Bekjan TURYS: О́nerdiń atasy – muń, anasy – nur

– Teatr qoıylymdarynan qalmaı, premeralardy qada­ǵalap júretin turaqty kórer­men búgingi akterlerdiń oqýyn bitirip kele sala basty róldi oı­nap jatatynyn anyq baıqar edi. Osyǵan oraı akter de jyldam tanymal bolady. Sizdiń de juldyzyńyz erte jandy ma?

– M.Áýezov atyndaǵy drama tea­tryna 1991 jyly jumysqa qabyldandym. Ol kezdegi teatr mektebiniń bólek, ádebiniń basqa bolǵanyn aıtpasam da túsinikti bolar. Teatr rejıssýrasynyń taıbýryly Á.Mámbetovtiń basqa qyryn ysyryp qoıǵanda, tek jumys isteý tásili boıynsha arnaıy kitap jazyp shyǵýǵa bo­lady. Ol kisi akterdi uzaq ýa­qyt synap baıqaıtyn. Akter aldymen kópshilik sahnasynda júrip boı úıretedi, eleýsiz eńbek etip júrip ysylady. 

Tatıana Kasymovna degen ustazymyz meniń massovkadaǵy rólderimdi baıqap júretin bolýy kerek: «Bekjan, joq jerden jurt­tyń esinde qalatyn beıne jasap shyǵaratynyń-aı seniń. Bul seniń izdenimpazdyǵyń, átteń, sen týraly jazatyn zamandasyń joq» deıtin. Aıtpaǵym, akter eshqashan «massovka, epızod» dep qaramaýy kerek. «Qoı asyǵy deme, qolaıyńa jaqsa saqa qoı» degen sóz osyǵan baılanysty aıtylǵany anyq. Áli esimde, teatrymyzda 1995 jyldary «Genýıadaǵy qastandyq» degen spektakl qoıyldy. Osy qoıylymda meniń pesheneme tuń­ǵysh ret tórt aýyz sóz aıtý baqyty buıyrdy. «Kórermen meniń daýysymdy estıtin boldy-aý» degendi oılaǵanda, júregim dúrsildep, degbirim qashyp ke­tetin edi. Al endi osylaısha sah­naǵa kirip-shyqqannyń ózine tóbemiz kókke jetkendeı bolyp jú­rip, biz qalaı juldyz bolamyz? «О́nerdiń baspaldaǵyn adal atta» degen sózdi amanat etip ustanyp, sezimtal jandardyń serigi bolǵan sahnany kıe dep uǵatyn teatrymyzda dańdaısyǵan juldyzdyq júrmeıtin de. Aǵalardyń janyn­da ondaı shalyq qaıda-a-a-a, bir qa­rap-aq shaıtanyńdy qaǵyp alady. 

– Ilgeride respýblıkalyq basylymdardyń biriniń betinde teatr synshysy Á.Syǵaı M.Áýe­zov teatryn synǵa ala ke­lip: «anaý jap-jas Bekjanǵa shal­dyń rólin oınata-oınata, sharýasyn ábden bitirdi» dep renish bildirgeni esimizde. Synshynyń osy pikirine ren­jigen joqsyz ba? 

