoıǵan mindetterdi saralaı otyryp, ár sala boıynsha naqty josparlar qurýymyz qajet. Al bul tapsyrmalardy iske asyrý elimiz damýyndaǵy taǵy bir tarıhı kezeń bolyp tabylady, – dedi Arhımed Begejanuly.
Májiliste sóz alǵan Qazaqstannyń Eńbek Eri Saıran Buqanov agroónerkásip kesheniniń áleýetin tolyq iske asyrýdaǵy alǵa qoıǵan mindetterdiń mańyzdylyǵyna toqtaldy.
– Elbasy Joldaýda agroónerkásip keshenindegi eńbek ónimdiligin jáne qaıta óńdelgen aýylsharýashylyq óniminiń eksportyn 2022 jylǵa deıin 2,5 ese kóbeıtý qajet ekenin aıtty. Bul mindetter údesinen shyǵý úshin aýyl sharýashylyǵynda qolǵa alar, sheshimin kútken kóp is bar. Biz egindi ósirýdi úırendik. Biraq egin zııankesterimen kúresti tıimsiz júrgizýden, zamanaýı tehnıkalardyń jetkiliksizdiginen ónimdi jınaý merzimin sozyp alady da, sharýashylyqtar 20-30 prosentke deıin shyǵynǵa ushyraıdy. Sondyqtan aldaǵy bes jylda alynǵan tehnıkaǵa sýbsıdııany 25 prosentten 50 prosentke deıin maqsatty túrde ulǵaıtsa bul agroónerkásip keshenine óte tıimdi qoldaý bolar edi, – dedi Saıran Balkenuly.
Elbasy Joldaýda «Nurly jer», «7-20-25» baǵdarlamalarynyń jalǵasyn tabýyn jáne turǵyn úıdi adamdarǵa barynsha qoljetimdi etýdi tapsyrǵany belgili. Qostanaı oblysynda 2018 jyly «Nurly jer» aıasynda 290,9 myń sharshy metr turǵyn úı salynady, bul ótken jylǵy osy merzimmen salystyrǵanda 10 prosentke kóp.
– Halyqtyń áleýmettik az qorǵalǵan bóligi úshin jalǵa beriletin turǵyn úı qurylysyna Qarjy mınıstrligi Qostanaı oblysyna aldyn ala 2,6 mlrd teńge bólýdi qarastyryp qoıdy. Bul jalǵa beriletin úı qurylysyn aldaǵy jyly eki ese ósirýge múmkindik beredi, ıaǵnı baspanaǵa zárý 500 adam páterli bolady, – dedi oblystyq Qurylys, sáýlet jáne qala qurylysy basqarmasynyń basshysy Nurlan Qatarbekov.
Joldaýda Elbasy jastar saıasatyna jańa betburys berdi. Qostanaıda jastardyń 77 úkimettik emes uıymy, 38 áskerı-patrıottyq klýby jumys isteıdi. Ideologııalyq aktıvte aldaǵy ýaqytta oblystaǵy jastardyń barlyq memlekettik baǵdarlamalar men jobalarǵa belsene qatysýyn qamtamasyz etý úshin jastar uıymdaryn qarjylandyrýdy arttyrý kerektigi aıtyldy.
Oblys ákimi Arhımed Muhambetov jınalysty tujyrymdaı kele, aldymen oblysta aqparattyq-nasıhat tobyn quryp, aýdandar men qalalarǵa, barlyq eldi mekenderge shyǵyp, Joldaýda aıtylǵan máselelerdi halyqqa keńinen túsindirý kerektigin tapsyrdy. Sonymen qatar qujattaǵy aıtylǵan máselelerge oraı oblysta ár sala boıynsha aldaǵy ýaqytta atqarylar isterdi atap ótti.
Názıra JÁRIMBET,
«Egemen Qazaqstan»
QOSTANAI