Astanadaǵy Nazarbaev ortalyǵynda 100-den asa jas jýrnalıstiń basyn qosqan «Jas Qalam» forýmy ótti.
Forým jumysyna Tuńǵysh Prezıdent Qorynyń dırektory, Parlament Senatynyń depýtaty, Senattyń Halyqaralyq qatynastar, qorǵanys jáne qaýipsizdik komıtetiniń tóraǵasy Darıǵa Nazarbaeva, Aqparat jáne kommýnıkasııalar mınıstri Dáýren Abaev qatysty.
Jıynnyń resmı ashylýynda Darıǵa Nazarbaeva: «Jyl saıyn Tuńǵysh Prezıdent – Elbasynyń qory men Qazaqstan jastar kongresi qoǵam úshin mańyzdy jobalardy júzege asyryp keledi. Solardyń qatarynda búgingi zamanda ózekti máselelerdi aıqyndaıtyn – «Jas qalam» jobasy. Bul jobanyń mańyzdylyǵy sapaly jáne shynaıy aqparattardy anyqtaýǵa, elimizdiń jas mamandarynyń turaqty qyzmette áleýetin damytýǵa arnalǵan. Qazirgi tańda jýrnalıstıkanyń jańa trendteri óte kóp jáne osy jańalyqtardy jastarǵa elimizdiń tek kásibı, joǵary sanatty eń úzdik jýrnalısteri ǵana jetkize alady. Sondyqtan «Jas qalam» ýnıversıtette alǵan bilimge qosa jýrnalıstıka salasyn is júzinde damytyp jatqan sheberlerdiń tájirıbesinen úlgi alýǵa mol múmkindik beredi», dedi.
Sondaı-aq ol jýrnalıstıka kóptiń qyzyǵýshylyǵyna ıe bolǵanyn jáne qoǵamdy buqaralyq aqparat quraldarynsyz elestetý múmkin emes ekenin aıtyp, «Jas qalam» qatysýshylarǵa elimizdegi qoǵamdyq, saıası, ekonomıkalyq oqıǵalardyń, derekterdiń shynaıylyǵyn tekserý, jaǵymsyz kontentpen jumys isteý, qazirgi zamanǵy aqparattyq tehnologııalardy qoldaný týraly aqparat alýǵa, jas jýrnalısterdiń róli, mass-medıadaǵy ózgerister týraly jýrnalıstik qyzmette tájirıbe jınaýǵa múmkindik beretinin atap ótti, dedi. Sonymen qatar ol jýrnalısterdi ekonomıka, quqyq syndy kúrdeli salalardy halyqqa túsinikti tilde jetkizýge shaqyrdy.
Bolashaǵyn qalammen baılanystyryp, medıa salasyn baǵyndyrýǵa bet burǵan jas jýrnalısterge Aqparat jáne kommýnıkasııalar mınıstri Dáýren Abaev: «Qalamnyń ıesi bolý, myqty jýrnalıske aınalý aıtýǵa ǵana ońaı. Ol úshin kóp izdenis, tájirıbe qajet. Sondyqtan búgingi forýmnyń mańyzdylyǵy joǵary ári sizderge bereri kóp bolmaq. Osyndaı ashyq dıalogtyq alańdar qanattaryńyzdy qataıtady, talaptaryńyzdy shyńdaıdy», dedi. Sóz sońynda Aqparat jáne kommýnıkasııalar mınıstrligi jastarǵa ári jýrnalıstıkaǵa qatysty bastamalardy qoldaýǵa ázir ekenin jetkizdi.
Forým barysynda jas jýrnalıster tis qaqqan tilshilerdiń arnaıy trenıngterine qatysty. Televızııa salasy boıynsha «Habar» agenttiginiń bas redaktory Saıat Jóken, «Qazaqstan» telearnasynyń dırektory Erkin Muhamedjanov, «Atameken» bıznes arnasynyń dırektory Qanat Saharııanov, «7 arnanyń» bas prodıýseri Narıman Qoıshybaev dáris oqydy. Al «Qazaqparat» agenttiginiń dırektory Asqar Omarov pen «Egemen Qazaqstan» AQ basqarma tóraǵasy Darhan Qydyráli baspasóz jáne aqparat agenttigindegi jazý sheberlikteri boıynsha trenıng ótkizdi. Aıta ketý kerek, Tuńǵysh Prezıdenti Qory men Qazaqstan jastar kongresi uıymdastyrǵan «Jas Qalam» jastar jobasynyń jas jýrnalısterdiń kásibı biliktiligin arttyrýǵa baǵyttalǵan jobanyń forýmdar toptamasy Almaty, Taraz jáne Semeı qalalarynda ótken bolatyn. О́ńirlerde ótkizilgen forýmdarǵa 500-den asa jas qatysty.
Aqmaral AǴZAMQYZY
«Egemen Qazaqstan»