Memleket basshysy Nursultan Nazarbaev óziniń jýyrdaǵy Qazaqstan halqyna Joldaýynda 2019 jyldy Jastar jyly dep jarııalaǵan bolatyn. Aqtóbe oblysy Joldaýdy júzege asyrý sharalarynyń josparyn ázirleýge kirisip ketti. Jospar jas urpaq ókilderiniń múddelerin eskere otyra jasalýda. 12 qazan, juma kúni oblys ákimi Berdibek Saparbaev óńirdegi neǵurlym belsendirek jastardyń pikirleri men tilekterin tyńdady.
Kezdesýge oblys basshysymen qosa 55 adam qatysty. Olar – Nazarbaev ıntellektýaldy mektebi men jetekshi mamandandyrylǵan mektep-ınternattardyń oqýshylary, eriktiler, sportshylar, jas jýrnalıster, kásipkerler men qoǵam qaıratkerleri.
- Sizderge jáne sizderdiń qurdastaryńyz úshin el Prezıdentiniń bastamasymen 2019 jyly jeke basyńyzdyń ósýine, sizderdiń týǵan halqyńyz ben týǵan elińizdiń gúldenýine ózderińiz úles qosýlaryńyz úshin jańa múmkindikter ashylady. Árqaısysymyz memleket basshysynyń bastamasyna, eń aldymen, gúldengen, zamanaýı, myqty memlekettiń azamaty bolý úshin, ózimiz úshin kirisýimiz kerek», - dedi kezdesýdiń ashylýynda Berdibek Saparbaev.
Belsendiler oblys ákimimen áńgime kezinde oblys aýdandarynda aǵylshyn tiliniń áleýmettik mektepterin ashý, eriktiler qozǵalysyn kúsheıtý, jastar úshin mobıldi qosymsha ázirleý nemese olımıada qatysýshylary úshin jazǵy mektepter ashý syndy birneshe tájirıbelik jobalardy usyndy.
Júzdesýdi túıindegen oblys ákimi kezdesý kezinde kóterilgen barlyq suraqtardyń ózekti jáne mańyzy zor ekenin atap ótti.
- Sizderdiń búgingi usynystaryńyz – mańyzdy ári qyzyqty. Jastar qashanda batyl ári serpindi ıdeıalardyń generatory bolǵan. Jáne búgin bizge sizderdiń belsendilikterińiz qajet. Oqý oryndarynda, jumysta qurdastaryńyzben olardy ne qyzyqtyratyny jáne ne tolǵandyratyny jaıynda tildesińizder. Olardyń aıtqandaryn jınap, jastar isi jónindegi basqarmaǵa jiberińizder. Bul mekeme bárin saraptap, biriktiredi. Barlyq ózekti ıdeıalar qarasha aıynda ázirlenetin Jastar jyly josparynyń is-sharalaryna engiziledi,-dedi Berdibek Saparbaev suhbattasýshylaryna qarata aıtqan sózinde.
Búginde josparǵa jastar arasyndaǵy kásibı baǵdarlaý jumysy, Nazarbaev ıntellektýaldy mektebiniń tájirıbesin ózge oqý oryndaryna taratý, iri jáne orta kásiporyndarda jastar birlestikterin qurý sharalarynyń keń shoǵyry kiretini belgili.
Aıta ketý kerek, Aqtóbe oblysyndaǵy Jastar jyly «Baqytty bala» óńirlik jobasynyń jalǵasy bolmaq. Osy jyldyń basynan beri atalmysh joba aıasynda 100 myńnan asa balalar men jasóspirimderdiń qatysýymen 3 300-den astam sharalar júzege asyryldy. Oblys boıynsha 23 IT-synyp ashylyp, bilim berý, mádenıet jáne sport nysandarynyń materıaldyq-tehnıkalyq bazasy nyǵaıdy. 177 jańa sport jáne oıyn alańdary quryldy. Myńdaǵan jetim jáne ata-ana qamqorynsyz qalǵan balalardyń turǵyn úı jınaq esepshottary 80 mln teńgege tolyǵyp, 81 jetim balaǵa jańa páterler men úılerdiń kiltteri tabys etildi. Osynyń barlyǵy «Baqytty bala» jobasy aıasynda júzege asyrylǵan ıgi isterdiń bir bóligi ǵana.