Qazaqstan Prezıdenti Nursultan Nazarbaev álemdik jáne dástúrli dinder kóshbasshylarynyń basyn qosý arqyly álemdik máselege beıjaı qaramaıtynyn bildirip, máseleniń negizin jete túsinip otyr.
Sondyqtan osyndaı aýqymdy shara uıymdastyrǵan Prezıdent Nursultan Nazarbaevqa alǵys aıtamyn. Álemdik jáne dástúrli dinder kóshbasshylarynyń pikirlesýine múmkindik jasaý – beıbitshilik týraly qur sózden naqty iske kóshýge shaqyrýdyń shynaıy kórinisi.
Ekstremıstik pıǵyldaǵy adamdardy qatarǵa qosý ońaı sharýa emes. Olardy túzetý jumystary jyldarǵa sozylady. Meniń oıymsha, zorlyq-zombylyqtyń betin senim tájirıbesimen qaıtarýǵa múmkindik bar. Ol úshin adamdardyń júregine ıman uıalatý kerek. Bul týraly XV ǵasyrdyń ózinde krest joryqtaryna qarsy shyqqan kardınal Nıkolaı Kýzanskıı de aıtyp ketken. Onyń senim men beıbitshilik týraly traktaty álemge degen súıispenshilikke toly, ózge dinderdiń ókilderine ashyqtyǵy tamsandyrady.
Osy konferensııaǵa jınalǵandardyń bári álemde beıbitshilik pen qaýipsizdik ornaǵanyn qalaıtyn dinı basshylar. Olar saıasatkerlermen bir qatarda adamzattyń izgi maqsaty úshin jumys isteýi kerek.
Álemdegi dinder arasynda yntymaqtastyq pen áriptestik ornatý úshin barsha múmkindikter qarastyrylǵan. Shartaraptyń qaı buryshynda bolsyn, kez kelgen din beıbitshilikke shaqyrady.
Qurannyń aıattarynda da bul týraly aıtylǵan. Beıbit ómirge birge qadam basyp, ony taratý qajettigine basa nazar aýdarylady. Bul Allanyń musylmandarǵa ǵana emes, barsha adamzatqa qarata aıtqan sózi.
Sheıh Ravıl GAINÝTDIN,
Reseı múftıler keńesiniń tóraǵasy