Taý qoınaýyndaǵy shaǵyn qala – Tekeli. Oblys ortalyǵy Taldyqorǵannan nebári otyz shaqyrym jer. Eki qalanyń arasyndaǵy jol... Jol emes-aý, dańǵyl. Ras aıtam. Álemdegi eń ozyq standarttarǵa uıalmaı-qyzarmaı jaýap bere alady. Qysqasha túıindesek: «Taqtaıdaı tep-tegis».
Al endi osy joldyń qos qaptalyndaǵy sulý tabıǵatqa qarańyzshy! Ol sýretti tilmen sýrettep jetkizý qıyn-aý. Qıyn. Aq sáldeli kógildir taýlar men jazyqtaǵy jap-jasyl shalǵynǵa qarap tańdaı qaǵyp, bas shaıqap otyra bergennen basqa amalyń joq.
Qazaqstan kartasyndaǵy jip-jińishke kók jolaq syzyq – áıgili Qaratal ózeni de mine, osy Tekeliden bastalady. Dálirek aıtqanda, taý shatqalyn jańǵyryqtyra sarqyrap aǵatyn qos ózen – Shaja men Qora qaladaǵy GES tospasyna jete bere qosylyp, ári qaraı Qaratal degen ataýǵa ıe bolady.
Myń san bulaqtardan órilgen Shaja ózeni móp-móldir. Túbindegi maıda qumnyń arasynan jyltyrap, kún kózine shaǵylysyp, jalt-jult etip up-usaq altyn qabyrshaqtar kórinip jatady. Eriksiz eńkeıip, qummen birge ýystap alyp qaraısyń. Jup-juqa, bıttiń qabyǵyndaı ǵana. Sóıtse de ony qaıtyp sýǵa tastaýǵa qımaısyń. О́zińmen birge alyp ketkiń keledi. О́ıtkeni ol – altyn ǵoı!..
Tekeliniń bir turǵyny aıtady:
«Baıaǵyda-a bizdiń babalarymyz jańa soıylǵan maldyń terisin osy ózenniń bas jaǵyna laqtyryp, sona-a-aý tómengi jaqtan tosyp alady eken. Asaý ózen álgi terini domalatyp, tastan-tasqa soqqylap, umar-jumar ǵyp ákeletin kórinedi. Al sodan soń sýyn sorǵytyp, kúnge keptirip, qumyn qaqqan kezde bıttiń qabyǵyndaı up-usaq altyn qabyrshaqtar jaltyrap, júnge ilinip qalatynǵa uqsaıdy».
Iá, bizdiń babalar ony kásipke aınaldyrmasa da azyn-aýlaq násibine jaratqan bolar-aý, shamasy.
Nurǵalı ORAZ,
«Egemen Qazaqstan»