Qaraǵandyda belgili ánshi, sazger Qorabaı Esenovtiń mereıtoılyq konserti ótti.
Keshke arnaıy kelip qatysqan oblys ákimi Erlan Qoshanov óziniń quttyqtaý sózinde Qorabaı Esenov ánderiniń ulttyq mýzyka óneriniń altyn qoryna enip, shyn máninde halyq ıgiligine aınalǵanyn atap ótti.
– Men sizdiń shyǵarmashylyǵyńyzben bala kezimnen tanyspyn. Sizdiń talantyńyzdy dáripteıtin adamdardyń birimin. Siz bizdiń, aǵalarymyzdyń kýmıri bolǵansyz. Sizdiń ánderińiz negizinen sol ýaqyttaǵy romantızmdi sıpattaıdy, ol kezderi jastar móldir, taza sezimderge, mahabbatqa toly bolatyn. Qorabaı aǵa, halyq sizdi sol úshin jaqsy kóredi, sizdiń ánderińiz qazaq radıosynyń altyn qorynda saqtalǵan, – dedi Erlan Qoshanov.
О́ńir basshysy jetpiske jasy jetken mereıtoı ıesiniń ıyǵyna shapan jaýyp, syı-qurmet kórsetti.
Shyǵarmashylyq keshke ánshi Ǵalym Muhamedın, QR eńbek sińirgen ártisi, ánshi Serik Ospanov, QR eńbek sińirgen qaıratkeri Janǵalı Júzbaev jáne mereıtoı ıesiniń shákirti, ánshi Seıil Aıaǵanov syndy óner salasynyń maıtalmandary qatysyp, kesh kórigin qyzdyrdy.
Qorabaı Esenov Jańaarqa aýdanynyń týmasy. Áýesqoı ánshi-kompozıtordyń on jeti jasynda jazǵan «Jas qalam» áni ótken ǵasyrdyń 60-70-shi jyldary jastar arasynda erekshe tanymal bolǵan. Osy «Jas qalam» jáne «Qoshtasý» ánderi kompozıtordyń erekshe týyndylaryna aınalyp, onyń esimin búkil elge áıgili etti.
Qaırat ÁBILDA,
«Egemen Qazaqstan»
QARAǴANDY