«Azııalyq Oskar» retinde tanylǵan, jyl saıyn ótetin «Asia Pacific Screen Awards» beldi kınojúldesi úmitkerlerdiń tizimin jarııalady. Qazaqstandyq rejısser Emır Baıǵazınniń «О́zen» fılmi «Rejıssýradaǵy tabystar» nomınasııasy boıynsha osy tizim ishinen kórindi. 12-Asia Pacific Screen Awards júldesiniń jeńimpazdarynyń esimi 29 qarashada Avstralııanyń Brısben qalasynda jarııalanady.
Ilgerirekte, 2013 jyly Emır Baıǵazın «Aslannyń sabaqtary» fılmimen dál osy atalymda baq synap, joǵary júldege ıe bolǵan edi.
Odan bólek, «О́zen» fılmi Los-Andjeleste ótetin Asian World film festival kınofestıvaliniń konkýrstyq baǵdarlamasyna qatysady. Sondaı-aq, atalǵan kınotýyndy Varshavadaǵy jáne San Paolodaǵy festıvaldiń arnaıy baǵdarlamalarynda kórsetiledi. Al «О́zen» fılminiń azııalyq tusaýkeseri ústimizdegi jyly qazannyń 25-i men qarashanyń 3-i aralyǵynda Tokıodaǵy halyqaralyq kınofestıvaldiń konkýrstyq baǵdarlamasy sheńberinde ótedi.
– «О́zen» fılmine qatysty jańalyqtar meni jáne meniń komandamdy, árıne, qýantady. Osy oraıda, jumys tobyna alǵysymdy bildiremin. Olar tek maǵan emes, meniń ıdeıalaryma qashan da adal. Sondaı-aq, maǵan qoldaý kórsetip, senim bildirgen Mádenıet jáne sport mınıstrliginiń basshylyǵyna da alǵys aıtamyn. Bolashaqta da qarym-qatynastarymyz nyǵaıyp, ortaq tabystarǵa qol jetkizetinimizge senimdimin, – dedi rejısser.
Fılmniń jaryqqa shyǵýyna birneshe memlekettiń kınostýdııalary qatysty, olar: Qazaqstan (QR Mádenıet jáne sport mınıstrligi, Sh.Aımanov atyndaǵy «Qazaqfılm» AQ, Emir Baigazin Production), Norvegııa (Norsk Filmproduksjon) jáne Polsha (Madants). Bul týyndy ssenarıı kezinde MPA APSA Azııa-Tynyq muhıttyq kınoqaýymdastyǵy grantynyń qoldaýyna ıe boldy. 2017 jyly qyrkúıekte kınojoba Varshava halyqaralyq kınofestıvali kınonaryǵynda Pitch and Meet jobalar baıqaýynda birinshi oryndy ıelengen bolatyn. Kartınanyń qortyndy jumystary 2018 jyly jaz aıynda Polsha kınematografııa ınstıtýtynyń qarjylaı kómegimen Varshavadaǵy Orka jáne Dreamsound stýdııalarynda júrgizilgen.
«О́zen» fılminiń álemdik tusaýkeseri Venesııa kınofestıvali sheńberinde ótken bolatyn. Bul festıvaldiń «Kókjıekter» baǵdarlamasynda Emır Baıǵazın úzdik rejısser atandy. Al fılmniń Soltústik Amırıkadaǵy tusaýkeseri ústimizdegi jyly qyrkúıek aıynda Halyqaralyq Toronto kınofestıvali aıasynda ótti. Kınotýyndy festıvaldiń «Tuǵyrnama» («Platforma») konkýrstyq baǵdarlamasynda kórsetilip, qazylar alqasynyń qurmetti atalymyna jáne Screen Daily táýelsiz kınosynshylardyń reıtıngi tiziminde aldyńǵy qatardan kórindi. Odan bólek, «О́zen» fılmi úshin Emır Baıǵazın Gollıvýdtyń shetel baspasózi qaýymdastyǵynyń grantyna ıe boldy. «О́zen» fılmi órkenıetten alys jerde turatyn, qaladan kelgen qonaqtan keıin ómirleri kúrt ózgere bastaǵan bes aǵaıyndy týraly baıandaıdy.
Aıgúl AHANBAIQYZY,
«Egemen Qazaqstan»
ALMATY