Táýelsizdigimizdiń tuǵyry nyqtalyp, eńsemizdi tiktegen saıyn keshegi Alash úshin arpalysyp ótken arystarymyzdyń baǵasy odan saıyn artyp, mártebesi odan saıyn bıikteı bermek. Sonyń bir dálelindeı bıyl Premer-Mınıstrdiń qaýlysymen 5 qyrkúıek, ıaǵnı Ahmet Baıtursynulynyń týǵan kúni Qazaqstan halqy tilderiniń kúni bolyp bekitilgen bolatyn.
Keshe Astana qalasynyń ákimdigi men Tilderdi damytý jáne arhıv isi basqarmasy, «Rýhanııat» kommýnaldyq memlekettik mekemesiniń uıymdastyrýymen Q.Qýanyshbaev atyndaǵy Memlekettik akademııalyq qazaq mýzykalyq drama teatrynda Ahmet Baıtursynulynyń shyǵarmashylyǵyna arnalǵan «Alashtyń Ahańy» atty rýhanı- taǵylymdy is-shara ótti.
Keshke Ahmet atamyzdyń atalas týystarynan taraǵan urpaqtary da kelipti. «Bizge kúlli Alashqa ortaq Ahmet Baıtursynulynyń urpaǵy degen at árıne maqtanysh, sonymen birge óte úlken jaýapkershilik. Áýletimizdiń ul-qyzdary osy ardaqty atqa jamanat keltirmeı, urpaǵy da ǵylym, bilimmen ultqa qyzmet etý kerektigin aıtyp, sol baǵytta jumys isteýge tyrysamyz», dedi Ahmet Baıtursynuly atyndaǵy Eýrazııalyq bilim jáne ǵylymdy damytý qoǵamdyq qorynyń atqarýshy dırektory Azamat Nurlanuly.
Kesh Q.Qýanyshbaev teatrynyń ártisteri somdaǵan «Ult qaıratkeri» qoıylymymen bastalyp, «Ahmet Baıtursynulynyń ǵumyrnamasy» atty beınesıýjet kópshilik nazaryna usynyldy. Alashtanýshy ǵalym, fılologııa ǵylymdarynyń doktory, akademık Dıhan Qamzabekuly sóz sóılep, Ahmet Baıtursynulynyń arman-muraty jaıly baıandady.
Ol ár urpaqtyń moınyna óz ýaqytynyń júgi artylatynyn, sol júkti kelesi urpaqtyń arqasyna artyp ketý ultty keri shegindiretin nemese basqalarǵa ilese almaı qalýǵa alyp keletin qatelik ekenin aıta otyryp, Ahańnyń óz dáýirinde moınyna artylǵan asa aýyr júkti tolyǵymen atqaryp ketken ǵalym ekendigin tilge tıek etti.
«Bul sharanyń maqsaty – Alashtyń rýhanı kósemi, qazaq til biliminiń negizin qalaýshy ǵalym, ádebıet zertteýshisi, aǵartýshy, ult ustazy Ahmet Baıtursynulynyń shyǵarmashylyq murasyn kópshilik qaýymǵa keńinen nasıhattaý, jas urpaqtyń boıynda ultjandylyq pen otanshyldyq rýhty qalyptastyrý, qoǵamdyq sanany ulttyq baǵytta jańǵyrtý, ulttyń asyl qazynasy – qazaq tiliniń mártebesin arttyrý, qazaq sóz óneriniń qundy muralaryn tanytý», deıdi uıymdastyrýshylar.
Taǵylymdy da tartymdy keshte dástúrli ánshi Amangeldi Seıithan Ahańnyń Faızolla dosyna jazǵan sońǵy hattarynyń biri «Qan sheńgel» tolǵaýyn oryndady. «Senen bult menen qaıǵy tarqamady» dep Mádıdiń ánimen bastaǵan áıgili ánshi Ramazan Stamǵazıev ári qaraı «Alash qonǵan aqboz úı...» dep Qapezdiń ánimen jalǵady. Kúıshi Aıbek Bekbosyn «Alash» kúıin tartý etti. Sondaı-aq oqýshylar Ahmet atamyzdyń óleńderin oqydy.
Igi is-sharaǵa zııaly qaýym ókilderi men qala basshylyǵy, qurylymdyq jáne áleýmettik mekemelerdiń, oqý oryndarynyń, jastar uıymdarynyń jetekshileri, belsendi jastar men ult ustazynyń ulaǵatynan sýsyndaýǵa qyzyqqan qala turǵyndary qatysty.
Ularbek NURǴALYMULY,
«Egemen Qazaqstan