Atyraýlyq taýar óndirýshilerdiń ónimderi Reseıdiń Astrahan oblysyndaǵy iri jobalardy júzege asyrý kezinde paıdalanylady. Qazaqstanda jasalǵan ónimder men taýarlar Astrahandaǵy saýda-ónerkásip kórmesine qoıylyp, kórshilerdiń qyzyǵýshylyǵyn týdyrdy. Sharaǵa munaıly óńirden 20 bıznes sýbektisi qatysty.
Oblystyq kásipkerler palatasynyń basshysy Abdolla Ydyrysov: «Kórme eki el arasyndaǵy iskerlik baılanysty nyǵaıtýdy kózdedi, nátıjesi de jaqsy boldy. Mysaly, «Karat» JShS reseılik «Mıraj» kompanııasymen konservi jetkizilimine, «DıEl» JShS-men dılerlik jeli ashýǵa kelisimshartqa otyrdy. «Asyl Agro» seriktestigi de birqatar kelisimderge qol jetkizdi. «Instalkom» JShS Astrahan oblysyndaǵy iri qurylys jobalaryna qatysýǵa múmkindik aldy. «Shevron» qubyr zaýytynyń ónimderin kórshilerimiz paıdalanatyn bolady», – deıdi.
Reseılik kásipkerlerdi «Bým-2020» JShS-niń ekologııalyq taza qaǵazdan jasalǵan qaptamalary da qyzyqtyrypty. Kórmege aparylǵan «О́nerpaz», «Kaspıı Lana» seriktestikteri shyǵaratyn trıkotajdan tigilgen kıimder men jamylǵylar túgelge jýyq satylyp ketken.
Mundaı sharalar shekaralas aımaqtardyń ózara baılanysyn arttyra túseri anyq. Aldaǵy ýaqytta Reseıdiń Omby, Novosibir, Chelıabi oblystarynda da kórme uıymdastyrý kózdelip otyr.
Baqytgúl BABASh,
«Egemen Qazaqstan»
ATYRAÝ