Astanada Eńbek kúni men Áleýmettik qorǵaý qyzmetkerleri kúnine oraı «Jalpyǵa ortaq eńbek qoǵamyna qaraı» atty respýblıkalyq forým ótti. Saltanatty jıynda elimizge eńbegi sińgen ár salanyń qyzmetkerlerine «Eńbek ardageri» medali tabystalyp, «Eńbek joly» jáne «Úzdik áleýmettik qyzmetker» respýblıkalyq konkýrstarynyń jeńimpazdary marapattaldy.
Eńbek kúni Memleket basshysy Nursultan Nazarbaevtyń «Qazaqstannyń áleýmettik jańǵyrtylýy: Jalpyǵa Ortaq Eńbek Qoǵamyna qaraı 20 qadam» atty baǵdarlamalyq maqalasyn nasıhattaý jáne eńbek adamynyń bedelin arttyrý maqsatynda 2014 jyldan beri atalyp keledi. Sol jyly Úkimettiń qaýlysymen «Eńbek ardageri» medali, 2015 jyly «Eńbek dańqy» medali bekitilgen bolatyn. Buǵan qosa Eńbek jáne halyqty áleýmettik qorǵaý mınıstrligi 2016 jyldan bastap jyl saıyn «Eńbek joly» konkýrsyn ótkizip keledi.
Forýmnyń ashylý saltanatynda sóz alǵan Eńbek jáne halyqty áleýmettik qorǵaý mınıstri Mádına Ábilqasymova forýmnyń mańyzdylyǵyna toqtala kelip, elimizde áleýmettik qorǵaý júıesiniń jetile beretindigin jáne qazaqstandyqtarǵa ýaqtyly, tolyq áleýmettik qoldaý kórsetilýi qajettigin nazarǵa aldy. «Bul forým eńbek adamynyń qoǵamdaǵy bedelin kórsetip, jastardy óndiris salasyna tartýdy kózdeıdi. Prezıdent jańa Joldaýynda ár otbasynyń tabysyn arttyrýda eńbektiń mańyzdy ornyn atap ótti. Elbasy Qazaqstan halqynyń ál-aýqatyn ósirýdi elimizdi damytýdyń negizgi maqsaty retinde aıqyndady. Halyqtyń tabysyn arttyrý maqsatynda Memleket basshysynyń tapsyrmasyna sáıkes 2019 jyldyń 1 qańtarynan bastap qazaqstandyqtardyń eń tómengi jalaqysy 28 myńnan 42 myń teńgege deıin kóbeıetin bolady. Nátıjesinde 1 mln 300 myń adamnyń, onyń ishinde 275 myń azamattyq qyzmetshiniń, sonymen qatar áleýmettik qyzmet kórsetý salasynda jumys isteıtin adamdardyń jalaqysy ósedi. Eńbek resýrstarynyń básekege qabilettiligin arttyrý úshin bilim berý sapasyn barlyq deńgeıde jaqsartý sharalary kózdeledi. Salamatty ult qalyptastyrý úshin medısınalyq qyzmetterdiń qoljetimdiligi men sapasyn arttyrý boıynsha sharalar qabyldanady. Halyqtyń tabysyn arttyrý, jumyspen qamtý jáne jumysqa ornalastyrý múmkindigine, eńbek ónimdiligin arttyrýǵa baılanysty osyndaı atqarylyp jatqan jumystarda eńbek ardagerleri men kún saıyn óndiriste mańdaı terin tógip eńbek etip jatqan eńbek áýletteriniń úlesi ólsheýsiz», degen mınıstr jınalǵan jurtty qos merekemen quttyqtady jáne «Eńbek ardageri» medalin tabystady.
Bıyl «Eńbek ardageri» medaline Semeı qalasyndaǵy «Sılıkat» JShS bas mehanıgi Nıkolaı Lazýrın, Astana medısına ýnıversıteti Akýsherııa jáne gınekologııa kafedrasynyń assıstenti Ramzııa Razýmova, orys tili pániniń muǵalimi Hazıma Aıdarbekova, Bas áskerı klınıkalyq gospıtali hırýrgııa bóliminiń hırýrgi Esimǵalı Talasbaev, T.Júrgenov atyndaǵy Qazaq ulttyq óner akademııasy kásiptik baǵdarlaý bóliminiń meńgerýshisi Ǵalııa Moldajanova, T.Júrgenov atyndaǵy Qazaq ulttyq óner akademııasynyń sýretshisi Olga Volodına, Astana qalasy áleýmettik-kásipkerlik korporasııalardyń qyzmetin úılestirý jáne ádistemelik qamtamasyz etý boıynsha jumystardy basqarǵan Gúlnar Qasenova, mindetti áleýmettik saqtandyrý jáne zeınetaqymen qamsyzdandyrý salasynda uzaq jyl qyzmet etken Gúlzada Sultanova ıe boldy.
