Memleket basshysynyń halyqqa bıylǵy Joldaýy elimizdiń damýyna tyń serpin beredi. Osy mańyzdy qujat aıasynda Atyraý oblysynda da birqatar ıgi ister qolǵa alynady. Oblys aktıviniń jınalysynda aımaq basshysy Nurlan Noǵaev Joldaýda aıqyndalǵan mindetterdi júzege asyrý jaıyn baıandady.
Munaıly óńirde halyqtyń jan basyna shaqqandaǵy jalpy óńirlik ónim 2 638,5 myń teńge kóleminde qalyptasty. Bul – elimiz boıynsha eń joǵary kórsetkish. Atyraý aımaǵy áleýmettik-ekonomıkalyq turǵydan tabysty damyp keledi.
– Memleket basshysy «Bıznestiń jol kartasy-2020» baǵdarlamasyn 2025 jylǵa deıin uzartýdy tapsyrdy. Bul taǵy da kóp jobalardy júzege asyrýǵa, sol arqyly kásipkerlikti damytýǵa múmkindik beredi. Atalǵan baǵdarlama iske asa bastaǵan ýaqyttan beri, ıaǵnı 2010-2018 jyldar aralyǵynda 1158 kásipker 81,3 mlrd teńge kóleminde memlekettik qoldaýǵa ıe boldy, – dedi Nurlan Noǵaev. – Bul 5,7 myńnan astam jańa jumys ornynyń ashylýyna septigin tıgizdi.
Jyl basynan beri aımaqtaǵy bıznes-qurylymdarmen jalpy somasy 182,6 mlrd teńgeniń ónimi óndirildi. Memlekettik qoldaý baǵdarlamalary kásipkerlerge jańa óndiris oryndaryn ashýǵa serpin berip otyr. Qazir óńirdegi shaǵyn jáne orta bıznes sýbektileriniń sany 57 myńǵa jetti. Bıznesti júrgizýge qolaıly jaǵdaı jasaý úshin oblys ortalyǵynda, barlyq aýdandarda kásipkerlerdi qoldaý ortalyqtary ashyldy.
– Elbasy halyqty alańdatatyn máselelerge jeke-jeke toqtaldy. Birinshi kezekte turǵyn úı-kommýnaldyq sharýashylyq salasyndaǵy tarıfter máselesi mańyzdy. Atyraý oblysy boıynsha kommýnaldyq qyzmet tarıfteri, sonyń ishinde elektr energııasy, sý jáne káriz qyzmetteri boıynsha bıyl ósý deńgeıi bolǵan joq, – dep atap ótti Nurlan Noǵaev. – Joldaýdyń taǵy bir baǵyty eksportqa baǵdarlanǵan ındýstrııalandyrý máseleleri. Oblysta 44 kásiporyn eksportqa baǵyttalǵan ónim shyǵarady. Jyl basynan beri 152,4 mln dollardyń taýary óndirildi. Atalǵan kásiporyndardyń belsendiligin arttyrý boıynsha jumys júrgizip jatyrmyz.
Atyraý negizinen munaıly aımaq bolǵanymen, aýyl sharýashylyǵyn damytýǵa da aıryqsha kóńil bólinedi. Joldaýda kórsetilgen agroónerkásip kesheniniń áleýetin iske asyrý boıynsha eńbek ónimdiligin jáne qaıta óńdelgen aýyl sharýashylyǵy óniminiń eksportyn 2022 jylǵa 2,5 ese kóbeıtý jospary qoıylyp otyr. Oblys ákimi 7 075 gektar egistik alqaby elektrondy kartaǵa engizilgenin aıtty. Joldaý júktegen mindetter qatarynda dástúrli emes energııa kózderin engizý, halyq tutynatyn taýarlardy shyǵarýdy damytý da bar. Oblys kóleminde jańartylǵan energııa kózderin damytý maqsatynda Isataı aýdanyndaǵy Manash eldi mekeninde qýaty 52,8 MVt jel elektr stansasynyń qurylysy júrip jatyr.
Atyraýdaǵy bilim berý salasynyń ózekti máseleleri – apatty jaǵdaıdaǵy mektepter men úsh aýysymdy mektepter. Qazir bes apattyq jaǵdaıdaǵy mektep bar. Bul jaǵdaıdan shyǵý maqsatynda bir mektep qurylysy júrýde, eki mektep qurylysynyń jobalyq-smetalyq qujattary daıyn, eki mektep qurylysynyń qujattary jasaqtalýda. Oblysta úsh aýysymda oqıtyn 14 mektep bar. Bul máseleni de sheshýdiń joldary qarastyrylyp, jańa mektepter salynyp jatyr.
Joldaýda ómir súrýge jaıly orta qalyptastyrý týraly da aıtylǵan. Elbasynyń bes áleýmettik bastamasy aıasynda bastalǵan «7-20-25» baǵdarlamasy óńirde sátti iske asyrylýda. Búginge deıin 1024,9 mln teńgege 80 ótinim túsip, 707 mln teńgeniń 55 ótinimi maquldanǵan.
Aktıv jıynynda aýmaqtyq damý, polısııa qyzmetin ońtaılandyrý týraly da aıtyldy. Al bıylǵy Joldaýdyń ereksheligi – Elbasy halyqtyń turmys-tirshiligin odan ári jaqsartýǵa, tabys kózin molaıtýǵa baǵyttalǵan birneshe mindetti alǵa qoıyp otyr. Al olardy atqarýǵa munaıly aımaqta múmkindik jetkilikti.
Baqytgúl BABASh,
«Egemen Qazaqstan»
Atyraý oblysy