– Joq, renjigen joqpyn. Ol kezde tek shaldyń ǵana ró­lin oınaǵan joqpyn ǵoı, bas­qa da rólderim bar bolatyn. Áshaǵań meniń teatrdaǵy bar­lyq jumysymdy baıqady, ról­derimdi kórdi dep aıta almaı­myn. Qazaqstanda elýden asa teatr bar, sonyń bárin kórip, baǵasyn berýge ol kisiniń ýaqyty da bolmaǵan shyǵar. Qazaq kórermenine beımálimdeý bolyp kelgen benefıs spektaklmen 40 jasymdy atap ótkenim el esinde bolar, tosyndaý janrmen ózimdi tolǵandyratyn suraqtarǵa sharq uryp sahnada jaýap izdegen keshimdi arnaıy kelip kórgen Áshaǵań tek osydan keıin ǵana maǵan birinshi ret nazar saldy. Biraq kezdesip qalǵanda únemi: «Bekjan, sen shtampqa urynyp qalma, sen Rıchardty oınaýyń kerek, sen Syrymdy oına» deıtin. Rıchard pen Syrymdy qaı akter oınaǵysy kelmeıdi, árıne oınaǵym keledi, biraq ony maǵan kim beripti? Úlken ról kútip ómirin ótkizip alǵan ár­tister az emes, sondyqtan úlken-kishi ról dep bólip-jaryp jat­pastan, janymdy salyp oınaýǵa tyrysatynym ózime aıan. Jasyratyny joq, Áshirbek aǵa meni jaqsy kórdi. «Bekjan shyǵa kelgende saxnaǵa beınebir qazaq dalasy kóship kelgendeı áserde bolamyn. Onyń daýys máneri, úniniń ıntonasııalyq boıaýy, reń-ajary qazaq psıxologııasynyń shýaǵyn shashady» deýshi edi marqum. 

– Kórermendi bylaı qoı­ǵanda, teatr áleminiń ózinde pi­kir qaq jarylyp tur: biri baıaǵy kórkemdik keńes bol­maǵan soń teatrlar ne bolsa, sony qoıatyn boldy dese, keı­bireýi, kerisinshe, qazaq teatr­laryna áli de erkin kózqaras jetis­peıdi deıdi. Qatań qada­ǵalaıtyndaı ulttyq teatrlar ýytty taqyryptarǵa baıaǵy­dan jolamaıdy, bálkim tal­ǵam tómendep ketken bolar?

– Eskilikti ańsap otyrǵan esh ­nársem joq. Biraq osyndaıda salystyrýǵa týra kelip qalady. Sońǵy jyldarǵa deıin teatrda jańa spektakl tórt-bes aı daıyn­dalatyn edi. Qazir teatrlar jospar oryndaıtyn óndiris ornyna aınaldy. Ras, ýaqyt talap etip otyrǵan qajet taqyryp, sahnaǵa kezeksiz shyǵýy tıis kórermendi qyzyqtyratyn tyń dúnıe bolýy múmkin, biraq eki aptanyń ishinde spektakl daıyndap shyǵarý degendi óz basym túsine almaımyn. Mysaly, «Adasqaqta» Birjandy oınadym. Ádebı shyǵarma retinde eki-úsh qaıtara oqyp baryp áreń túsinetin «Adasqaqty» spektakl etip qoıýdyń qıyndyǵyn shyǵarmany bastan-aıaq biletin adam ǵana túsinedi. Osyndaı salmaǵy zil batpan kesek týyndylar joǵarydan túsken jarlyqqa, «ýaqyt qysyp baradyǵa» kóne me, aıtyńyzshy?

– Ataqty, tabysty, qadirli bola tura, orta jasqa kelgen kez kelgen adam «jan to­qyraýyn» bastan keshedi. Kezeńdik daǵdarys sizdiń ba­syńyzdan qalaı ótti? 

