Aqtaý qalasynda Mańǵystaý oblysy mádenıet basqarmasynyń bastamasymen, Mańǵystaý oblysy ákimdiginiń qoldaýymen Qazaqstannyń eńbek sińirgen ártisi, Qurmanǵazy atyndaǵy Qazaq ulttyq konservatorııasynyń Qurmetti professory, «Qurmet» ordeniniń ıegeri, kúıshi Roza Aıdarbaevanyń shyǵarmashylyǵyna arnalǵan respýblıkalyq qyz-kelinshekter baıqaýy ótedi.
Baıqaý shartynyń basty ereksheligi – úmitkerdiń jas mólsherine, kásibı bilimine, mamandyǵyna shekteý qoıylmaıdy.
Eki kúnge sozylatyn óner saıysyna Qaraǵandy, Aqtóbe, Atyraý, Qyzylorda, Shyǵys Qazaqstan, Mańǵystaý, Batys Qazaqstan oblystarynan jáne Astana, Almaty qalalarynan barlyǵy 23 úmitker qatysady.
Roza Aıdarbaevanyń ózi basshylyq etetin qazylar alqasynyń quramynda Qazaqstannyń eńbek sińirgen qaıratkeri, Qurmanǵazy atyndaǵy Qazaq ulttyq konservatorııasynyń professory Kárıma Saharbaeva, QR mádenıet qaıratkeri, Qazaq Ulttyq óner ýnıversıtetiniń oqytýshysy Kúlperızat Ultaraqova, Qazaqstannyń eńbek sińirgen qaıratkeri, Abyl Taraquly atyndaǵy ult aspaptar orkestriniń kórkemdik jetekshisi jáne bas dırıjeri Rahat Mádireev, memlekettik «Serper» jastar syılyǵynyń ıegeri, QR Tuńǵysh Prezıdenti–Elbasy qorynyń laýreaty, Qurmanǵazy atyndaǵy Qazaq memlekettik akademııalyq halyq aspaptary orkestriniń bas dırıjery Abylaı Tilepbergenov jáne Abyl Taraquly atyndaǵy ult aspaptar orkestriniń ártisi Ǵalııa Qojabergenova bar.
Júldegerler baǵaly syılyqtarmen marapattalmaq.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy