Bilim jáne ǵylym mınıstrliginde stýdentterdi jataqhanalardaǵy oryndarmen qamtamasyz etý boıynsha memlekettik tapsyrystyń alǵashqy sharttary jasaldy.
Shart taraptary retinde Bilim jáne ǵylym mınıstrligi, baǵdarlamanyń operatory – «Qarjy ortalyǵy» jáne elimizdiń birqatar joǵary oqý oryndary qatysty. Olardyń ishinde L.N.Gýmılev atyndaǵy Eýrazııa ulttyq ýnıversıteti, S.Asfendııarov atyndaǵy Qazaq ulttyq medısınalyq ýnıversıteti, Q.Sátbaev atyndaǵy Qazaq ulttyq zertteý tehnıkalyq ýnıversıteti, Qazaqstan ınjenerlik-tehnologııalyq ýnıversıteti, Qazaqstan ınnovasııalyq ýnıversıteti, QazMZÝ ýnıversıteti, D.Qonaev atyndaǵy Eýrazııa zań akademııasy bar.
Kelisimderdiń nátıjesinde obektilerdi salý jáne rekonstrýksııalaý arqyly Astana, Almaty jáne Semeı qalalarynyń stýdentteri úshin jataqhanalarda 4 myńnan astam jańa tósek-oryn beriledi, onyń ishinde 2810 jańa tósek-oryn kelesi jyly beriledi dep josparlanýda. Aldaǵy ýaqytta oqý oryndary jáne áleýetti ınvestorlarmen birlesip, jańa jobalardy jandandyrý kózdelýde. Basty maqsat – 2019 jyly jańa 5 myń tósek-oryn engizý.
Sonymen birge, baǵdarlama operatory men qazaqstandyq ıpotekalyq uıymy arasynda stýdent jastardyń turý jaǵdaılaryn jaqsartý salasyndaǵy yntymaqtastyq týraly memorandým jasaldy.
«О́zderińizge málim, bıyl Elbasynyń bes áleýmettik bastamasynyń aıasynda birqatar úlken jobalar qolǵa alyndy. Sonyń biregeıi – stýdentterdiń jataqhanadaǵy jaǵdaıyn jaqsartý boıynsha is sharalar. Búginde Bilim jáne ǵylym mınıstrligi, «Qarjy ortalyǵy», elimizdiń birqatar JOO-dyń arasynda kelisimshartqa qol qoıyldy. Bul kelisimsharttyń nátıjesinde 4 myńǵa jýyq jańa oryn paıda bolady jáne onyń 2810-y 2019 jyldyń sońyna deıin iske qosylady. Jalpy bul mehanızmniń ereksheligi – memleket jáne jeke sektor áriptestiginiń negizinde qurylýy. Jataqhanany JOO óz qarajatynyń esebinen nemese jeke sektordyń ınvestısııasyn tartý arqyly iske qosady. Nátıjesinde árbir iske qosylǵan oryn úshin memleket eger de stýdent sol jataqhanada turǵan jaǵdaıda qurylys arqyly iske qosylsa, 122 aılyq eseptik kórsetkishpen, al eger bul jataqhana rekonstrýksııalaý arqyly iske qosylsa onda 47 aılyq eseptik kórsetkishpen tólenedi. Osy jyldyń kórsetkishimen alatyn bolsaq, qurylys arqyly iske qosylsa, 122 aılyq eseptik kórsetkish shamamen jylyna 300 myń teńge. Memleket bul qyzmetti 96 aı, ıaǵnı jataqhana iske qosylǵannan keıin 8 jyl júrgizedi. Negizgi shart jataqhanada stýdentterdiń turýy. Qazirgi tańda Astana, Almaty, Shymkent sııaqty qalalarda jataqhanaǵa suranys joǵary. Negizgi jospar boıynsha 75 myń oryndyq jataqhanany iske qosý kerek. Munyń barlyǵy kezeń-kezeńimen 2019-2021 jyldar aralyǵynda iske qosylady. Qarjy ortalyǵynyń Bilim jáne ǵylym mınıstrligimen birlese júrgizgen saraptama nátıjesinde 80 myńǵa jýyq orynǵa suranys bary anyqtaldy», dedi «Qarjy» AQ ortalyǵynyń departament dırektory Birjan Álimjanov.
Raýan QAIDAR,
«Egemen Qazaqstan»