Kózi kórmeıtin nemese nashar kóretin zaǵıp jandarǵa qolaıly bolýy úshin polıseılerdiń bastamasymen jol qurylymy ózgeretin boldy. Bul jóninde «Nazar salyńyz, zaǵıp júrginshi!» aksııasy sheńberinde Qostanaıdaǵy soqyrlar qoǵamy múshelerimen ótkizgen kezdesýde aıtyldy.
Qalalyq ishki ister basqarmasy jergilikti polısııasynyń aǵa ınspektory, aksııany uıymdastyrýshy Elena Maǵazýmovanyń aıtýynsha, qazirgi zamanda kóshe-jol jelisiniń quraldary zaǵıp jandardyń jol qaýipsizdiginiń mańyzdy quramdas bóligi bolyp tabylady. Qostanaı qalasyndaǵy 242 burylystyń tek 167-de «Zaǵıp júrginshi» aqparaty bar qural ornatylǵan. 12 baǵdarshamda ǵana dybysty sıgnal jabdyǵy bar.
«Statıstıka boıynsha, jaıaý júrginshiler jol qozǵalysynyń eń álsiz, urymtal qatysýshysy bolyp tabylady. Al zaǵıp jandar jol qozǵalysy aǵynynda asa qamqorlyqqa zárý. О́zin qaýipsizdendirý úshin zaǵıp jandar qolyna aq taıaq ustap júredi, olar júrgizýshilerge «aldyńda zaǵıp jan kele jatyr, ótkizip jiber» degen belgini bildiretin jol belgisiniń ornyna júredi», deıdi polısııa maıory Elena Maǵazýmova .
Kezdesýde zaǵıp jandar júrgizýshilerdiń barlyǵy birdeı múgedek jandardyń qolyndaǵy aq taıaqqa mán bere bermeıtinin, toqtamaıtynyn aıtty. Kózinen zardap shegetin múgedekter jol qozǵalysynda erekshe nazarǵa alynýy tıis. Elena Maǵazýmova zaǵıp jandarǵa aq taıaǵyn kóterip, joldyń kez kelgen jerinen ótýine quqy bar ekenin aıtty.
О́tken jyldan beri Qostanaı qalasynda júrginshiler jolynda zaǵıp jandar basqanda jol qozǵalysynyń baǵytyn sezine alatyn plıtkalar tóseldi. Sary tústi zaǵıptar basqa túske qaraǵanda jeńil aıyra alady. Kezdesýde polıseıler zaǵıp jandarǵa túnde júrgende jol erejesine kómek beretin arnaıy jarqyl beretin lenta taratty.
Názıra Járimbet,
«Egemen Qazaqstan»
Qostanaı