Qazaq kúıiniń qudiretin álemge tanytqan dáýlesker dombyrashy, Halyq ártisi Ázıdolla Esqalıevtiń esimi elge etene tanys. Kúı abyzynyń ómirden ótkenine de bir jyldan asty. О́nerge degen qurmettiń kórinisindeı bolyp Atyraý halqy Áz-aǵa atap ketken kúıshini eske alý keshi ótti.
Ákesi Esqalı balasynyń erekshe qabiletin kishkenesinen baıqasa kerek, kúı anasy Dına Nurpeıisovany úıine shaqyryp, bir apta qonaq etip, kúı tyńdatady. Osylaısha ónerge degen talpynysyna Dınanyń ózi jol ashqan Ázıdolla keıin Almatyǵa oqýǵa baryp, Ahmet Jubanovtan dáris alǵan. Qurmanǵazy orkestrinde eńbek etken jyldary da jarqyraı kórindi. Talaı eldiń sahnasynda qos ishekten áýezdi ún taratyp, halyqtyń qoshemetine bólendi. Máskeýde ótken búkilodaqtyq jas oryndaýshylar baıqaýynda top jaryp, altyn medal ıelendi. Kúı anasynyń aq batasymen óner jolyna attanǵan jas Ázıdolla dańqty dombyrashy retinde qalyptasyp, qyryq jyldan soń týǵan jeri Atyraýǵa oraldy. Eske alý keshi Mahambet atyndaǵy akademııalyq qazaq drama teatry ártisteriniń kúıshi ómirinen syr shertken qoıylymymen ashyldy. Oblystyq ardagerler keńesiniń tóraǵasy Qatımolla Rızýanov, Qazaqstannyń eńbek sińirgen qaıratkeri, professor Aıtjan Toqtaǵan, Qazaqstannyń eńbek sińirgen ártisi Aıgúl Úlkenbaeva, belgili kúıshi, «Qurmet» ordeniniń ıegeri Ermek Qazıev Áz-aǵa týraly estelikter aıtyp, kúılerin oryndady. Mádenıet qaıratkeri Rahıla Qulsarıevanyń dırıjerligimen D.Nurpeıisova atyndaǵy akademııalyq qazaq halyq aspaptar orkestri de Ázıdolla Esqalıevtiń repertýaryndaǵy kúılerdi oryndady.
– Ǵıbratty iz qaldyrǵan Ázıdolla Esqalıevtiń esimi qashan da qurmetpen atalady, – dep atap ótti oblystyq mádenıet, arhıvter jáne qujattama basqarmasynyń basshysy Salamat Sabyr. – Dáýlesker dombyrashyny eske alýǵa, ónerin nasıhattaýǵa arnalǵan sharalar alǵa qaraı da jalǵasyn tabady.
Atyraýda eki jylda bir ret Ázıdolla Esqalıev atyndaǵy respýblıkalyq «Altyn dombyra» kúı baıqaýy ótedi. Sol baıqaýdyń bas júldegerleri – halyqaralyq baıqaýlardyń laýreaty Nurjan Tájikenov, Qurmanǵazy atyndaǵy Qazaq memlekettik akademııalyq halyq aspaptary orkestriniń bas dırıjeri Abylaı Tilepbergenov, A.Jubanov atyndaǵy daryndy balalarǵa arnalǵan respýblıkalyq qazaq mamandandyrylǵan mýzyka mektep-ınternatynyń oqýshysy Dastan Qazkenovter sharaǵa arnaıy kelip, ónerlerin kórsetti.
Baqytgúl BABASh,
«Egemen Qazaqstan»
ATYRAÝ