Oralda Jáńgir han atyndaǵy Batys Qazaqstan agrarlyq-tehnıkalyq ýnıversıtetinde Stýdentterge qyzmet kórsetý ortalyǵy ashyldy. Ortalyq stýdentterge anyqtama, transkrıpt, dıplom telnusqalary beredi, bilim alýshylardy oqý pánderine tirkep, granttar men shákirtaqylarǵa ótinish qabyldaıdy – barlyǵy 35 túrli qyzmetti «bir tereze» qaǵıdasy boıynsha kórsetedi.
Batys Qazaqstan oblysynda tuńǵysh ashylyp otyrǵan ortalyqqa óńir basshysy Altaı Kólginov arnaıy keldi. JOO rektory Asqar Námetov bıyl ashylǵanyna 55 jyldyǵyn atap ótken irgeli bilim ordasynda qolǵa alynǵan «SMART ýnıversıtet» jobasy týraly áńgimeledi.
- Osy ortalyqtyń arqasynda biz ýnıversıtettegi «Smart university» jobamyzdy bastap otyrmyz. Bul ortalyqta stýdentterge de, oqytýshylarǵa da avtomatty qyzmet úlgisin kórsetedi. Bul baǵyttaǵy jumystarymyz jalǵasa beredi, - dedi Asqar Námetov.
- Elbasymyz kelesi jyldy «Jastar jyly» dep atady. Jastarǵa eń basty qoldaý – memleketimizdiń bilim alýǵa, kásip úırenýge barlyq múmkindikti jasaýy. Prezıdentimiz táýelsizdiktiń alǵashqy jyldarynan-aq bilimge erekshe kóńil bóldi. «Bolashaq» baǵdarlamasy paıda boldy, «Nazarbaev» ýnıversıteti ashyldy, zııatkerlik mektepter ashyldy, lıseıler ashyldy. Olar qural-jabdyqpen qamtamasyz etilip, qanshama grant bólinip jatyr. Bes áleýmettik bastama boıynsha bıyl taǵy da qosymsha grant bólindi. Ol granttyń ıegerleri bizdiń óńirde de, osy ýnıversıtette de bar. Memleket jyl saıyn jastarǵa jańa keńistik ashyp otyr. Eń basty kózdegen maqsat – sapaly bilim, biz aldyńǵy qatarly memleketterdiń tizimine engimiz kelse, oǵan tek qana bilim kerek! Basqa jol joq! Sondyqtan búgin ashylǵan stýdentterge qyzmet kórsetý ortalyǵy da bilim sapasyn arttyrýǵa sep bolady dep oılaımyz, - dedi Altaı Kólginov ortalyqtyń ashylý saltanaty kezinde.
Stýdentterge qyzmet kórsetý ortalyǵynyń lentasyn «Rýhanı jańǵyrý» ortalyǵynyń professory, fılosofııa ǵylymdarynyń doktory Tilekjan Rysqalıev pen mashına jasaý fakýltetiniń 4 kýrs stýdenti, Qazaqstan Respýblıkasy Prezıdenti atyndaǵy shákirtaqy ıegeri, JOO arasynda ótkizilgen «Úzdik stýdent-2018» baıqaýynyń jeńimpazy Gúlnur Tilepbergen qıdy. Ortalyq qyzmetin tuńǵysh paıdalanǵandardyń biri mashına jasaý fakýltetiniń 4 kýrs stýdenti Mýsa Kóneev boldy.
- Buryn dál osy transkrıpti alý úshin bir apta ýaqytymyz ketetin. Búgin, mine, bes-aq mınýt jumsadym, - deıdi Mýsa. - Ýaqytty tıimdi paıdalanatyn boldyq. Bul jerden únemdelgen ýaqytty bilim alýǵa, basqa da paıdaly iske jumsaımyz.
Stýdentterge qyzmet kórsetý ortalyǵynyń jumysymen tanysyp shyqqan Altaı Kólginov Jáńgir han atyndaǵy BQATÝ-diń 1 kýrs stýdentteri aldynda «Bilimge talpynys – jetistiktiń negizgi kilti» taqyrybynda qoǵamdyq dáris ótkizdi.
Qazbek QUTTYMURATULY
«Egemen Qazaqstan»
Batys Qazaqstan