– Shynymdy aıtsam, basymdy taýǵa da, tasqa da soqqan arpalysym erterek bastalyp ketip, 40-qa deıin alasurdym-aý osy men. Odan keıin jan azabyna tústim dep aıta almaımyn. Kirshiksiz taza ómir súrdim dep te aıta almaımyn. Et pen súıekten jaralǵan adam bolǵan soń kemshiliksiz bolmaýyń múmkin emes. Keıde isińnen, keıde sózińnen qatelesip jatasyń. «О́kinishim, átteńim, bosqa ótkiz­gen sátterim» joq emes, bar. Jetim ókpem jelkildep júrgen kezde, tobyrǵa ilesip, topalań-selge qashtym. Biraq adamdar arasynda álsizdikke boı aldyryp, jeke ózime qııanat jasaǵanymmen, ónerge qııanat jasamadym. Oǵan meniń ókinbeıtin ómirimniń taza­lyǵy kýá. Kerisinshe, buryn­ǵydaı emes, keń oılap, keń pi­shetin boldym. О́tkenniń óne­gesinen úlgi ala otyryp jańanyń bıigine qaraı qadam bastym desem bolady. О́mirde de, ónerde de ádiletsizdikti sýqanym súı­meıdi. Qazir balalarymnyń erte­ńine, ulttyń keleshegine kóp alańdaımyn. Tek men emes, jalpy esi durys adam solaı oılaýy tıis dep oılaımyn.  Qoǵamnyń qadir-qasıeti, eń aldymen, adamdy qalaı ardaq tutýmen ólshenýi kerek ǵoı... Biz – tutynýshy qoǵam qurdyq, ıaǵnı dúnıeqor, aqsha aldyna shyqqan, rýxanı qundylyqtary keıin qalǵan qoǵam. Ulttyq tárbıeniń tizgini bos... О́ıtip-búıtip aqylmen túzep alatyn, túzeýge kelmese, shúkirim men sabyrymdy shaqyryp, jeńip alatyn meniń jeke basymnyń daǵdarysyn qoıshy, ulttyń basyndaǵy osy qıyndyqty qalaı túzeımiz?

– Akterler bir-birinen maq­­taýdy aıamaıtyn, maqtaý estise jaly kúdireıip, odan ári ra­qattana túsetin qyzyq halyq eken. Akter ómiri tek maqtaý men basqalardyń olarǵa ıilip qur­met kórsetýinen ǵana tura­tyn sııaqty áser beretini bar. Sy­ǵaı ketkeli teatr akterleri syndy umytty-aý osy...

– Syndy kótere almaıtyn jaǵ­daıǵa jettik. Keıde ashy syn estý bizdiń býyndaǵy beı­baqtarmen ǵana aıaqtalǵan bolar dep oılaımyn. Búgingi synshylar da jaltaq, ashyp aıtýǵa qorqady. Syn aıtylsa, betimiz bir ýys bolyp jıyrylyp, syn aıtqan adamdy jek kóremiz. Kishkentaı tıigizip aıtsa, búrgeshe talap jeımiz. Osylaı jek kórýden baryp kektený keseli bastalady. О́ner adamyna bardan góri joqty kóbirek aıtý paıdaly, bardyń parqyn joqtyń narqy ósiredi. Syndy kóp estidik, kúnde estidik, ras, qazir jas áriptesterim syn estigisi kelmeıdi. «Jasy kishi ǵoı» dep bir aýyz syn aıtsań, «ol sizdiń óz pikirińiz», deıdi. Qulaǵynyń maqtaýǵa úırenip alǵany sonsha, basqa sózdi qa­byldaı almaıtyn jaǵdaıǵa jetken. Kem talanttarǵa berilip jat­qan baǵany kórgende, shyn talant­tardyń bási túsedi. 

– Sońǵy bir jyldyń ishinde gas­trolmen Anglııaǵa da, Avınonǵa da bardyńyzdar. Olardan ne úırenýge bolady eken? 

