Jýyrda el Úkimetiniń sheshimimen Jambyl oblystyq fılarmonııasyna áıgili aqyn, ataqty kompozıtor Kenen Ázirbaevtyń esimi berilgen edi. Bul jańalyq Áýlıeata óńiri úshin úlken jańalyq boldy.
Atalǵan óner ordasynyń qabyrǵasynda talaı ónerpaz qyzmet atqaryp, óner álemine joldama alǵan. Bıyl Kenen Ázirbaev atyndaǵy Jambyl oblystyq fılarmonııasyna elý jyl toldy. Jarty ǵasyrlyq belesti baǵyndyrǵan óner ordasy óziniń mereıtoıyn Taraz tórinde atap ótti.
Mereıtoıǵa Kenen aqynnyń uly Baqytjan Kenenuly men Tórtken Kenenqyzy arnaıy qatysty. Sonymen qatar Qazaqstannyń eńbek sińirgen qaıratkeri Jabal Erǵalıev te keldi. Áýeli mereıtoı baspasóz máslıhatymen bastaldy. Munda Jambyl oblystyq mádenıet, arhıvter jáne qujattama basqarmasynyń basshysy Dúısenáli Byqybaev Áýlıeata óńiri úshin fılarmonııanyń Kenen esimin ıelenýi aıtarlyqtaı oqıǵa ekenin jetkizse, Tórtken Kenenqyzy aqyn atyn ardaqtaǵan halyqqa, óner ordasyna aqyn esimin berýge atsalysqan azamattarǵa alǵysyn bildirdi. О́z sózinde Jabal Erǵalıev Kenen ısi qazaqqa ortaq tulǵa ekenin atap ótti.
Al Baqytjan Kenenuly aqyn atynyń máńgi óshpeıtinin, Kenen atyndaǵy «Shyrqa, daýysym!» baıqaýynyń turaqty ótkizilip kele jatqanyn tilge tıek etse, «Qurmet», «Parasat» ordeniniń ıegeri, kúıshi Ábdimomyn Jeldibaev óner áleminde Kenen keńistiginiń bólek ekenin atap ótip, Shý aýdany ákiminiń quttyqtaý hatyn tapsyrdy. О́z kezeginde Kenen Ázirbaev atyndaǵy fılarmonııanyń elý qyzmetkerine Jambyl oblysy ákiminiń Qurmet gramotasy, oblystyq mádenıet, arhıvter jáne qujattama basqarmasy basshysynyń Alǵys haty jáne ózge de marapattar berildi. Sonymen qatar baspasóz máslıhaty barysynda «Án qanatyndaǵy Áýlıeata» kitaby men «Áýeni ásem Áýlıeata» CD jınaǵynyń tusaýy kesildi. Sonymen qatar Kenen beınesi salynǵan kilemshe tanystyryldy.
Budan keıin mereıtoılyq shara oblystyq fılarmonııa ónerpazdarynyń qatysýymen «Áýeni ásem Áýlıeata» atty gala-konsertpen jalǵasty. Munda kópshilikke «Jarty ǵasyr – jalyndy sát» atty derekti fılm kórsetildi. Kesh barysynda Kenen Ázirbaev beınesi somdalyp, ánderi shyrqalyp, «Qulaq» kúıi tartyldy. Al saltanatty shara kezinde Jambyl oblysy ákiminiń orynbasary Erqanat Manjýov elimizdiń Mádenıet jáne sport mınıstri Arystanbek Muhamedıulynyń quttyqtaý hatyn fılarmonııa dırektory Seıitqasym Túktibaevqa tapsyrdy. Bul rette ol birqatar ónerpazdardy oblys ákiminiń Qurmet gramotasymen, Alǵys hatymen jáne mınıstrdiń Alǵys hattarymen marapattady.
Mereıtoı kezinde Baqytjan Kenenuly júrekjardy lebizin bildirip, Úkili Ybyraıdyń, Aqan seriniń elinen kelgen Jabal Erǵalıevtiń ıyǵyna shapan jaýyp, qurmet kórsetti. Al Jabal Erǵalıev óz kezeginde Erqanat Manjýovqa Keńes Odaǵynyń Batyry, jazýshy, ǵalym Málik Ǵabdýllın týraly bes tomdyq kitap syılady.
Hamıt ESAMAN,
«Egemen Qazaqstan»
Jambyl oblysy