Úsh atalym boıynsha ótken «Eńbek joly» konkýrsynyń jeńimpazdary onlaın daýys berý jáne respýblıkalyq komıssııanyń sheshimimen anyqtaldy. Atalǵan baıqaýdyń «Úzdik eńbek áýleti» atalymyn 458 jyl tórt urpaq boıy orman sharýashylyǵy salasynda 25-ten astam áýlet múshesi eńbek etken Qurmanǵalıevter otbasy jeńip aldy. «Jumys isteıtin jastardyń úzdik tálimgeri» nomınasııasy boıynsha «Kazhrom «TUK» AQ metallýrgi Ábilqaıyr Sotqarov marapattalsa, «Dossormunaıgaz» munaı-gaz óndirý birlestiginiń munaıshysy Aıbek Tursynbek «О́ndiristegi úzdik jas jumysker» atalymynyń jeńimpazy atandy.
«Úzdik áleýmettik qyzmetker» respýblıkalyq baıqaýynyń «Zeınetaqy júıesindegi úzdik qyzmetker» nomınasııasy Eńbek, áleýmettik qorǵaý jáne kóshi-qon komıtetiniń Soltústik Qazaqstan oblysy boıynsha departamentiniń zeınetaqy jáne áleýmettik qamtamasyz etý bóliminiń basshysy Gúljan Sultanǵazıevaǵa buıyrsa, «Áleýmettik saqtandyrý júıesindegi úzdik qyzmetker» atalymyn «Memlekettik áleýmettik saqtandyrý qory» AQ Aqmola oblysy fılıalynyń dırektory Aınagúl Sabyrova enshiledi. Batys Qazaqstan oblysy «Shapaǵat» arnaýly áleýmettik qyzmetter kórsetý ortalyǵynyń defektology Bıbigúl Jartybaeva «Úzdik áleýmettik qyzmetker», Aqtóbe oblysy Muǵaljar aýdany ákimdiginiń Halyqty jumyspen qamtý ortalyǵynyń mamany Raýshan Kubaıdýllına «Jumyspen qamtý ortalyǵynyń úzdik qyzmetkeri» atandy. «Úzdik medısınalyq-áleýmettik mekeme» nomınasııasyn Qyzylorda oblysy «Balalarǵa arnaýly áleýmettik qyzmet kórsetý ortalyǵy» al «Úzdik áleýmettik úkimettik emes uıym» nomınasııasyn Almaty qalasyndaǵy «Amal-Iman» qoǵamdyq qory jeńip aldy. «Áleýmettik salanyń úzdik menedjer-uıymdastyrýshysy» atalymy Qyzylorda oblysy «Múgedekterge arnalǵan ońaltý ortalyǵy» dırektorynyń orynbasary Gúlmıra Kenjebaevaǵa buıyrsa, «Medısınalyq-áleýmettik saraptamanyń úzdik qyzmetkeri» nomınasııasyn Astana qalasy medısınalyq-áleýmettik saraptama bóliminiń bas mamany Lázzat Tilekına enshiledi. «Úzdik memlekettik eńbek ınspektory» nomınasııasy boıynsha Qyzylorda oblysynyń eńbek salasyndaǵy baqylaý basqarmasynyń Eńbek qaýipsizdigi jáne eńbekti qorǵaýdy baqylaý bóliminiń basshysy-memlekettik eńbek ınspektory Ábdimálik Áıtimov, «Azamattarǵa arnalǵan úkimet» memlekettik korporasııasynyń eń úzdik áleýmettik qyzmetkeri» nomınasııasy boıynsha atalǵan mekemeniń ortalyq fılıalynyń bas mamany Atameken Ashmahanova marapattaldy.
Maıgúl SULTAN,
«Egemen Qazaqstan»