– Sońǵy jyldary ártúrli deńgeıdegi teatr festıvalderi elimizde de, shetelderde de jıi uıymdastyrylyp júr. Qazaqstan teatrlarynyń biri baıaý, biri qar­qynmen, ártúrli yrǵaqta izdenis ústinde kele jatqany sondaı alańdardan baıqalady. Álem teatrlarymen salystyrǵanda, ulttyq teatr óneriniń áli de kenjeleý ekeni ras. Biraq ózindik qomaqty orny bar ekeni báribir ańǵarylady. Fransııanyń Avınon qalasyna 3000 teatr qa­tys­qan dúnıejúzilik teatr fes­tıvaline baryp kelgenimizden el habardar. Baıqaǵanym, solar­dyń árqaısysy óz kelbetin, óz damý baǵytyn kórsetýge tyrysady. Jalpy, ónerdiń bolmysy ulttyń qaınaǵan tirshiligimen tamyrlas bolmasa, ol óner emes. Eksperımentaldy dúnıelerge múlde qarsylyǵym joq, ony jaýyp tastasań, teatrdy da, mádenıetti de tunshyqtyryp óltiresiń. Esikti aıqara ashyp tastasań, tóltýmalyq sıpatyńnan aıyrylyp ólesiń. Soraqysy da osy. О́z tóltýmalyǵymyzdan, óz ulttyq beıne-bederimizden úr­kip qashatyn jalǵyz biz ǵana shyǵarmyz deımin keıde. Jastardyń kóbi tarıhyn, baı murasyn bilmeıdi, dástúrin baǵalamaıtyn urpaq ósip keledi. Qorqasyń, óıtkeni osylardyń arasynda meniń de ulym ósip keledi. Aıtpaı-aq óz jónimmen júreıin desem, men balamnyń minezin bilemin, erteń betime basady. «Sol ortada sen de júrdiń, áke. Nege aıtpadyń?» deıdi. Teatr ǵana emes, jalpy qazaqtyń ónerine jabysqan bir dert, ózge mádenıetti kóshiretin rýhanı qulǵa aınaldyq, osynyń zardaby qalaı bolar eken dep soǵan qamyǵamyn.

– Buryn KVN-da oına­ǵan, búginde jastardy uıym­dastyryp júrgen bir belsendi aza­matty teledıdardyń tı­tr­y­­­na «qoǵam qaıratkeri» dep jaz­dy. Qadirsiz, jalǵan qaı­rat­kerlerdiń kóbeıgendigin nemen baılanystyrasyz?

– Keıde keremet jarqyrap tur­ǵan qoldan jasalǵan adam mú­sinderdiń arasynda ómir súrip júrgendeı bolasyń. Arlynyń – soryn, arsyzdyń – túgin qaınatyp, jylpostyń júzin jaınatyp qoıdyq. Qazirgi óner jeke bastyń qamyna qaraı hám ataq pen abyroıǵa qyzmet etetin boldy. Bizde qazir shyn jaqsysyn emes, kóńili jarasqan óz tapshysyn asyra maqtaý men ósire maqtaý ádetke aınalyp ket­ken. Al sol maqtaý arqyly bireýdi ósirýge de, endi birin óshirýge de bolatynyn bilemiz be? Qaıratkerlerdi qoldan jasap alatyn boldyq. «Tulǵa» degen aıaýly uǵymdy, eń bıik ólshemdi kez kelgen kóldeneń kók attynyń qanjyǵasyna baılap berip jatyrmyz. Ataǵynan at úrketin aǵalar alty aýyz sózdiń arqaýy bolatyn oı aıtpaıdy. Kúni keshe jurttyń abyroıy, ar-ojdany, tárbıeshi-tálimgeri, maqtanyshy bolǵan qalamgerler ózara aıtysyp, birin-biri dattaǵannan qaljyrap ta qalǵandaı qazir. Sonda búgingi urpaq kimge qarap boı túzeıdi? Aspanǵa túkirip júrgender kóp, biraq túkiriktiń qaıtyp betine túsetinin túsinetini neken-saıaq. 

– Sizdiń «Ulym, saǵan aıtam» qoıylymynda ishińizdi kernegen, júregińizge sal­maq túsirgen aza­mattyq kóz­qarasyńyzdyń bári aıtyl­dy. Biraq búgingi óner adam­darynyń deni «aza­mat­tyq kóz­qaras», «azamattyq bo­­rysh» degendi sezinbeıdi. Nege?

