Qaraǵandy qalasynda tek elimizdiń óndiristik aımaǵy bolyp qana qoımaı, sonymen qatar sıfrly tehnologııalardy damytý ortalyǵyna aınalý áleýeti paıda boldy. Álemge tanymal IT-mamandar Qaraǵandyny «Terrıkon alqaby» dep ataýdy usyndy.
Taıaýda kenshiler astanasynda tórt kún boıy «IT-WEEKEND.KZ-2018» halyqaralyq forýmy ótti. Sharaǵa barlyq aımaqtardan jáne basqa elderden joǵary tehnologııa mamandary jınaldy. Forýmnyń «Qaraǵandy – IT-keńistiktiń bastaý alańy» atty basty paneldik sessııasyna Qaraǵandy oblysynyń ákimi Erlan Qoshanov qatysty. Aımaq basshysy óz sózinde búgingi tańda IT-naryq barlyǵymyz úshin keremet múmkindikter jáne bastama pozısııalar bolyp tabylatynyn atap ótti.
«Elbasy bastamasynyń arqasynda elimizde «Sıfrly Qazaqstan» baǵdarlamasy júzege asyrylýda. Aldyńǵy qatarly elder sıfrlandyrýǵa ondaǵan jyldar boıy qatelikter men tájirıbeler arqyly jetken. Bul álemdik tájirıbe IT-salany damytýǵa arnalǵan strategııa bolyp tabylatyn «Sıfrly Qazaqstan» baǵdarlamasynda eskerilgen», dedi Erlan Qoshanov.
Uıymdastyrýshylardyń aıtýynsha, Qaraǵandy IT-forýmdy ótkizetin jer retinde tegin tańdalǵan joq. Qalada JOO jáne mamandandyrylǵan kolledj negizindegi myqty matematıkalyq mektep bar. Qaraǵandylyq baǵdarlamalaýshylar Google sekildi álemniń aldyńǵy qatarly IT-kompanııalarynda qyzmet etedi. Buǵan qosa, oblysta sıfrly «erekshelikter» engizilip jatqan sátti úlgiler bar. Mysaly, densaýlyq saqtaý jáne bilim berý salalary kóptegen nátıjelerge qol jetkizgen. Úıde otyryp, dárigerdiń qabyldaýyna jazylýǵa, medısına qyzmetkerin úıge shaqyrýǵa jáne qajetti dári-dármektiń reseptin jazǵyzyp alýǵa múmkindik beretin «Damý med» qosymshasy sátti jumys istep jatyr. Qaraǵandylyq IT mamandardyń zerttemesi qazirgi kúni Qazaqstannyń barlyq qalasynda qoldanysqa engizildi. Tek Qaraǵandynyń ózinde-aq bul qosymshany 300 myńnan astam adam paıdalanady.
«Munda, Qaraǵandyda matematıkalyq oı-órisi damyǵan, osy salada ózińmen teń adamdarmen sóılese alasyń. Osynda qazir jastar, tájirıbeli mamandar, tabysty kásibı qyzmetkerler, ǵylym men bılik ókilderi ózara baılanys ornatyp, draıv quryp, jańashyldyqtar oılap taýyp, ózderin de, óńirdi de, jalpy eldi damytýǵa talpynatyn biregeı alań qurylyp jatyr», dedi sessııada Májilis depýtaty Pavel Kazansev.
Forýmǵa qatysýshylar qaraǵandylyq IT habty «Terrıkon alqaby» dep ataýdy usyndy.
– Sılıkon alqaby bar, al Qaraǵandyda óziniń Terrıkon alqaby bolady. Men ony qoldaımyn, – dedi Erlan Qoshanov.
Osyǵan oraı óńir basshysy óziniń orynbasary Almas Aıdarovqa jáne «Qaraǵandy oblysynyń aqparat, memlekettik qyzmetterdi kórsetý jáne muraǵattar» MB jetekshisine tapsyrma berdi.
Sessııa sońynda Erlan Qoshanov forým sheńberinde ótken hakaton jeńimpazdaryna aqshalaı sertıfıkattar tabys etti. Jeńimpaz atanǵandardyń barlyǵy da QMMÝ stýdentteri boldy. Olar 500 myń teńgeden ıelendi. Stýdentter múmkindigi shekteýli adamdarǵa nemese tósek tartyp qalǵan naýqasqa kómekshi nemese kútýshi taýyp alýǵa múmkindik beretin mobıldi qosymsha jasap shyǵarǵan bolatyn.
Qaırat ÁBILDA,
«Egemen Qazaqstan»
QARAǴANDY