Kalınıngrad qalasynda «Reseıdiń sıfrly bolashaǵy» ınjenerlik-tehnıkalyq shyǵarmashylyq festıvali aıasynda robot tehnıkasy boıynsha ótken halyqaralyq chempıonatta Qaraǵandy oblysynyń komandasy úsh altyn jáne bir qola medal jeńip aldy.
Baıraqty dodada tuńǵysh ret baq synaǵan Qaraǵandy komandasynyń sapynda 10-15 jas aralyǵyndaǵy jeti oqýshy el namysyn qorǵady. Olardyń arasynda qaladaǵy №38 mektep-gımnazııanyń oqýshylary jáne «RoboClub» robot tehnıkasy mektebiniń tárbıelenýshileri boldy.
Qaraǵandylyq oqýshylar «Sýmo» jáne «Robofýtbol» atalymdary boıynsha bilim synasqan bolatyn. Robottar sýmosy – «Lego» bólshekterinen qurastyrylǵan eki robottyń bir-birin belgilengen sheńberden yǵystyryp shyǵarýy baǵdarlamalanǵan pán. Al «Robofýtbolda» robottardan quralǵan komandalar ózara saıysqa túsedi. Olardyń maqsaty – belgilengen ýaqyt ishinde qarsylas qaqpaǵa meılinshe kóp gol soǵý.
Osymen ekinshi ret uıymdastyrylǵan chempıonat qorytyndysynda «Robofýtbol» atalymy boıynsha juptasyp óner kórsetken Davıd Shýralev pen Stanıslav Bone, Danııl Pınıgın men Evgenıı Lýkıanov, sondaı-aq Ilıa Povetın men Danııl Mýllerov toptary úzdik shyqty. Quramanyń eń jas múshesi 10 jasar Andreı Mashkın «Sýmo» atalymynda qola júldege qol jetkizdi.
Qaırat ÁBILDA,
«Egemen Qazaqstan»
Qaraǵandy