– El ishindegi shekten shyqqan paraqorlyq pen ádiletsizdikti, mansaptyń taǵy úshin maqtanǵa salynyp, basynyń baǵy úshin ar-uıatyn saýdaǵa salyp, ja­ǵym­pazdyqtyń jarapazanyn aı­typ júrgen «jasampazdardy» kórgende «apyr-aı, jumyr jer nege jyrtylyp ketpeı, shydap tur» degen oıǵa qalasyń. «Qulaǵyn satqandardan Qudaı atqandardyń súldesin kórip sasqanymnan kúńirenem de kúr­sinem» dep edi Sofy aǵa bir sózinde. Kerekke jaramaıtyndardy keremet tutqan búgingi qomaǵaı qoǵam búlkildegenniń bárin sheshen, kóptiń ústinen zirkildegenniń bárin kósem etip qoıdy. Azamattyq pozısııanyń joqtyǵy men tapshylyǵy mu­ńaıtady. Ultynyń janyn uq­paı uly bolǵysy keletinderin qaıtersiz! Ult bar jerde ult­tyq problemanyń bolmaı qalýy múmkin emes. Elimizdiń jaq­sy­lyǵyna qýanamyz, jamanyna nege kóz salmaımyz, nege janymyz ashymaıdy?

Bir oıshyldyń: «Adamzat balasy zańnyń emes, salt-dástúrdiń «quly» bolǵan kezde baqytty ómir bastalady» degenin oqyp edim. Rasynda da solaı. Biz úlkenin ardaqtaǵan, dástúrim – dáýletim, ǵurpym – ǵumyrym, saltym – sanam dep ósken tekti ulttyń urpaǵy edik. 

«Tyıym kórmegen baladan teksiz shyǵady. Tekteý adamdy ádeptilikke úıretedi». Mi­ne, qazaqtyń tól tárbıesiniń ozyq úlgisi. «Uıat bolady» men «obal boladyny» balasynyń sanasyna táı-táı basqannan, alǵash byldyrlaı bastaǵannan sińirip kelgen qazaq búginde tyıym men tekteýdi umytty. Qazirgi bala jaltaq qoǵamnyń jaǵympaz adamdarynan qandaı tárbıe kórip otyr? Kórseter ónegemiz qaısy? Osynyń bári aınalyp kelgende, ulttyq minez-bolmysymyzdy joǵaltyp alǵanymyzdyń kesiri. Dástúrli nanym-senimge moıynsunbaǵan soń, salt-dástúrdi saqtamaǵan soń kórgensizdikke boı aldyryp, tatýlyqty qatýlyqpen iritip júrmiz. Baıaǵy baýyrmal kóńil, qazaqy qaıyrymdylyq joq. Qýlyq pen sumdyqtyń qudyǵyna súıregen qýaıaq, sumaýyz bolyp baramyz. О́zekti órtegen osy oılar kóńilge tynym, júrekke maza bermeıdi.

– Shyndyqtyń betine shimi­rikpeı týra qarap sóı­leı­tin minezińiz talaı­dy taı­saqtatqanymen, tea­tr tarapynan sizdiń rólden qaǵylǵan, qysymǵa ushyraǵan kezińiz joq. Munymen kelisetin shy­ǵarsyz? 

– Kelisemin, ustanǵan jolyń túzý bolsa, Jaratqannyń ózi jar bolatynyna kózim jetti. Jalǵyz qorǵaýshym – ónerge degen adaldyǵym. Jastaý kúnimde talaı kınodan qaǵyldym. Tipti «Oıbaı, Bekjan, sensiz gas­trol ótpeıdi» degen soń basty ról usynǵan Máskeýdiń sha­qyrtýynan da bas tartýǵa týra kelgen kez boldy. Sol shaqyrtý hatyn kóldeneń tartyp, jolyma tosqaýyl bolyp, jibermeı qoıǵan aǵalaryma ókpelesem de bolar edi. Keregi ne? «Teatrǵa qııanat jasamaımyn» dep ónerdi súıip kelgen ózim edim ǵoı. Al búgingi jas akterler ebin taýyp kınoǵa da ketip jatady, ebin taýyp repertýardyń ózin aýystyrtyp jiberedi, tipti toıdan kele almaı jatsa, basty róldiń ózine basqany jibertkizedi. Jalpy, ónerde jeke bastyń múddesin joǵary qoıatyn, júrdim-bar­dym, atústi qaraıtyn úrdis qa­lyptasty. Átteń, bulaı bolmaýy kerek edi... 

