Batys Qazaqstan oblysyna jumys babymen kelgen Parlament Senatynyń depýtattary Birǵanym Áıtimova, Erbolat Muqaev jáne Narıman Tóreǵalıev Terekti aýdanynyń tynys-tirshiligimen tanysty.
Depýtattar «Jaıyq-Shalqar» arnasyndaǵy qalqymaly sý stansııasynyń jumysymen tanysty. Mal jaıylymyn sýlandyrýǵa arnalǵan Oral-Shalqar arnasyna sý toltyrý maqsatynda «RealStroyInvest» mekemesi 2017 jyly bastalǵan qurylys aıaqtalǵan bolatyn. Bul qurylys tek mal sharýashylyǵyna emes, kókónis, baý-baqsha salýǵa da oń yqpal eteri sózsiz. Osy arna kómegimen 300 myń gektar jer sýlandyrylatyn bolady.
Depýtattar Aqjaıyq aýylyndaǵy birqatar áleýmettik nysandardy aralady. 2012 jyly paıdalanýǵa berilgen 120 oryndyq Aqjaıyq aýylyndaǵy «Aıgólek» balabaqshasynda bóbekjaı ujymymen kezdesip, mektepke deıingi balalar mekemesiniń jaǵdaıymen tanysty.
Terekti aýdandyq aýrýhana dırektory B.Qubaev ózi basqaryp otyrǵan mekemeniń búgingi jaı-kúıin baıandady. Kúnine 50-60 emdelýshini qabyldaıtyn aýrýhanada dárigerler jetispeıtini aıtyldy, munda búgingi tańda 4 maman kerek bolyp otyr.
Depýtattar 1926 jyly ashylǵan Aqjaıyq mektebinde de boldy. Qazir 517 oqýshyǵa 70 muǵalim bilim berip otyrǵan mektepte mýzeı jumys isteıdi. Senat depýtaty B.Áıtimova muǵalimderdiń aǵylshyn tilindegi bilim deńgeıine kýá bop, oqýshylardyń arman-maqsattary týraly pikir almasty.
Aýyldyq Mádenıet úıinde ótken kezdesýge Shalqar, Ańqaty, Aqsoǵym, Shaǵataı, Aqjaıyq aýyldyq okrýginiń turǵyndary, ardagerler, bilim berý, medısına salasynyń qyzmetkerleri jáne jastar qatysty. Elbasy N.Nazarbaevtyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýy jıyndaǵy basty taqyryp boldy.
Parlament Senatynyń depýtaty Birǵanym Áıtimova aýdandaǵy jumystarǵa oń baǵa beretinin jetkizip, Elbasynyń Joldaýyn jan-jaqty túsindirip berdi.
- Joldaýdyń basty maqsaty – qazaqstandyqtardyń ál-aýqatyn attyrý bop tabylady. Elbasynyń Joldaýyn halyqqa jetkizý maqsatynda Senattyń barlyq komıteti elimizdiń túkpir-túkpirinde osyndaı kezdesýler ótkizýdi josparlaǵan bolatyn. Qarapaıym halyqpen betpe-bet júzdesip, suraqtaryna jaýap berip, pikirlerin tyńdaýdy qup kóremiz, dedi B.Áıtimova.
Jıyn barysynda Senat depýtattary Narıman Tóreǵalıev jáne Erbolat Muqaev Joldaýda kórsetilgen 10 basym mindettiń árqaısysyna jeke-jeke toqtaldy.