Syrtqy ister mınıstri Qaırat Ábdirahmanov Qyrǵyzstannyń Syrtqy ister mınıstri Chıngız Aıdarbekovpen kelissózder ótkizdi. Ch. Aıdarbekov Qyrǵyzstannyń SIM basshysy retinde Astanaǵa óziniń alǵashqy jumys saparymen keldi, dep habarlaıdy SIM baspasóz qyzmeti.
«Biz baýyrlas Qyrǵyzstanmen qarym-qatynasqa erekshe mán berip, ony strategııalyq seriktes ári jaqsy kórshi retinde sanaımyz», - dedi kezdesýde Q. Ábdirahmanov.
Taraptar óńirlik kooperasııa, shekaralyq seriktestik, sý-energetıka salasy, saýda-ekonomıkalyq yntymaqtastyq máselelerdiń keń aýqymy boıynsha pikir almasty.
«Bizdiń basty maqsatymyz - Qazaqstan Prezıdenti Nursultan Nazarbaev pen Qyrǵyzstan Prezıdenti Sooronbaı Jeenbekov arasyndaǵy Astana jáne Cholpan-Atada qol jetkizilgen ýaǵdalastyqtardy júzege asyrý. Biz prezıdentterdiń kóptegen tapsyrmalary oryndalǵanyna jáne aldaǵy josparlardy júzege asyrýda taraptardyń belsendi ózara is-qımyly jalǵasatyndyǵyn qanaǵattanýshylyqpen atap ótemiz», - dedi qazaqstandyq mınıstr. Kezdesý barysynda ózara saýda-sattyq kólemin ulǵaıtýǵa jáne onyń qurylymyn ártaraptandyrýǵa, ekonomıkanyń jańa sektorlarynda birlesken ınvestısııalyq jobalardy iske asyrýǵa, sonyń ishinde «Astana» Halyqaralyq qarjy ortalyǵyn tartýǵa baǵyttalǵan praktıkalyq sharalardy júzege asyrýǵa ózara tilek bildirildi. Eki eldiń bıznes-qurylymdary úshin elektrondyq saýda, qarjy qyzmetteri, óńdeý jáne azyq-túlik ónerkásibi, sondaı-aq sıfrlyq ındýstrııa sııaqty salalarda ózara tıimdi yntymaqtastyqty ashý boıynsha jańa múmkindikter ashylýda.
Eýrazııalyq keńistikte beıbitshilik pen turaqtylyqty nyǵaıtýǵa járdemdesýge degen ortaq nıet aıtyldy. Halyqaralyq saıasattyń ózekti máseleleri boıynsha uqsas ustanymdardy anyqtaı otyryp, taraptar BUU, Shanhaı yntymaqtastyq uıymy, Ujymdyq qaýipsizdik týraly shart uıymy, Eýrazııalyq ekonomıkalyq odaq, Azııadaǵy ózara yqpaldastyq jáne senim sharalary jónindegi keńesi, Túrkitildes memleketterdiń yntymaqtastyq keńesi, Eýropadaǵy qaýipsizdik jáne yntymaqtastyq uıymy jáne basqa da kópjaqty qurylymdar sheńberindegi yntymaqtastyqty jandandyrý nıetin rastady.
«Eki halyqtyń mádenı-tarıhı jáne tildik ortaqtyǵy mádenıet, óner, ǵylym, týrızm jáne basqa da salalardaǵy yntymaqtastyqty odan ári keńeıtý úshin jaqsy negiz bolyp tabylady. Biz mádenı almasýǵa jan-jaqty kómek kórsetip, osy salalarda baılanystardy qoldaımyz», - dedi Qazaqstan syrtqy saıası vedomstvosynyń basshysy.
Qazaqstandyq statıstıkalyq málimetke sáıkes, 2018 jyldyń alǵashqy jeti aıynda Qazaqstan men Qyrǵyzstan arasyndaǵy ózara saýda kólemi 18 paıyzǵa ósip, 486 mln. AQSh dollaryn qurady.