– Biz biletin Bekjan Asaý­baıuly elıtalyq asabalar­dyń biri. Osy sizdi bir dókeı toı ıesi usynǵan 100 myń dollardan bas tartqan deı me? 

– 400 myń dollar deńiz. 2000 jyldyń basy, toıǵa 100, maq­taǵanda 300 dollarǵa shy­ǵatyn kezimiz. «Habarda» júrip, «77 kúnmen» ábden tany­lyp alǵanbyz. Telearnada ju­mys is­teıtin tanysym habarlasyp: «saǵan mol aqsha tabatyn múmkindik bolyp tur, ba­rasyń ba? Biraq toı emes, betashar», dedi. Alaıda tap sol kúni keshke spektaklde oınaıtyn bolǵandyqtan shyǵa almaıtynymdy aıttym. Sálden keıin el syılaıtyn aǵalarymyzdyń ózi damylsyz qońyraý soǵýdy bastady. Ol aǵalarymdy qalaı syılasam da, ol kisiler qalaı surasa da, spektakldi tastap shyǵa almaımyn.

Barmadym. Tynshyǵandaı bolyp qalyp edi, bir aptadan keıin álgi beıtanystar taǵy da «toı» dep telefon soǵyp tur. Kelisimimdi kútpesten «qansha suraısyń?» deıdi taǵy. Qymbattaý aıtsam, qolqa salýyn qoıar dep, men de qııas­tanyp: «3000 dollar» dedim. «Kelistik!» Eki kózim atyzdaı bolyp, tas tóbeme shyqty. Sóıtsem bul da betashar toıy eken. Barsam, meni shaqyrǵan myq­tynyń qart ákesi qasqaıyp tórde otyr. Qarııań eldiń bári bas uryp jatqan bildeı balasyn qabaǵymen baǵyndyrady eken. Ne kerek, úsh myńymdy alyp, jaǵalaı otyrǵan ıgi jaqsyny tutas tizip betasharymdy aıtyp bitkenshe, bir qoıdyń eti emin-erkin syıatyn shuńǵyl tegenege túsken aqsha taý bolyp úıilip qaldy. О́ńim túgili, túsime kirmeıtin mol aqshany qaltama basyp, sener-senbesimdi bilmeı eseńgirep úıime qaıttym.

Erteńinde taǵy da telefon qońyraýy. Endi keshe kelin túsirilse, búgin osy otbasynda qudalyq júrgizilýi kerek eken. Quda­lyq aıaqtalǵan soń qaıtýǵa jınalyp jatyr edim, úı ıesi «100 jete me?» dedi. Munshama somany estigende, meniń tilim baılanyp qalǵan bolýy kerek, dybysym shyqpaı qaldy. Azyrqanyp tur dep oılaǵan bolýy kerek, paketten taǵy bir býmasyn alyp shyǵyp «200 she?» deıdi. Áli úndemeımin. Men rıza bolmaı tur dep oılaǵan bolýy kerek, úshinshisin alyp shyqty. Kózim jypylyqtap turǵan maǵan «áı, 400 jete me?» degende baryp, selk etip, es jıyp, eki qolymdy erbeńdetip bir qımyldar jasadym-aý deımin. Aqshany alýdan bas tarttym. «Nege?» dedi. «Bizdiń aýylda sý joq, halyq ómir boıy aýyzsýdyń azabyn kórip keledi, osy aqshaǵa aýylyma sý tartyp berińizshi», dedim. Endi ol kisiniń kózi atyzdaı boldy. «Shyn aıtasyń ba?» «Shyn». Uzyn sózdiń qysqasy, sý júrgizýdiń tutas esep-qısaby jasalyp, quny mıllıonnan asyp ketetin qymbat jobany kompanııalardyń nesheýin aralap júrip, 600 myńǵa áýpirimdep jatyp, áreń túsirip, aǵamnyń usynǵan 400 myń dollary aýy­lyma aýdarylatyn boldy. Jetpeı turǵan 200 myń dollardy bólýge sol tustaǵy Almaty oblysynyń ákimi Serik Úmbetov qýana kelisti. «Mine, jumys bas­talady» dep turǵanda, álgi otbasy qıyn jaǵdaıǵa ushyrap, sý máselesi solaı aıaqsyz qaldy. Sý da joq, júz myńdaǵan dollar da joq, sońynda aqıqat áńgimeniń osyndaı ańyzy ǵana qaldy. 

– M.Áýezov teatrynyń sahnasynda bu­ryn Bekjan Turys, Eljan Turys bar edi, endi Maǵjan Bek­­januly qosylyp jatyr. Maǵjanǵa belgili ákeniń bede­lin buzyp-jaryp, óz atyn qalyp­tas­tyrý ońaıǵa soqpasy anyq. Balańyzdyń teatrǵa kelýin qalaı qabyldadyńyz?

– Suraǵan eldiń bárine aıtyp júrmin, balamnyń bizdiń teatrǵa kelgenin qalamaǵan edim. Jurt óner degen dý qol shapalaqtan turady dep oılaıdy. О́zgeniń ómirine shýaq shashamyn dep júrip óz ómirine taýqymet taýyp alatyn kúrdeli kásip, shólge shóp ósirgendeı beıneti kóp sala. Atasy – muń, anasy – nur. Maǵjan o basta óner jolyn tańdaǵanda, sonshama qarsylyq tanytyp, aqyry Almaty energetıkalyq ýnıversıtetine qujat tapsyrýǵa kóndirip edim. Ony óte jaqsy bitirgen soń «Áke, oqy dedińiz, oqydym, dıplomyńyz, mine. Endi meniń óz qalaýymmen júrýime ruqsat etińiz» dedi de, T.Júr­genov atyndaǵy О́ner akademııa­syna qujat tapsyryp, oqýǵa tústi. Stýdent bolyp júrgende kýrstastarymen birge bir-eki ózindik jumys jasap, onysyn Máskeýge aparyp qoıyp, kishigirim júlde alyp kelip júretin edi. Oqýyn bitiretin kezde Jalǵas Tolǵanbaevtyń balasy ekeýi taǵy da ózindik jumys jasap, onysyn Assosıasııa jıyny bolǵanda, ózderi ótinish bildirip, sondaǵy teatrlardyń aldyna ákep qoıyp, eki balanyń eńbegi joǵary baǵa alypty. Ol jumysty men de kórgen edim, táp-táýir dúnıe bolyp shyqqan eken. «Baǵyty jaman emes eken» dep ishteı rıza boldym. Biraq teatrǵa qaldyrady dep oılamaǵan edim. Sóıtsem kishkentaıynan teatrdyń aýlasynda oınap, bes jasynan bastap nemeresin keıiptep, ulylardyń tabany tıgen kıeli sahnanyń shańyn jutyp, ıisin ıiskep ósken­dikten bolar, teatrdyń kórkemdik jetekshisi Asanáli aǵalar osylaı sheshimin shyǵaryp qoıypty. Bul úshin Asanáli aǵamyz ben Asxat Maemırovqa zor alǵys aıtamyn. Endigi bar úmit – Maǵ­jannyń ózinde. Kómekteseıin dep oqtalsam, «joq, ózim» dep birbetkeıligine salynyp jeke ózi jol tapqysy kelip jolatpaıdy. «Siz de birden akter bolǵan joqsyz ǵoı, áke, tájirıbe de, sheberlik te ýaqytpen keledi» dep qoıady. Bir úmit eterim, keshegi iri­­ler ózimdi qalaı úıretse, solar­dan alǵan ónegemdi balama solaı sińirip edim. Bastysy, ózi­ne, ónerge adal bolsa, ómir de oǵan adal jemisin usynatynyna sene­min.

– Áńgimeńizge rahmet. 

Áńgimelesken Aıgúl AHANBAIQYZY,

«Egemen Qazaqstan»

ALMATY